ԲՀԿ խորհրդարանական խմբակցության քարտուղար Նաիրա Զոհրաբյանը բացառում է ՀՀԿ հետ կոալիցիա ստեղծելու հնարավորությունը: Այդ մասին նա հայտարարել է ԱրմԻնֆոյի թղթակցին` մեկնաբանելով ՀՀԿ փոխնախագահներ Հովիկ Աբրահամյանի և Արմեն Աշոտյանի միմյանց հաջորդած հայտարարությունները երկու կուսակցությունների կառավարող կոալիցիա ստեղծելու հնարավորության վերաբերյալ:

Չցանկանալով մանրամասնել և խոսել ինչ-որ շարժառիթների մասին, որոնք Աբրահամյանին դրդել են նման բան ասել, ԲՀԿ խմբակցության քարտուղարը կտրականապես բացառել է նշված սցենարը: ՙԱվելին, ես հրապարակում  եմ ոչ միայն սեփական կարծիքս, այլ կուսակցության տեսակետն` ընդհանուր առմամբ՚, - ասել է նա: ԱԺ նախագահ Հովիկ Աբրահամյանն այսօր լրագրողների հետ զրույցում չէր բացառել ՀՀԿ և  ԲՀԿ միջև կոալիցիա ստեղծելու հնարավորությունը Երևանի ավագանու խորհրդում և կառավարությունում: Պատասխանելով այն հարցին, թե քանի նախարար կփոխվի նոր կառավարությունում, Աբրահամյանը կոչ է արել սպասել ևս երկու օր: Մինչդեռ մեկ օր առաջ , պատասխանելով նույն հարցին, հենց Աբրահամյանը բացառել էր ՀՀԿ և ԲՀԿ համախմբման հնարավորությունը: Իսկ այսօր երկու կուսակցությունների միջև քաղաքական դաշինքի հնարավորթյունն առաջինը կանխատեսել է ՀՀԿ փոխնախագահ, կրթության և գիտության նախարարի պաշտոնակատար Արմեն Աշոտյանը: ՙԵս չեմ բացառում ՀՀԿ և ԲՀԿ միջև նոր կոալիցիայի հնարավորությունը, թեև անձամբ ես դա չէի ցանկանա՚, - հայտարարել է Աշոտյանը:  2007 թվականի խորհրդարանական ընտրություններից հետո ԲՀԿ ՀՀԿ հետ միասին կառավարող կոալիցիայի ակզմում էր: սակայն մինչև 2012 թվականի խորհրդարանական ընտրությունները ԲՀԿ աստիճանաբար շրջվեց ՙընդդիմության՚ կողմը`     այդ ընտրություններում հանդես գալով որպես ընդդիմադիր ուժ: Սակայն 2013 թվականի նախագահական ընտրություններում ԲՀԿ  դարձյալ շեղվեց իր գծից և չմասնակցեց դրանց: Կուսակցությունը կրկին աշխուժացել է Երևանի ավագանու ընտրություններում` դարձյալ հանդես գալով որպես ընդդիմադիր ուժ:

Երևանի բնակչուհի Անուշ Չուբարյանի բնակարանին ՙտիրացել է՚ 22 ընտրող: Զվարճալի դեպքը տեղի է ունեցել այսօր մայրաքաղաքի ընտրատեղամասերից մեկում: Ինչպես պատմել է Չուբարյանը, մտնելով ընտրատեղամաս`նա հայտնաբերել է, որ իր բնակարանում 22 անծանոթ մարդ է գրանցված: Չուբարյանը բնակվում է Նալբանդյան 104 հասցեում:

Եվս մեկ խախտման մասին հաղորդում է ՀՅԴ շտաբը: ՙԹեժ գծով՚ ահազանգ է ստացվել, որ երկու օր առաջ Դավիթաշեն համայնքի բնակիչներից մեկի բնակարան են բերել գործող քաղաքապետ Տարոն Մարգարյանի բուկլետները, որոնցում հայտնաբերվել է ՙբոնուս՚`քաղաքացու կոմունալ ծառայությունների վճարման կտրոնի տեսքով:

 Երևանի 7/25 ընտրատեղամասում ՙԲարգավաճ Հայաստան՚ կուսակցության ներկայացուցչի և ընտրահանձնաժողովի անդամների միջև ծեծկռտուք է սկսվել:
ԲՀԿ ներկայացուցիչը մտել է ընտրատեղամաս և փորձել է խոչընդոտել ընտրությունների ընթացքին, սակայն հանձնաժողովի նախագահը դուրս է հրավիրել նրան, քանի որ նա իրավունք չուներ գտնվել ընտրատեղամասում: Տեղամասի ներսում իրար քաշքշելուց հետո նրանք դուրս են եկել և ծեծկռտուքը շարունակել բակում: Նաև Նոր Նորքի 7-րդ զանգվածում ԲՀԿ ներկայացուցիչները 10-հազարական դրամ կաշառք են բաժանում:
ՙԲարև Երևան՚ դաշինքի շտաբը հաղորդում է, որ 8/23 ընտրատեղամասում ՀՀԿ-ն կաշառք է բաժանում: Նաև նշվում է, որ Բլեյանի անվան հարակից տներում բնակիչներին 20 հազար դրամ կաշառք են առաջարկում: Կաշառք է բաժանվում նաև N27 և Թումանյանի անվան դպրոցի մոտակայքում:

ՀՀ նախագահ Սերժ Սարգսյանը մայիսի 3-ի ուշ երեկոյան Հայաստանի հանրապետական կուսակցությունում կայացած նիստում հանձնարարական է տվել ՀՀԿ բոլոր անդամերին` ամեն ինչ անել, որպեսզի ոչ մի դեպք չարձանագրվի, լրագրողների հետ զրույցում ասել է ՀՀ ԱԺ նախագահ Հովիկ Աբրահամյանը`կատարելով իր քաղաքացիական պարտքը:

Նա ընդգծել է, որ նախագահը նաև արգելել է հանրապետականներին ենթարկվել մայրաքաղաքային ընտրություններին մասնակցող քաղաքական այլ ուժերի կողմից նախաձեռնված հնարավոր սադրանքներին:

 Երևանի Ավագանու խորհրդի ընտրություններում նոր կեղծարարություն է հորինվել:

Ինչպես հաղորդում է ՀՅԴ թեժ գիծը, Սիլիկյան փողոցում գտնվող դպրոցում տեղակայված ընտրատեղամասում ընտրողներից վերցնում են անձնագրերը, քվեարկում դրանով, իսկ հետո վերադարձնում`գումարի հետ միասին: Ցավոք, թեժ գիծը չի նշում, թե հատկապես որ կուսակցությունն է հորինել ՙանձնագրային կարուսելը՚:

 ՀՀ Ոստիկանությունը նյութեր է նախապատրաստում ընտրական օրենսդրության խախտումների 31 դեպքի առնչությամբ քրեական գործ հարուցելու համար: Այդ մասին հաղորդում է կառույցի կայքը:

 ՙԵս քվեարկել եմ այն քաղաքական ուժի օգտին, որը ներկայացնում եմ, և հուսով եմ, որ մարդիկ կքվեարկեն բարեփոխումների օգտին և, վերջապես, կսթափվեն քնից՚, - հայտարարել է ՙԲարև Երևան՚ դաշինքի համամասնական ցուցակը գլխավորող Արմեն Մարտիրոսյանը, ով քվեարկել է 6/28 ընտրատեղամասում` ՙԱջափնյակ՚ վարչական շրջանում:

Խոսելով ընտրակաշառքների մասին` նա տեղեկացրել է, որ նախօրեին խանութում և բենզալցակայանում բոլորը խոսել են միայն այն մասին, որ մարդիկ գալիս են 20 000 դրամանոց թղթադրամներով:

 ԿԸՀ հրապարակած տվյալների համաձայն, Երևանի ավագանու ընտրությունների քվեարկությանը ժամը 11:00-ի դրությամբ մասնակցել է քվեարկելու իրավունք ունեցողների 15,08 տոկոսը` 123 121 ընտրող:

Մասնավորապես, Աջափնյակ վարչական շրջանում ընտրություններին մասնակցել է 16 240 մարդ կամ ընտրողների 19,90 տոկոսը, Ավանում` 7 379 մարդ կամ 19, 49 տոկոսը, Արաբկիրում` 11 480 մարդ կամ 12,25 տոկոսը, Դավթաշենում`4 805 մարզ կամ 15,42 տոկոսը,  Էրեբունիում` 13 272 մարդ կամ 14,6 տոկոսը, Կենտրոնում` 10 727 մարդ կամ 11,53 տոկոսը, Մալաթիա-Սեբաստիայում` 11 818 մարդ կամ 11,47 տոկոսը, Նոր Նորքում` 15 437 ընտրող կամ 15,74 տոկոսը, Նորք-Մարաշում` 1 797 ընտրող կամ 17, 76 տոկոսը,
Նուբարաշենում` 1 262 ընտրող կամ 16,2 տոկոսը, Շենգավիթում` 20 290 ընտրող կամ 18,08 տոկոսը, Քանաքեռ-Զեյթունում` 56 837 ընտրող կամ 15,16 տոկոսը:

Ընտրողների մասնակցության վերաբերյալ հաջորդ տվյալները ԿԸՀ կհպրապարակի ժամը 15:00-ին: Դրանք կլինեն 14:00-ի տվյալները:

 Երևանի գործող քաղաքապետ, ՀՀԿ ներկայացուցիչ Տարոն Մարգարյանը քվեարկել է ՙԵրևանի լավագույն ապագայի՚ օգտին: Նա ընտրատեղամաս էր ժամանել ընտանիքի անդամների հետ: Լրագրողների հետ զրույցում նա, մասնավորապես, հայտարարել է, թե Երևանի քաղաքապետի պաշտոնում վերընտրվելու դեպքում կշարունակի Երևանի բարեկարգումը: Նա ընդսմին նշել է, որ աշխատանքի բավականաչափ ծավալն արդեն կատարվել է, և քաղաքապետարանն իր գործունեության համար հաշվետու է հասարակության առջև:

Պատասխանելով մայրաքաղաքի առանձին շրջաններում նախընտրական կաշառքներին առնչվող հարցին` Մարգարյանը նշել է այդ տեղեկությունները հաստատվելու դեպքում դրանց մանրակրկիտ հետաքննության անհրաժեշտությունը:

 Մայիսի 5-ի ժամը 10:00 դրությամբ 2 քրեական գործ է հարուցվել Երևանի ավագանու խորհրդի ընտրությունների նախընտրական քարոզարշավի ընթացքում խախտման փաստերի առնչությամբ, հաղորդում է ՀՀ ոստիկանության պաշտոնական կայքը:

Ընդհանուր առմամբ, Ոստիկանությունում քննարկվել և քննարկման փուլում է նախընտրական քարոզարշավի ընթացքում խախտման 23 դեպք, որոնցից 11-ն առնչվում է նախընտրական կաշառքի բաժանմանը, 2-ը` վիճաբանությանն ու ծեծկռտուքին, 1-ը` լրագրողի գործունեությանը խոչընդոտելուն:

 Հայաստանի նախագահ Սերժ Սարգսյանը քվեարկել է ՙբարեկեցիկ և հարմարավետ Երևանի՚ օգտին: Այդ մասին նա լրագրողներին հայտարարել է թիվ 9/11 ընտրատեղամասում քվեարկելուց հետո, ուր եկել էր տիկնոջ հետ:

ՙԵս քվեարկել եմ զարգացող, բարեկեցիկ և ավելի հարմարավետ Երևանի օգտին: Ընտրել եմ համեստ և հասարակ կառավարողի տեսակը: Ես քվեարկել եմ հօգեւտ այն ուժի, որը հասկանում է քաղաքապետի և, ընդհանուր առմամբ, քաղաքապետարանի դերը երկրի կառավարման համակարգում և քաղաքական կյանքում՚, - նշել է պետության ղեկավարը:

Նախագահը հրիաժարվել է ընտրությունների ելքի վերաբերյալ կանխատեսումներից, քանի որ քվեարկության արդյունքները հայտնի կդառնան միայն ժամը 20:00-ից հետո:

Ինչպես ԱրմԻնֆոյի թղթակցին հաղորդել է թիվ 9/11 տեղամասի ընտրական հանձնաժողովի նախագահ Ջուլիետա Ավագյանը, տեղամասում գրանցված է 1245 ընտրող, որոնցից առայժմ քվեարկել է շուրջ 200-ը: Նրա ասելով, առայժմ առանձնապես ակտիվություն չի դիտվում:

 Երևանի ավագանու խորհրդի ընտրությունների տարբեր ընտրատեղամասերից շարունակում են հաղորդումներ ստացվել անհետացող կնիքների մասին: Ըստ ԶԼՄ-ների հաղորդումների, քվեարկությունից հետո ընտրողների անձնագրերում դրված կնիքների արագ անհետացման փաստեր են արձանագրվել 8 և  12 ընտրատարածքներում, թթ.12/15, 12/03, 11/18,  1/09 և 07/23 ընտրատեղամասերում: Ի դեպ, նշված տեղամասերից մեկում հանձնաժողովի նախագահն արդեն կապվել է ԿԸՀ հետ, որպեսզի տեղեկանա, թե արդյոք թանաքանյութը հնարավոր է փոխել:

 ՀՅԴ շտաբը հաղորդումներ է ստանում Երևանի ավագանու ընտրություններում զանգվածային ընտրակաշառքների մասին: Այսպես, Կնետրոն համայնքի մի քանի բնակիչներ հաորդում են, որ համայնքատիրության աշխատակիցները Կենտրոնի թաղապետարանի գիտությամբ Պուշկինի անվան դպրոցում տեղակայված ընտրատեղամասում կաշառք են բաժանում ընտրողներին: Ընտրակաշառքի բազմաթիվ դեպքերի մասին հաղորդում են նաև Շենգավիթ համայնքի բնակիչները:

ԶԼՄ-ներից մեկի հաղորդման համաձայն, մարդկանց մեծ կուտակում է դիտվում Հայաստանի միավորված աշխատանքային կուսակցության գրասենյակի մերձակայքում, որի առաջնորդը`խոշոր ձեռներեց Գուրգեն Արսենյանը, ներառված է ԲՀԿ համամասնական ցուցակում: Ականատեսների վկայությամբ, մարդիկ ըստ ցուցակի  մտնում են գրասենյակ, որտեղ նրանց փող են տալիս:

 ՙՄենք` Երևանցիներս, միասին կարող ենք անել այնպես, որպեսզի միջազգային կազմակերպությունները համոզվեն, որ Երևանում կարող են անցկացվել միջազգային ստանդարտներին համապատասխանող ընտրություններ՚, - քվեարկելուց հետո լրագրողներին հայտարարել է Երևանի ավագանու ընտրություններում ՕԵԿ համամասնական ցուցակը գլխավորող ԱԻՆ պաշտոնակատար Արմեն Երիցյանը:

Նա հավաստիացրել է, որ Երևանը լինելու է գեղեցիկ, ու բոլոր երևանցիները հպարտանալու են իրենց քաղաքով: Երիցյանը նաև հաղորդել է, որ ընտրությունների ընթացքին կհետևի ՕԵԿ-ի ընտրական շտաբից և համոզմունք է հայտնել, որ ընտրական գործընթացները կհամապատասխանեն օրենքներին:

Երիցյանը քվեարկել է ժամը 10-ին Էրեբունի վարչական շրջանի 194 դպրոցում տեղակայված 13/15 ընտրատեղամասում: Նա ընտրատեղամաս էր եկել կնոջ հետ:

 Մի շարք ԶԼՄ-ներ հաղորդում են տարբեր ընտրախախտումների մասին: Այսպես, Կենտրոն վարչական շրջանում տեղակայված 9/03 տեղամասի հանձաժողովի նախագահ, ՀՀԿ ներկայացնող Գալուստ Սարգսյանը հարբած է ներկայացել ընտրատեղամաս, ի պատասխան հանձնաժողովի անդամների դիտողությունների` ՙդեբոշ՚ է արել ու  գոռգացել:

Բացի այդ, Transparency.am պորտալը հաղորդում է Սիլիկյան թաղամասի 07/34 ընտրատեղամասում կաշառք բաժանելու մասին: Իսկ 07/14 ընտրատեղամասում ՀՀԿ երկու ներկայացուցիչներ ընտրական հանձնաժողովի անդամներին կարգադրություններ են արել, իսկ հանձնաժողովի նախագահը հրաժարվել է արձանագրել այդ խախտումը:  13/25 տեղամասում (Նոր Արեշի թիվ 69 մանկապարտեզ) հանձնաժողովի նախագահը հայտարարել է, թե մոռացել է բերել ծրարների վրա դրվող կնիքը, արդյունքում 36 քվեաթերթիկներ նետվել են քվեաթուփ առանց կնքելու:

 ՙԲարև Երևան՚ դաշինքն ուշադրություն է հրավիրում այն հանգամանքին, որ Երևանի ավագանու ընտրություններում քվեարկության համար անձնագրերում դրված կնիքներն անհետանում են:

ՙԺառանգություն՚ կուսակցության մամուլի քարտուղար Հովսեփ Խուրշուդյանի տեղեկացմամբ, նման միջադեպեր են արձանագրվել թթ. 7/22 և 7/23 տեղամասերում: Ստացված ահազանգերից  հետո թիվ 7/22 տեղամասում անձնագրերում կնիքների համար նախատեսված թանաքանյութին սովորական թանաք է խառնվել:

Հիշեցնենք, որ համանման միջադեպեր էին արձանագրվել նաև վերջին խորհրդարանական և նախագահական ընտրությունների ընթացքում:

Մայիսի 5-ին ՙԲարեւ Երեւան՚ կուսակցությունների դաշինքի տեղեկատվական կենտրոն գործում է ՙՔաղաքացիական Ազգային Նախաձեռնություն՚ ՀԿ-ում՝ Երզնկյան 75 հասցեում (Բարեկամություն մետրոյի հարեւանությամբ):  Ինչպես ԱրմԻնֆո գործակալությանը հաղորդեցին ՙԲարեւ Երեւան՚ կուսակցությունների դաշինքի մամլո ծառայությունից, Կենտրոնում կհավաքագրվեն խախտումների մասին բոլոր ահազանգերը, ինչպես նաեւ կգտնվեն Արաբկիրի, Դավիթաշենի, Աջափնյակի և Կենտրոնի արագ արձագանքման խմբերը: Տեղկատվական կենտրոնի հեռախոսահամարն է՝ 010-27-16-00; մամլո Խոսնակ Դավիթ Սանասարյանի հեռախոսահամարներն են՝ 094-940-960, 095 940 930:

Մալաթիա-Սեբաստիայի, Էրեբունու և Շենգավիթ վարչական շրջանների արագ արձագանքման խմբերը կգործեն ՙԲարեւ Երեւան՚ կուսակցությունների դաշինքի Շենգավիթի շտաբից: Ղեկավարը՝ Անահիտ Բախշյան:

Ավանի և Նոր Նորքի  վարչական շրջանների արագ արձագանքման խմբերը կգործեն ՙԲարեւ Երեւան՚ կուսակցությունների դաշինքի Նոր Նորքի շտաբից: Ղեկավարը՝ Ստյոպա Սաֆարյան:

Քանաքեռ-Զեյթունի արագ արձագանքման խմբերը կգործեն ԺՈՒԿ կուսակցութայն գրասենյակում՝  Արթուր Գասպարյանի ղեկավարմամբ:

Մայիսի 5-ի առավոտյան ժամը 08.00-ից Հայ ազգային կոնգրեսի կենտրոնական շտաբում գործում է օպերատիվ արձագանքման ծառայություն, որտեղ կարձանագրվեն բոլոր իրավախախտումներն ու ահազանգերը: Ինչպես ԱրմԻնֆո գործակալությանը հաղորդեցին կուսակցության մամուլի ծառայությունից, ընտրակեղծիքների, ընտրական օրենսդրության խախտումներինև ընտրություններին առնչվող այլ հակաօրինական արարքների վերաբերյալ տեղեկություններ հաղորդելու ու ահազանգելու համար կարող եք զանգահարել կենտրոնական շտաբ` հետևյալ հեռախոսահամարներով`
055 27.94.94
091.26.27.11
098 68.60.13:

ՀԱԿ օպերատիվ արձագանքման ծառայության հետ կարելի է կապվել նաև` գրելով հետևյալ էլեկտրոնային փոստերին[email protected];  [email protected]:

Ընտրության ընթացքին, տեղի ունեցող ընտրախախտումներին կարելի է հետևել նաև ինտերնետում` ՀԱԿ պաշտոնական կայքում.  www.anc.am; 
Ֆեյսբուքում
https://www.facebook.com/armnatlcongress?fref=ts
www.facebook.com/ancprgroup
Յութուբում
www.youtube.com/user/ArmNatlCongress?feature=mhee
Թվիթերում
https://twitter.com/ancongress
hashtag – #evnvote13, #Armenia:

 Քվեարկության կազմակերպմանն ու անցկացմանն առնչվող ոչ մի խնդիր չի ծագել: Այդ մասին մայիսի 5-ին լրագրողներին հայտարարել է ԿԸՀ ղեկավար Տիգրան Մուկուչյանը:

Նա տեղեկացրել է, որ 464 ընտրական տեղամասերը բացվել են օրենքով սահմանված ժամին, ընտրական հանձնաժողովների 3712 անդամներից բացակայել են 12-ը, 8-ը ՙԺառանգություն՚ կուսակցությունից, 2-ը` ՀՅԴ-ից, ընտրական հանձնաժողովների բացակա անդամներից ևս երկուսը նշանակվել են տարածքային ընտրական հանձնաժողովի կողմից: Նա տեղեկացրել է, որ այս անգամ քվեարկած քաղաքացիների անձնագրերում կնիքներին առնչվող խնդիրներ չպետք է ծագեն: Նրա հավաստմամբ, ցնդող թանանքը փորձարկվել է:

Ընտրողները պետք է ընտրեն խորհրդի 65 անդամների, որոնք իրենց հերթին պետք է ընտրեն Երևանի քաղաքապետ: Երևանի ավագանու խորհրդի ընտրություններին մասնակցում են յոթ քաղաքական ուժեր՝ Հայաստանի հանրապետական կուսակցությունը, ՙԲարգավաճ Հայաստան՚ կուսակցությունը, ՙՕրինաց երկիր՚ կուսակցությունը, ՙՀայ Յեղափոխական Դաշնակցությունը՚, ՙՀայ ազգային կոնգրես՚ կուսակցությունը, ՙԱռաքելություն՚ կուսակցությունը և ՙԲարև Երևան՚ նախընտրական դաշինքը: Վերջին տվյալների համաձայն, ընտրություններին կհետևի 261 դիտորդ:

 Մայիսի 5-ին, ժամը 08:00-ին բացվել են Երևանի ավագանու խորհրդի ընտրությունների ընտրական տեղամասերը: Ընտրողների քվեարկությունը կշարունակվի մինչև 20:00: Ոստիկանության տվյալներով, Երևանում ընտրողների թիվը կազմում է 816 475 մարդ, որոնցից շուրջ 3000 Հայաստանի քաղաքացիություն  չունեցող անձինք են, սակայն իրավունք ունեն մասնակցելու քվեարկությանը: Ընտրատեղամասերի ընդհանուր թիվը 464 է:

Համաձայն ՙԵրևան քաղաքում տեղական ինքնակառավարման մասին՚ ՀՀ օրենքի՝ Երևանի ավագանու խորհուրդը կազմված է 65 անդամից, որոքն ընտրվում են  4 տարով: Այս ընտրություններում 65 տեղի համար պայքարում են յոթ քաղաքական ուժեր՝ Հայաստանի հանրապետական կուսակցությունը, ՙԲարգավաճ Հայաստան՚ կուսակցությունը, ՙՕրինաց երկիր՚ կուսակցությունը, ՙՀայ Յեղափոխական Դաշնակցությունը՚, ՙՀայ ազգային կոնգրես՚ կուսակցությունը, ՙԱռաքելություն՚ կուսակցությունը և ՙԲարև Երևան՚ նախընտրական դաշինքը: Խորհրդում ընտրվելու համար կուսակցությունները պետք է հաղթահարեն 6 տոկոսի, իսկ դաշինքը` 8 տոկոսի շեմը: