Հայաստանում վերացել է չվերթների բաշխման նպատակով տեղի ավիափոխադրողների շրջանում հայտամրցույթ անցկացնելու անհրաժեշտությունը, քանի որ մինչ օրս թռիչքների հայտ է ներկայացրել միայն մեկ հայկական ընկերություն` Air Armenia-ն: Այդ մասին նախօրեին մամուլի ասուլիսում հայտարարել է Հայաստանի քաղաքացիական ավիացիայի գլխավոր վարչության պետ Արտեմ Մովսիսյանը:

 Սիրիայում Քրդական ինքնավարությունն Էրդողանի արկածախնդրության համար Թուրքիայի հատուցման մասն է կազմում, ԱրմԻնֆո-ին այդպիսի կարծիք է հայտնել ԳԱԱ Արևելագիտության ինստիտուտի տնօրեն, պրոֆեսոր Ռուբեն Սաֆրաստյանը:

«Հայաստանն իրոք Ադրբեջանի պատմական հողն է, ուր մենք ապագայում կվերադառնանք: Երիտասարդությունը, երեխաները պետք է ապրեն մեր պատմական հողեր վերադարձի գաղափարով` ներառյալ Հայաստանը»: Ըստ ադրբեջանական ԶԼՄ-ների, հունվարի 22-ին Գյանջայում (հայկական Գանձակ – խմբ.) այդ մասին հայտարարել է Ադրբեջանի ցմահ նախագահ Իլհամ Ալիևը:

ARMENIA տեղեկատվական պորտալի համակարգող Արգիշտի Կիվիրյանի դեմ քրեական գործը հանձնվել է դատարանին: Այս մասին Կիվիրյանը նշել է ֆեյսբուքյան իր էջում:

 Բանակի օրվա կապակցությամբ Հայաստանի քաղաքացիները չորս օր կհանգստանան: ՀՀ կառավարությունը որոշեց ոչ աշխատանքային օր հայտարարել նաև հունվարի 27-ը, քանի որ հունվարի 28-ը Բանակի օրն է և ընկնում երեքշաբթի: Արդյունքում, Հայաստանի քաղաքացիները կհանգստանան հունվարի 25-ից մինչև 28-ը: Սակայն, հունվարի 27-ի փոխարեն ՀՀ կառավարությունն աշխատանքային օր է հայտարարել առաջիկա շաբաթ օրը, այսինքն, փետրվարի 1-ը:

 Հայաստանի և Ադրբեջանի ԱԳՆ ղեկավարների հանդիպումն ի սկզբանե չի կարող որևէ արդյունքի հանգեցնել`վերջերս տեղի ունեցած ադրբեջանական դիվերսիայի պատճառով, ԱրմԻնֆո-ի թղթակցին այդպիսի կարծիք է հայտնել քաղաքագետ Կարեն Բեքարյանը: 

 Եվրոմայդանում և Կիևի փողոցներում առկա իրողությունները Ուկրաինայի սահնմանադրական և պետական կարգի գոյության դադարեցման վկայություն են: Իրադարձությունների ցանկացած այլ գնահատական սխալ է` իր կանխակալության պատճառով: ԱրմԻնֆոյին այդպիսի կարծիք է հայտնել Եվրոպական և անդրատլանտյան հետազոտությունների կենտրոնի (Կիև) նախագահ Ալեքսեյ Կոլոմիեցը:

ՙԴեմ եմ՚ երիտասարդական քաղաքացիական նախաձեռնության կողմից հունվարի 18-ին Երևանում կազմակերպված հանրահավաքը հերթական անգամ հաստատեց Հայաստանի անկախության տարիներին արդեն աքսիոմա դարձած ճշմարտությունը: Հայերի նոր սերունդը ցույց տվեց, որ չի ցանկանում կրկնել նախորդ սերնդի սխալները: Երիտասարդությունն ակտիվորեն հանդես եկավ կենսաթոշակային համակարգի` իշխանությունների նախաձեռնած ՙբարեփոխման՚ դեմ` ելնելով սեփական գումարները 30 տարի անց ստանալու չափազանց կասկածելի հեռանկարներից: Այլ կերպ ասած` մարդիկ բողոքում են ոչ թե բուն գաղափարի, այլ` իշխանությունների դեմ, որոնք իրենց գործունեության տարիներին ընտրազանգվածի ոչ մի հույս չարդարացրեցին: Այդպիսով, կառավարությանն անվստահության հարցը կտրուկ դրվեց, և, ամենագլխավորը, ոչ թե  խորհրդարանի ներսում, վաղուց իրեն վարկաբեկած համակարգային ընդդիմության կողմից, այլ` Ազատության հրապարակում, տարիներ շարունակ բնակչության թալանը հանդուրժել չցանկացող երիտասարդ սերնդի կողմից:

 Կովկասյան ազնվացեղ եղջերուի պոպուլյացիայի վերականգնման ծրագիրը վճռորոշ փուլ է մտնում: 

Ինչպես ԱրմԻնֆո-ի հետ զրույցում նշել է WWF-Հայաստանի ղեկավար Կարեն Մանվելյանը, արդեն բանակցություններ են տարվում Կովկասյան ազնվացեղ եղջերուի առանձնյակների ձեռքբերման շուրջ: Հազվագյուտ ցեղատեսակը նախատեսվում է Հայաստան բերել Ռուսաստանից, բացառված չէ`Վրաստանից ու Իրանից: Մանվելյանի խոսքով, հունիս-հուլիսին ձեռք կբերվի 15 առանձնյակ:

Գարնանը ՙԴիլիջան՚ ազգային պարկի տարածքում կսկսվի վանդակների կառուցումը`եղջերուների պահման ու բազմացման նպատակով: Ինչպես սպասվում է, Կովկասյան ազնվացեղ եղջերուի առաջին սերունդ բաց կթողնվի 5 տարի անց: Ծրագրի ընդհանուր արժեքը կազմում է շուրջ 500 հազար եվրո:

«ԱրմենՏել» ընկերությունը (ապրանքանիշը Beeline) հայտարարել է «Beeline Scholarship» ծրագրի երկրորդ փուլի մեկնարկի մասին: «Beeline Scholarship» ծրագիրն իրականացվում է Բրիտանական խորհրդի հայաստանյան մասնաճյուղի, ՀՀ ԿԳ նախարարության հետ համատեղ և նպատակ ունի աջակցել Հայաստանի պետական ԲՈՒՀ-երի վճարովի համակարգում սովորող ուսանողներին:

ՎՏԲ-Հայաստան Բանկը «ՆԱՍԴԱՔ ՕԷՄԷՔՍ Արմենիա» ֆոնդային բորսայի կողմից  արժանացել է «Բորսայի լավագույն անդամ արտարժույթի շուկայում» կոչմանը` առաջ անցնելով իր մրցակիցներից:

WWF փրկած որբ արջի քոթոթը բնակություն է հաստատել Շիկահողի արգելոցում: Հիշեցնենք, որ ծուռթաթը մարդկանց մոտ էր եկել 2012 թվականին: Գերմանացի գործընկերների աջակցությամբ Վայրի բնության համաշխարհային հիմնադրամի (WWF) Հայաստանի ներկայացուցչությունը Մաշա արջուկի համար ժամանակավոր ապաստան էր կառուցել և վարձել անասնաբույժի: 8 ամիս պահելով քոթոթին` նախորդ տարվա հուլիսի սկզբին Մաշային ազատ էին արձակել` նախապես հագցնելով ռադիովզնոց:

Հունվարի 21-ին ՀՀ պաշտպանության նախարար Սեյրան Օհանյանը «ԻԴԵԱե բարեգործական հիմնադրամի հիմնադիր, բարերար Ռուբեն Վարդանյանի ուղեկցությամբ այցելել է Երևանի Ջոն Կիրակոսյանի անվան թիվ 20 դպրոց, հանդիպել դպրոցի ուսուցչական կազմի և աշակերտների հետ:

Այցելությանը մասնակցել են նաև ՀՀ պաշտպանության նախարարի առաջին տեղակալ Դավիթ Տոնոյանը, ՀՀ պաշտպանության նախարարի խորհրդական, գեներալ-լեյտենանտ Մուրազ Սարգսյանը, բարձրաստիճան այլ զինվորականներ:
Սեյրան Օհանյանը և Ռուբեն Վարդանյանը եղել են ՀՀ պաշտպանության նախարարության օժանդակությամբ դպրոցում ստեղծված վիրտուալ հրաձգարանում, ռազմամարզական և խաղային հրապարակներում, ինչպես նաև նախնական զինվորական պատրաստության կաբինետում, որը կրում է դպրոցի շրջանավարտ, Արցախյան պատերազմի հերոս Դավիթ Սարապյանի անունը: Հյուրերը հետևել են դպրոցի աշակերտների միջև վիրտուալ հրաձգարանում կազմակերպված մրցույթին: Աշակերտները հյուրերի համար նաև Հայոց բանակին նվիրված երաժշտական ներկայացում էին պատրաստել: Ներկայացման ավարտին ներկաները մեկ րոպե լռությամբ հարգել են հունվարի 19-ի լույս 20-ի գիշերը հակառակորդի դիվերսիոն խմբի հետ մարտի ժամանակ արիաբար զոհված կրտսեր սերժանտ Արմեն Հովհաննիսյանի հիշատակը:

ՙԴիրքում կանգնած, ինը հոգուց բաղկացած հասարակ ստորաբաժանումը հետ է մղել Ադրբեջանի հատուկ նշանակության ստորաբաժանման երկու խմբերի` շուրջ 30 հոգու: Մի՞թե սա հերոսություն չէ՚,- որոշ մանրամասներ ներկայացնելով դիվերսիոն խմբերին ետ շպրտելու գործողության մասին` ընդգծել է Սեյրան Օհանյանը:

 Հայաստանի երկրորդ նախագահ Ռոբերտ Քոչարյանի և ներկայիս վարչապետ Տիգրան Սարգվսյանի վիրտուալ պատերազմը լուրջ չէ, հետևաբար, արժանի չէ հանրության ուշադրությանը: Այդ մասին հունվարի 21-ին մամուլի ասուլիսում հայտարարել է ԱԻՄ առաջնորդ Պարույր Հայրիկյանը:

 Հայաստանի երկրորդ նախագահ Ռոբերտ Քոչարյանի հայտարարությունները ՙՕրինաց երկիր՚ կուսակցությունը դիտարկում է որպես մեծ քաղաքականություն վերադարձի հայտ, այսօր մամուլի ասուլիսի ժամանակ այդպիսի կարծիք է հայտնել ՕԵԿ փոխնախագահ Մհեր Շահգելդյանը:

Ըստ որում, պատգամավորը նշել է, որ ոչ ոքի համար գաղտնիք չէ, որ Հայաստանի երկրորդ նախագահը ՙԲարգավաճ Հայաստան՚ և ՀՅԴ կուսակցություններից որոք քաղաքական գործիչների աջակցությունն է ապահովել իր համար:

Շահգելդյանը նշել է, որ ՀՀ երկրորդ նախագահի մատնանշած խնդիրները եղել են նաև նրա օրոք, դրանք կան այսօր էլ, բայց ջանադիր աշխատանքի դեպքում հնարավոր կլինի դրանք վերացնել:

Պատասխանելով այն հարցին, թե ինչպես է նա տեսնում Հայաստանի ամենագլխավոր խնդրի`արտագաղթի լուծումը, ՕԵԿ ներկայացուցիչը նշել է, որ արտագաղթի կրճատման ամենակարևոր մեխանիզմն աշխատատեղերի ստեղծումն է, և այդ ուղղությամբ արդեն տեղաշարժեր են զգացվում: Նրա համոզմամբ, Մաքսային միությանն անդամակցելու Հայաստանի որոշումը ևս կնպաստի դրան, քանի որ լրացուցիչ ներդրումներ կներգրավի և միաժամանակ թույլ կտա ավելացնել աշխատատեղերը: 

 ՄՄ-ին Հայաստանի անդամակցության հետ կապված ցանկացած հարցեր մանրամասն քննարկվելու է և բոլոր որոշումներն ընդունվելու են միջազգային իրավունքին համապատասխան: Ինչպես հաղորդում է Trend-ը, այդ մասին Բաքվում հայտարարել է Ադրբեջանում Բելառուսի դեսպան Նիկոլայ Պացկևիչը:

ՙԵթե Մաքսային միությանը Հայաստանի անդամակցության հետ կապված ինչ որ խնդիրներ առաջանան, դրանք անպայման բազմակողմանիորեն կքննարկվեն, իսկ որոշումներ ընդունվելիս հաշվի կառնվեն Մաքսային միության անդամ բոլոր երկրների պաշտոնական դիրքորոշումները՚,- ասել է դիվանագետը:

Մաքսային միությունն ստեղծվել է ՌԴ նախագահ Պուտինի նախաձեռնությամբ Եվրասիական տնտեսական համագործակցության շրջանակում` որպես Բելառուսի, Ղազախստանի և Ռուսաստանի առևտրատնտեսական ինտեգրման ձև, որը նախատեսում է միասնական մաքսային տարածություն: Ընդ որում մաքսային միության մասնակից երկրները կիրառում են միասնական մաքսային սակագին և երրորդ երկրների հետ առևտրի կարգավորման այլ միասնական միջոցներ:

 Հայաստանի և Ադրբեջանի արտգործնախարարների հերթական հանդիպումը տեղի կունենա հունվարի 24-ին Փարիզում: Այդ մասին հաղորդում է ԱՊԱ-ն`վկայակոչելով դիվանագիտական աղբյուրը: Հանդիպումը տեղի կունենա` ԵԱՀԿ Մինսկի խմբի համանախագահների մասնակցությամբ:

Հիշեցնենք, որ երկու երկրների նախարարների հերթական հանդիպման վերաբերյալ պայմանավորվածություն ձեռք էր բերվել ԵԱՀԿ ՄԽ համանախագահների`անցած տարվա դեկտեմբերին տարածաշրջան այցի շրջանակներում: Միջնորդներն իրենց հայտարարության մեջ հաղորդել են նաև այս տարվա առաջին կեսին նախագահների հերթական հանդիպում անցկացնելու ծրագրերի մասին: