Մինչև տարեվերջ Հայաստանում կընդունվի Մեծամորի ԱԷԿ շահագործման ժամկետների երկարաձգման ծրագիր: Այդ մասին մայիսի 23-ին հաղորդել է էներգետիկայի և բնական պաշարների փոխնախարար Արեգ Գալստյանը` ՙԻնտեր ՌԱՕ ԵԷՍ՚ ԲԲԸ գլխավոր ինժեներների հինգերորդ տեխնիկական սեմինարի ընթացքում:

Նրա ասելով, ծրագիրը մշակվում է ՙՌոսատոմի՚ մասնագետների հետ համատեղ, որոնց հետ այդ հարցի շուրջ բանակցությունները, գործնականում, ավարտվել են: Միաժամանակ, ամենաուշը 10 տարում նախատեսվում է կառուցել նոր միջուկային բլոկ` 1000 մեգավատ հզորությամբ ռուսական ռեակտորով: Ընդ որում նախատեսվում է, որ ՙմիջուկային կղզին՚ կլինի լովին ռուսական, իսկ ՙտուրբինային կղզին՚ և մյուս համակարգերը ` մրցութային հիմունքով: Ռուսական կողմը ներդրումների տեսքով կֆինանսավորի ՙմիջուկային կղզու՚ իր մասը: Ինչ վերաբերում է Հայաստանի կողմից համաֆինանսավորմանը, ապա, ինչպես ափսոսանքով փաստել է փոխնախարարը, երկրի պետական բյուջեում համապատասխամ միջոցներ չկան: Այդ առնչությամբ նախատեսվում է նախագծի հայկական մասում ներգրավել այլ ներդրողների, որոնց հետ բանակցություններն առայժմ ոչնչի չեն հանգեցրել: Այդուհանդերձ, ռուսական կողմը պատրաստ է սուվերեն երաշխիքների դիմաց Հայաստանին վարկային ռեսուրսներ տրամադրել: Մինչդեռ, ինչպես նշել է Գալստյանը, ժամանակն արդեն սուղ է: ՙ2014 թվականը կլինի կրիտիկական, որի ընթացքում անհրաժեշտ է որոշակի քայլեր ձեռնարկել բլոկի կառուցման ուղղությամբ՚, - ընդգծել է փոխնախարարը:

Հիշեցնենք, որ Հայաստանի էներգետիկայի և բնական պաշարների նախարարության տվյալներով, ՀԱԷԿ 1000 ՄՎտ հզորության նոր բլոկի կառուցման նախագծի արժեքը կարող է կազմել շուրջ 5 մլրդ դոլար: Նախագծի համար արտասահմանյան կապիտալ ներգրավելու նպատակով 2006 թվականին Հայաստանի խորհրդարանը վերացրել է միջուկային էներգաբլոկների սեփականատիրության իրավունքի պետական մենաշնորհը:

Կառավարող վարչախումբն անհիմն պատճառաբանություններով ամեն կերպ խուսափում է Արմավիրի մարզում տեղացած կարկուտից տուժած 10 գյուղերի բնակիչներին համարժեք փոխհատուցում տալու անհրաժեշտ քայլեր ձեռնարկելուց: Այդ մասին ասվում է ընդդիմադիր ՙՆախախորհրդարան՚ հասարակական նախաձեռնության` ԱրմԻնֆո գործակալությանը տրամադրված հայտարարությունում:

ՙԱյս հանգամանքը ևս մեկ անգամ փաստում է վարչախմբի ապիկարությունը և յուրային ժողովրդի, մասնավորապես՝ գյուղացու հոգսերի նկատմամբ պատասխանատվության բացակայությունը: Ավելին՝ ըստ ամենայնի, վարչախմբի անգործության հետևանքով ժողովուրդը մատնվում է լրացուցիչ աղքատության և դրդվում օր առաջ լքելու Հայրենիքը:

Նախախորհրդարանը ողջունում է Արմավիրի մարզի 10 գյուղերի ընբոստ բնակիչների քաղաքացիական անհնազանդության դրսևորումները և գտնում, որ ներկա ապազգային կառավարման պայմաններում միայն ինքնակազմակերպման նման միջոցներով կարելի է հասնել սեփական շահերի պաշտպանությանը:
Ողջունելով Արմավիրի մարզի բնակիչների պայքարը, անհրաժեշտ ենք համարում նշել, որ հետևանքների դեմ պայքարելուն զուգընթաց, անհրաժեշտ է աշխատել նաև դրանց բուն պատճառները վերացնելու ուղղությամբ: Միայն միասնական ճակատ կազմելով մենք կարող ենք վերացնել մեր ժողովրդի բոլոր դժբախտությունների ու տառապանքների պատճառը՝ Հայաստանի նորգաղութային վիճակն ու դրա գործիքի վերածված կառավարման համակարգը: Ուստի ընդհանրական շահը պահանջում է անձնական ու հատվածական պայքարի առուներն ուղղել դեպի ազգային ազատագրական պայքարի գետի, այն է նոր որակի պետության ստեղծման հունը՚, - ասվում է հայտարարության տեքստում:

 Իրանի նկատմամբ ԱՄՆ և միջազգային  հանրության կողմից սահմանված պատժամիջոցներն էական են, մայիսի 22-ին լրագրողներին հայտարարել է Հայաստանում ԱՄՆ դեսպան Ջոն Հեֆերնը, պատասխանելով այն հարցին, թե արդյոք իրանական գազի գինը բարձր է միջազգային պատժամիջոցների պատճառով:

Ինչպես նշել է դիվանագետը, քանի որ Իրանը չի դրսևորում  միջուկային զենքի արտադրությունից հրաժարվելու մտադրություն և  հարգանք միջազգային պարտավորությունների նկատմամբ, այդ պատժամիւոցները կշարունակվեն: ՙՀայաստանը, որպես ՄԱԿ անդամ, հարգում է այդ պատժամիջոցները, և մենք ողջունում ենք այդ դիրքորոշումը՚, - հայտարարել է դեսպանը:

Հիշեցնենք, որ մայիսի 22-ին ԱՄՆ Կոնգրեսը կքննարկի Իրանի նկատմամբ նոր պատժամիջոցներ: ՙԻրանի արտահանման նկատմամբ էմբարգոյի մասին ակտ՚ նոր օրինագիծը արգելք է նախատեսում ԻԻՀ կառավարության սեփականություն հանդիսացող և դրա կողմից վերահսկվող որևէ ընկերության ապրանքների և ծառայությունների ձեռք բերման նկատմամբ: Փաստաթուղթը նաև շրափակում է Իրանի կառավարության հետ կապված ընկերությունների բոլոր ակտիվները և արգելում նրանց ապահովագրական ծառայություններ մատուցել: Օրինագիծն ուղղված է ոչ միայն իսլամական հանրապետության, այլև այն օտարերկրյա ընկերությունների դեմ, որոնք գործեր են վարում այդ երկրի հետ: Դրա հիմնական նպատակը Իրանի ղեկավարության նկատմամբ ճնշման ուժեղացումն է, որպեսզի նրան ստիպեն կատարել միջազգային պարտավորությունները և հրաժարվել միջուկային զենք ստանալու փորձերից:

 Երևանի առևտրային բանկերից ԱրմԻնֆո գործակալությանը տրամադրված տվյալների համաձայն, տարադրամի փոխանակման բանկային կետերում
այսօր ԱՄՆ 1 դոլարի առքի առավելագույն գինը կազմել է 416,5 դրամ 1 դոլարի դիմաց, եվրոյի առքի առավելագույն գինը` 535,5 դրամ 1 եվրոյի դիմաց, իսկ ռուսական ռուբլու առքի գինը`13,2 դրամ 1 ռուբլու դիմաց: ԱՄՆ դոլարի վաճառքի նվազագույն գինը կազմել է 416,5 դրամ 1 դոլարի դիմաց, եվրոյի վաճառքի գինը կազմել է 538,5 դրամ 1 եվրոյի դիմաց, իսկ ռուսական ռուբլու վաճառքի գինը`13,3 դրամ 1 ռուբլու դիմաց:

 ԱՄՆ  ներգրավված չէ գազի գնի  շուրջ Հայաստանի և Ռուսաստանի միջև բանակցային գործընթացում, սակայն, հաշվի առնելով լայն հասարակական հակազդեցությունը, Միացյալ Նահանգները հանդես է գալիս առաջիկա գործարքի թափանցիկության օգտին: Այդ մասին մայիսի 22-ին լրագրողներին հայտարարել է Հայաստանում ԱՄՆ արտակարգ և լիազոր դեսպան Ջոն Հեֆերնը:

Այդ համատեքստում դիվանագետը չափազանց կարևոր է համարել էներգիայի աղբյուրների դիվերսիֆիկացումը, որպեսզի գների աճի դեպքում գնային մեծ տատանումներ չդիտվեն: Դիվանագետը Հայաստանի իշխանություններին կոչ է արել ավելի գործուն կերպով օգտագործել վերականգնվող էներգետիկան, ինչը կհանգեցնի էներգիայի աղբյուրների դիվերսիֆիկացման և էներգետիկ անվտանգության աճի:

Անդրադառնալով գների մոտալուտ աճը 30 տոկոսով սուբսիդավորելու ՀՀ կառավարության մտադրությանը` դեսպանն ընդգծել է, որ այդ հարցի վերաբերյալ գործադիր իշխանությունը պետք է որոշում կայացնի օրենսդիրների և ողջ ժողովրդի հետ համատեղ: Նա խուսափել է պատասխանել այն հարցին, թե արդյոք բնական վառելիքի գների սպասվող աճը Ռուսաստանի կողմից ճնշում է Հայաստանի նկատմամբ: ՙՀայաստանն ու Ռուսաստանը գործընկերներ են՚, -  հիշեցրել է դիվանագետը:

Առևտրային տեսանկյունից ռուսական գազը Հայաստանի համար իրանականից ավելի շահավետ է: Այդ մասին մայիսի 22-ին լրագրողներին հայտարարել է էներգետիկայի և բնական պաշարների նախարար Արմեն Մովսիսյանը` մեկնաբանելով ռուսական գազի թանկացման առնչությամբ վերջինի նկատմամբ իրանական գազի այլընտրանքին առնչվող հարցը:

Նրա ասելով, Իրան-Հայաստան գազամուղը կառուցվել է ֆորս-մաժորային իրավիճակներում դեպի Հայաստան հուսալի և կայուն գազամատակարում ապահովելու համար, այլ ոչ թե հանրապետության գազի լայն պահանջարկի ապահովման համար: Նա հիշեցրել է, որ Հայաստանն իրանական գազի դիմաց վճարում է էլեկտրաէներգիայի մատակարարումներով` 1 խմ գազի դիմաց 3 կՎտ/ժ էլեկտրաէներգիայի հաշվարկով, և այն չի կարող ծառայել ավելի լայն առևտրային օգտագործման համար: ՙԻրան-Հայաստան գազամուղը կառուցվել է էլեկտրաէներգիայի մատակարարումների սահմանափակ քանակությամբ բարտերի համար: Մենք չունենք այնպիսի էլեկտրաէներգետիկ հզորություններ, ժամանակակից և արդյունավետ էլեկտրակայաններ և հաղորդման գծեր, որպեսզի բարտերի ճանապարհով կարողանանք ծածկել Հայաստանում գազի ողջ պահանջարկը: Ուստի, առևտրային տեսանկյունից, իրանական գազը չի կարող ռուսականից ավելի շահավետ լինել: Բացի այդ, Իրանն այսօր գազ է վաճառում ավելի բարձր գներով, քան Հայաստանին առաջարկում է ՙԳազպրոմը՚, - ասել է նախարարը: Հիշեցնենք, որ 2012 թվականին Հայաստանը  բնական գազի ներմուծումն Իրանից ավելացրել է 6 տոկոսով` մինչև 488.3 մլն խմ` 2011 թվականի 460 մլն խմ դիմաց: 2010 թվականին հանրապետություն է առաքվել 400 մլն խմ իրանական գազ: Իրանից բնական գազ է ստանում Երևանի ՋԷԿ-ը` 1 խմ գազ 3 կՎտ/ժամ էլեկտրաէներգիայի դիմաց: Պայմանագրին համապատասխան, Իրանը կարող է Հայաստան առաքել տարեկան մինչև 1,1 մլրդ խմ գազ (օրական 3 մլն խմ), իսկ 2014 թվականից` մինչև 2,3 մլրդ խմ: Նախատեսվում էր, որ էլեկտրաէներգիայի ավելցուկը Հայաստանը կսկսի մատակարարել հարևան Վրաստան և Թուրքիա, սակայն այդ երկրներ արտահանում չի իրականացվում: Ընդհանուր առմամբ, 2012 թվականին Հայաստան է առաքվել 2455.5 մլն խմ գազ` 2011  թվականի 2069.10 մլն խմ դիմաց: Ռուսաստանից բնական գազի մատակարարումները 2012 թվականին կազմել են 1967.2 մլն խմ` 2011 թվականի 1609.06 մլն խմ դիմաց: Գազի մի մասը մատակարարվում է Աբովյանի ստորգետնյա գազապահեստարանից, իսկ մյուս մասը ստացվում է սեփական կարիքների համար: Նշենք, որ Հայաստանի մենաշնորհային գազամատակարարը ՙՀայՌուսգազարդ՚ ՓԲԸ-ն է, որի բաժնետոմսերի 80 տոկոսը պատկանում է ՙԳազպրոմ՚ ԲԲԸ-ին, իսկ 20 տոկոսը` Հայաստանի կառավարությանը: Ելնելով Հայաստանի համար գազի ներմուծման գինը 1000 խմ դիմաց 180 դոլարից մինչև 270 դոլար բարձրացնելու ՙԳազպրոմի՚ առաջարկությունից` օրերս ՙՀայՌուսգազարդը՚ Հայաստանի հանրային ծառայությունները կարգավորող հանձնաժողով հայտ է ներկայացրել բնակչության համար գազի գինը 67,4 տոկոսով` ներկայիս 132 հազար դրամից մինչև 221 դրամ, իսկ խոշոր սպառողների համար 61,3 տոկոսով` 243 դոլարից մինչև 392 դոլար բարձրացնելու վերաբերյալ:

 Կոպիտ հաշվարկներով, Հայաստանում գազի գնի մոտալուտ բարձրացումը կհանգեցնի էլեկտրաէներգիայի գնի միջին հաշվով 30 տոկոս բարձրացման: Այդ մասին հայտարարել է էներգետիկայի և բնական պաշարների նախարար Արմեն Մովսիսյանը նախօրեին ՙՇանթ՚ հեռուստաալիքով հեռարձակված հարցազրույցում:

Նրա ասելով, գազի բաղադրիչն էական է էլեկտրաէներգիայի ինքնարժեքում, և այդ պատճառով գների աճն անխուսափելի է, քանի որ հանրապետությունում էլեկտրաէներգիայի արտադրության 42 տոկոսը բաժին է ընկնում ՋԷԿ-երին: Այժմ առավել ճշգրիտ հաշվարկներով զբաղվում է կարգավորող մարմինը, և վերջնական գինը կհայտարարվի` ելնելով գազի գնի փոփոխությունից, ասել է նախարարը: Մովսիսյանը նշել է, որ Հայաստանի վերջնական սպառողների համար էլեկտրաէներգիայի գինը բավականին երկար ժամանակ չի փոխվել, չնայած վառելիքի, նյութերի, սարքավորումների գների աճին, արժույթի փոխարժեքի տատանումներին և այլ գործոններին: Նա ավելացրել է, թե գազի գնի աճը բնակչության համար սպասվում է մինչև 20 տոկոսով, իսկ բիզնեսի համար` մինչև 15 տոկոսով, թեև գազի շուրջ բանակցությունները ՙԳազպրոմ՚ ԲԲԸ հետ դեռ շարունակվկում են, և աճը կարող է լինել ավելի զուսպ:

Եվրամիությունը Հայաստանի հետ երկկողմ հարաբերություններում երբեք նախապայմաններ չի դրել, կապված երրորդ կողմի հետ հարաբերությունների հետ: Այս մասին այսօր ԵՄ տեղեկատվական կենտրոնում լրագրողների հետ հանդիպմանը հայտարարել է Հայաստանում, Եվրամիության պատվիրակության ղեկավար Տրայան Հրիստեան։

Նա նշել է, որ այսօր Հայաստանը և ԵՄ–ն այժմ բանակցություններ են վարում Ասոցացման մասին համաձայնագրի շուրջ, որի բաղադրիչը ՙԽորը և համապարփակ ազատ առևտրի գոտու մասին՚ համաձայնագիրն է, որն այնուհետ հիմք կծառայի Հայաստանի և Եվրոպայի հետագա քաղաքական և տնտեսական ինտեգրման համար։ ՙՅուրաքանչյուր կողմը, սեփական շահերից ելնելով, ինքն է ընտրում իր ինտեգրացիոն քաղաքականությունը՚,-ընդգծել է Հրիստեան: Նա հավելել է, որ ներկայումս պաշտոնական Երևանը և Բրյուսելը բանակցում են տարբեր ոլորտներում ավելի սերտ համագործակցության ուղղությամբ, և այս առումով դեսպանը նկատել է, որ երբ խոսքը գնում է եվրաինտեգրման մասին, ապա ենթադրվում է դրա ոչ միայն քաղաքական, այլ նաև տնտեսական բաղադրիչը:

Միևնույն ժամանակ նա հայտարարել է, որ ՙԱրևելյան գործընկերության՚ 6 երկրներից յուրաքանչյուրի հետ Եվրամիության հարաբարություններն անհատական են և ոչ մի կերպ չեն կարող անդրադառնալ երրորդ կողմի հետ հարաբերությունների վրա: ՙՅուրաքանչյուր երկիր ինքնուրույն է ընտրում համագործակցության մակարդակը ԵՄ հետ, մեկը գերադասում է ավելի ակտիվ համագործակցությունը, մյուսը` ավելի պասիվ համագործակցությունը: Պատահական չէ, որ մեր կազմակերպոթյունն իր քաղաքականությունն իրականացնում է ելնելով ՙավելին հանուն ավելիի՚ սկզբունքից՚,-ընդգծել է դիվանագետը:

Մեկնաբանելով շրջանառվող լուրերն այն մասին, որ եթե Հայաստանը հրաժարվի միանալ Եվրասիական միությանը, ապա կբախվի որոշակի տնտեսական պրոբլեմների, օրինակ, գազի գների թանկացման տեսքով, Հրիստեան ընդգծել է, որ եթե խոսքը գնում է այն մասին, որ պաշտոնական Երևանը որոշակի տնտեսական դաշտում գործունեություն ծավալելու նպատակով պետք է հետևի որոշակի կանոնների, ապա ինքը պետք է կողմնորոշվի, ուժ կունենա՞ արդյոք իրականացնել իր գործունեությունը երկու տարբեր միջազգային կառույցներում: Նա նաև նշել է, որ ԵՄ երբեք Հայաստանի առջև չի դրել ընտրության հարցը` կամ ԵՄ, կամ Եվրասիական միության հետ: Պատասխանելով լրագրողների այն հարցին, որ Ռուսաստանի գազի գների թանկացման վնասները կարող են փոխհատուցվել ԵՄ կողմից, Հրիստեան նշել է, որ ԵՄ երբեք նման սխեմաներ չի կիրառել, անգամ Եվրամիության անդամ-երկրների համար, լինելով ազատական արժեքների կողմնակիցը: Դեսպանը հավելել է նաև, որ Հայաստանը, ստորագրելով ՙԽորը և համապարփակ ազատ առևտրի գոտու մասին՚ համաձայնագիրը, հնարավորություն կստանա օգտվել ԵՄ հիմնադիր սկզբունքների 3 և 4 կետերից, որոնք, մասնավորապես, ենթադրում են` ապրանքների, ծառայությունների ու կապիտալի ազատ տեղաշարժ, իսկ ինչ վերաբերվում է 4-րդ սկզբունքին, կապված մարդկանց ազատ տեղաշարժի հետ, ապա առայժմ այն մատչելի է միայն Եվրամիության անդամ-երկրներին:

 Ամերիաբանկը ՓՄՁ ոլորտին առաջարկում է նոր վարկային փաթեթ` ՙՊարզ և արագ՚: Ինչպես այսօր կայացած մամուլի ասուլիսում նշել է Ամերիաբանկի Տնօրինության անդամ, մանրածախ բանկինգի տնօրեն Արման Բարսեղյանը, մայիսի 15-ին մեկնարկել է բանկի մարկետինգյին գործընթացը, որի շրջանակներում ՓՄՁ սուբյեկտներին (ներառյալ մանրածախ առևտրի) առաջարկվում է վարկեր` 5-50 մլն.դրամին համարժեք դոլարով և Եվրոյով:

Այս վարկային պրոդուկտի առավելությունը կայանում է նրանում, որ այն տրամադրվում է առանձ որևէ կոմիսիա գանձելու: Գրավի գնահատումը և դրա ապահովագրությունը կատարվում է բանկի հաշվին: Վարկառուին տրամադրվում է միջազգային VISA/MC Business/Gold վարկային քարտ, առանց լրացուցիչ գրավի, ընդ որում, քարտերը կարող են տրամադրվել տվյալ ընկերության ղեկավարության երեք ներկայացուցիչներին: Դրանից բացի, վարկը հաստատվում է 2 օրում, որի համար պահանջվում են նվազագույն քանակի փաստաթղթեր:

Միևնույն ժամանակ, մայիսի 2-ից բանկը գործարկում է ՙԲերեք և վաստակեք՚ քաջալերող ծրագիրը, որը նախատեսված է այն անձանց համար, ովքեր ՙՊարզ և արագ՚ վարկ ստանալու նպատակով Ամերիաբանկ կներգրավեն ՓՄՁ ապագա սուբյեկտների: Ցանկացած անձ համապատասխան անվճար արժեկտրոն ձեռք բերելու նպատակով կարող է դիմել բանկ, որը հետագայում փոխանցվում է ՓՄՁ ներգրավվող սուբյեկտին: Իսկ եթե վերջինը, դիմելով բանկ, ստանում է ՙՊարզ և արագ՚ վարկը, ապա վարկառուին ներգրավող անձի համար բացվում է անհասցե մետաղական հաշիվ: Ընդ որում, եթե վարկը տրամադրվում է 5-12 մլն դրամի սահմաններում (կամ համարժեք ԱՄՆ դոլար/եվրո), ապա ներգրավող անձը պարգեւատրվում 1 գրամ ոսկիով, իսկ 12-50 մլն դրամ վարկի դեպքում` 2 գրամ ոսկիով: Ակցիան գործում է մինչև հունիսի 28-ը:

Ըստ ԱրմԻնֆո գործակալության` Հայաստանի բանկերի ֆինանսական վարկանիշի, վարկային ներդրումների ծավալով Ամերիաբանկը 2013 թվականի առաջին եռամսյակում գտնվում է Հայաստանի առաջատար բանկերի եռյակում, մեծացնելով այս ցուցանիշը տարեկան կտրվածքով 18.5%, իսկ միայն եռամսյակում` 10%, մինչև 168,3 մլրդ դրամ: Բանկի վարկային պորտֆելի կազմում ՓՄՁ բաժինը կազմել է մոտ 15%, կամ 24.6 մլրդ դրամ, տարեկան աճը` 8%, իսկ եռամսյակի աճը` 15.2%: Այս ցուցանիշով բանկը գտնվում է լավագույն տասնյակում:

Նշենք, որ ՙԱմերիաբանկ՚ ՓԲԸ - ն հանդիսանում է ունիվերսալ բանկ, տրամադրելով ներդրումային, կորպորատիվ և մանրածախ բանկային ծառայություններ բանկային լուծումների համալիր փաթեթի տեսքով: Բանկի մաժորիտար բաժնետերն է Ամերիա Խումբը` 99.99%% Բանկն ունի 9 մասնաճյուղ, որոնցից հինգը գտնվում են Երևանում, և մեկական մասնաճյուղ Քաջարանում, Դիլիջանում, Վանաձորում և ԼՂՀ-ում:

 Ամերիաբանկը գործարկել է նոր ՙԱմերիա՚ ավանդատեսակը: Այսօր կայացած մամուլի ասուլիսում այս մասին հայտարարել է Ամերիաբանկի Տնօրինության անդամ, մանրածախ բանկինգի տնօրեն Արման Բարսեղյանը:

Բանկը ներդրել է բոլորովին նոր և յուրահատուկ ավանդատեսակ, որն արմատապես տարբերվում է շուկայում գործող մյուս ավանդային առաջարկներից՚, - ասել է Ա. Բարսեղյանը: Ընդ որում, նա պարզաբանել է, որ ՙԱմերիա՚ ավանդը ներդրողին թույլ է տալիս բազային տոկոսադրույքի հիման վրա ինքնուրույն ՙԿառուցել՚ իրեն հարմար ավանդատեսակը, այսինքն, իր հայեցողությամբ ցանկացած ժամանակ փակել կամ համալրել իր ավանդային հաշիվը: Կախված հաճախորդի ընտրությունից, բանկը սահմանում է որոշակի տոկոսադրույքը: Ավանդը կարող է լինել ցանկացած արժույթով, ցանկացած մարման ժամկետով: Բացի այդ, բանկը բարձրացրել է դրամային ավանդների տարեկան տոկոսադրույքը, ազգային արժույթով խնայողությունների աճը խթանելու նպատակով:

Բանկի նորամուծությունների թվում Ա.Բարսեղյանը նշել է նաև, որ բանկում ավանդներ ունեցող հաճախորդների համար այդ միջոցների գրավադրման միջոցով կարող է բացվել վարկային գիծ, ավանդի գումարի մինչև 30%-ի չափով: Այդ վարկից ներդրողը կարող է օգտվել վարկային քարտի միջոցով: Ընդ որում, վարկային գիծը բացվում է այն արժույթով, որով ներգրավվել է ավանդը:

Ըստ ԱրմԻնֆո գործակալության` Հայաստանի բանկերի ֆինանսական վարկանիշի, 2013 թվականի առաջին եռամսյակում տվյալներով բանկը պարտավորությունների ծավալով Հայաստանի բանկային համակարգում զբաղեցնում է առաջին դիրքը, տարեկան կտրվածքով աճելով 66.7%, միայն եռամսյակում` 30%, մինչև 270,7 մլրդ դրամ: Բանկի ժամկետային ավանդների ծավալը ապրիլի 1 – ին գերազանցել է 90.2 մլրդ դրամը, կամ ընդհանուր պարտավորությունների 34.3% - ը, տարեկան կտրվածքով աճելով 30%: ՙԱմերիաբանկ՚ ՓԲԸ - ն հանդիսանում է ունիվերսալ բանկ, տրամադրելով ներդրումային, կորպորատիվ և մանրածախ բանկային ծառայություններ բանկային լուծումների համալիր փաթեթի տեսքով: Բանկի մաժորիտար բաժնետերն է Ամերիա Խումբը` 99.99%% Բանկն ունի 9 մասնաճյուղ, որոնցից հինգը գտնվում են Երևանում, և մեկական մասնաճյուղ Քաջարանում, Դիլիջանում, Վանաձորում և ԼՂՀ-ում:

 ԵԱՀԿ ՄԽ շրջանակներում Հայաստանի և Ադրբեջանի նախագահների հանդիպումը տվյալ պահին իրատեսական չէ, այսօր մամլո ասուլիսի ժամանակ հայտարարել է Կովկասի ինստիտուտի փոխտնօրեն, քաղաքագետ Սերգեյ Մինասյանը:

Հիմնավորելով իր կարծիքը`քաղաքագետը գտնում է, որ ոճրագործ Ռամիլ Սաֆարովի հետ կապված միջադեպից հետո երկու երկրների նախագահները խոսելու բան չունեն, առավել ևս, որ իրենք միանգամայն տարբեր հայացքներ ունեն ղարաբաղյան հակամարտության կարգավորման խնդրի առնչությամբ:

Միաժամանակ Մինասյանը կասկած է հայտնել որևէ փաստաթուղթ ստորագրելու նպատակով հակամարտող կողմերի վրա միջազգային կառույցների ճնշման առկայության առնչությամբ:
Հակամարտության գոտում լարվածության պահպանումը ռացիոնալ մոտեցում է պաշտոնական Բաքվի համար, որը փորձում է լարվածությունը որպես վերջին ռեսուրս օգտագործել`ինչպես Հայաստանի, այնպես էլ միջազգային հանրության նկատմամբ: Հետևաբար, գտնում է նա, եթե հնարավոր չէ բանակցություններ վարել հանրագումարային փաստաթղթի կամ շփման գծից դիպուկահարների հեռացման վերաբերյալ միջանկյալ փաստաթղթի շուրջ, հարց է առաջանում`ինչի՞ մասին պետք է խոսեն երկու նախագահները և ինչի՞ շուրջ պետք է ընթանա բանակցային գործընթացը: Փորձագետը գտնում է, որ ԵԱՀԿ ՄԽ շրջանակներում Հայաստանի և Ադրբեջանի ԱԳՆ ղեկավարների մակարդակով հանդիպումները ֆորմալ բնույթ են կրում, քանի որ դրանք ապարդյուն են և բանակցային գործընթացի առաջմղմանը չեն նպաստում:

 Հակակարկտային կայանները Հայաստանում խիստ անարդյունավետ են. դրանք անօգտակար էին վերջերս Արագածոտնի և Արմավիրի մարզերում ցանքատարածությունները ոչնչացրած ուժեղ կարկուտի հանդեպ, այսօր մամլո ասուլիսի ժամանակ այդպիսի կարծիք է հայտնել Հայաստանի արարագյուղացիական միության ղեկավար Հրաչ Բերբերյանը:

Փորձագետը հայտարարել է, որ ժամանակին Արգենտինայից այդ կայանների մատակարարումների հակառակորդներից մեկն է եղել: Նրա խոսքով, այդ թնդանոթները նախատեսված են հատուկ ացետիլենային նյութով աշխատելու համար: ՙԻսկ մեզ մոտ
ացետիլենի թանկության պատճառով, այն փոխարինվել է պրոպան-բութանով, ինչն զգալիորեն նվազեցրել է կայանի արդյունավետությունը: Հակակարկտային կայանների շահագործման հետ կապված երկրորդ խնդիրն այն է, որ դրանք տեղադրվել են ընտրողաբար` ծանոթությամբ կամ ՙվերևից զանգով՚՚,- նշել է Բերբերյանը:

Միության ղեկավարն առաջարկել է հակակարկտային կայանները փոխարինել հատուկ հակակարտային ցանցերով, որոնցով ծածկվում են ցանքատարածությունները, և դրանց թվում ամենաամուրը, որակյալը և հուսալին իտալական արտադրության են: ՙԴրանք թե համեմատաբար էժան են, թե’ շատ ավելի հուսալի՚,- ընդգծել է Բերբերյանը:

Հիշեցնենք, որ մայիսի 12-ին ուժեղ կարկտահարության հետևանքով տուժել են Արմավիրի և Արագածոտնի մարզի երեք քաղաքների և շուրջ 20 գյուղերի ցանքատարածությունները: Վնասի չափը, նախնական գնահատականների համաձայն, կազմել է $35-40 մլն:

Ադրբեջանում սանձազերծված տեղեկատվական արշավը, նույնիսկ ԱՀ ՄՄ կողմից անհամարժեք օրինագծի վերաբերյալ տեղեկատվության հերքումից հետո, առաջվա պես ավելի շատ հարցեր է հարուցում, քան` պատասխաններ տալիս: ԱրմԻնֆո-ին այդպիսի կարծիք է հայտնել ՙՌեգիոն՚ հետազոտական կենտրոնի ղեկավար Լաուրա Բաղդասարյանը:

Մայիսի 20-ին ԱՀ Միլլի մեջլիսի մամուլի ծառայությունը հերքել է նախորդ շաբաթ մի շարք կառավարամետ ԶԼՄ-ների կողմից տարածված հաղորդումները, որոնցում վկայակոչվում էր նույնիսկ ՙԱդրբեջանի օկուպացված տարածքների մասին՚ օրինագծի տեքստը: Օրինագիծը քրեական պատիժ էր նախատեսում հասարակական կազմակերպությունների և այլ կառույցների, ինչպես նաև Ադրբեջանի առանձին քաղաքացիների նկատմամբ` ՙմինչև օկուպացված տարածքների ազատագրումը՚ Հայաստանի հետ համագործակցության համար:

ՙԱմեն դեպքում մենք մտադիր ենք շարունակել մեր աշխատանքը նույն ձևով, ինչպես այն իրականացվել է նախկինում: Մենք նաև մտադիր ենք անցկացնել առցանց հարցազրույցներ միջազգային փորձագետների հետ, այդ թվում` նաև այդ հարցի շուրջ, խնդրելով մեկնաբանել այդ իրավիճակը, դրա առաջացման հնարավոր պատճառները: Շատ ափսոս կլիներ խաչ քաշել վերջին տարիներին մեր ծրագրերի շրջանակներում ողջ կատարվածի վրա, իսկ արվել է շատ բան: Միայն այն, որ հայերն ու ադրբեջանցիները հանդիպում են, շփվում և մեկը մյուսի մեջ տեսնում մարդկանց, այլ ոչ թե գազանների, շատ բան արժե: Եվ ճիշտ չէր լինի արգելաձող դնել մեր երկու ժողովուրդների միջև փոխըմբռնման հասնելու ճանապարհին՚, - նկատել է Բաղդասարյանը:

ՙՌեգիոն՚ հետազոտական կենտրոնը և Ադրբեջանի խաղաղության ու ժողովրդավարության ինստիտուտը Հայաստանում և Ադրբեջանում Մեծ Բրիտանիայի դեսպանությունների աջակցությամբ արդի հրատապ հարցերի շուրջ տարբեր երկրների առաջատար փորձագետների հետ համատեղ առցանց մամուլի ասուլիսներ  է կազմակերպում  Հայաստանի և Ադրբեջանի ԶԼՄ-ների համար: Հարցազրույցներ են կազմակերպվում ՙՄիմյանց մասին հայերի և ադրբեջանցիների գիտելիքների ընդլայնում և փոխվստահության հաստատում առաջին ձեռքից տեղեկատվության միջոցով՚ նախագծի շրջանակում:

Բաղդասարյանի կարծիքով, նման օրենքի ընդունումն ուժգին հարված կհասցներ երկու երկրների հասարակությունների շրջանում իրականացվող բոլոր նախագծերին, քանի որ հայերի հետ շփման համար քրեական պատասխանատվությունը կարող է չափազանց վախեցնել ադրբեջանցիներին` հոգեբանորեն: Այդ համատեքստում փորձագետն անհամարժեք է համարում նման օրինագիծը, որը հակասում է Հայաստանի և Ադրբեջանի հասարակությունների շահերին:

Ֆինանսների նախարարությունը հերքում է մամուլում տարածված տեղեկատվությունը, թե ՀՀ ֆինանսների նախարար Դավիթ Սարգսյանը պաշտոնական գրություն է ուղարկել գերատեսչություններին՝ պահանջելով կրճատել մամուլի բաժանորդագրությունը: Ինչպես ասվում է ՀՀ ֆինանսների նախարարության տեղեկատվության և հասարակայնության հետ կապերի բաժնից ԱրմԻնֆո գործակալությանը տրամադրված հաղորդագրության մեջ, վերը նշված տեղեկատվությունը ՙորևէ առնչություն չունի իրականության հետ՚: ՙՊաշտոնապես հայտնում ենք, որ  ՀՀ ֆինանսների նախարարությունը նման գրություն գերատեսչություններին չի ուղարկել՚, - ասվում է հաղորդագրության մեջ:

 Եթե ՀՀ կառավարության նախորդ ծրագիրը կենացների ժողովածու էր, ապա ներկայիս ծրագրի մասին կարելի է միայն մեկ բան ասել`կենացները քաղցրանում են: Այդ մասին մայիսի 21-ին խորհրդարանում հայտարարել է ՀՀ ԱԺ պատգամավոր Ալեքսանդր  Արզումանյանը:

Նա նշել է, որ ներկայիս ծրագրում ուրախացնում է մեկ բան. ըստ երևույթին, այն  խմբագրել է մեկ մարդ, քանի որ վառ արտահայտված հակասություններ դրանում չկան: Արզումանյանը նշել է, որ չնայած դրական տարրերի առկայությանը`ծրագիրը նախընտրական է: Այստեղ ավելի շատ էմոցիաներ են, քան տրամաբանություն՚,- հայտարարել է Արզումանյանը`ավելացնելով, որ երեկ խոսվել է հասարակության գիտակցության մեջ հեղափոխություն կատարելու մտադրության մասին: ՙԲայց դուք միսիոներ չեք, որ եկել եք հասարակությանը լուսավորելու, այնպես որ` սկսեք ձեզանից՚,- նշել է ընդդիմադիր գործիչը:

Նա ընդգծել է, որ ծրագրում նշվում ենք նպատակները, բայց չեն նշվում, թե ինչպես դրանք պետք է ձեռքբերվեն, ինչ ցուցանիշներ պետք է սպասել որոշակի ժամանակաշրջանի ավարտից հետո: ՙՊետության գործառույթների մեջ չպետք է մտնի աշխատատեղերի ստեղծումը, խորհրդային ժամանակներում նույնպես ստեղծվել են աշխատատեղեր, բոլորն աշխատանք ունեին, բայց ի՞նչ ստացանք արդյունքում՚,- հայտարարել է նա`նշելով, որ աշխատատեղերի, նոր ձեռնարկությունների ստեղծումը պետք է կարգավորվի շուկայով: ՙԵկեք պարզենք, թե որ ոլորտներում են գործում մոնոպոլիաները, հեռացնենք դրանք վիրահատական ճանապարհով, և շուկան կսկսի աշխատել՚,- հայտարարել է Արզումանյանը:

Արզումանյանի զարմանքն են հարուցել նաև ծրագրի`արտաքին քաղաքական նպատակների վերաբերյալ դրույթները: ՙԱյստեղ կան բոլորը`թե’ ԱՊՀ-ն, թե’ ՀԱՊԿ-ն, բայց, չգիտես ինչու, չկա ՆԱՏՕ-ն: Եթե նշվում է ֆրանկոֆոնիայի կազմակերության մասին, ապա արժեր և ՆԱՏՕ-ն նշել՚,--ասել է Արզումանյանը: Բացի այդ, նշել է Արզումանյանը, ծրագրում նշվում է, որ Հայաստանը ջանք կգործադրի ցեղասպանությունների կանխարգելման և միջազգային ճանաչման ուղղությամբ: ՙԴա նշվում է մի երկրի կառավարության ծրագրում, որտեղ մերժվել է պոնտացի հույների ցեղասպանության ճանաչման նախաձեռնությունը, երկրի, որը, Հայոց ցեղասպանությունից բացի, որևէ ցեղասպանություն չի ճանաչել՚,-ընդգծել է Արզումանյանը:

 ՀԱԿ խմբակցությունը չի կարող քվեարկել Հայաստանի այն կառավարության ծրագրի նախագծի օգտին, որն իր խոստումներից ոչ մեկը չի կատարել, այսօր ՀՀ Աժ-ում հայտարարել է ՀԱԿ խմբակցության քարտուղար Արամ Մանուկյանը:

Նրա խոսքով, անցած տարիների ընթացքում կառավարությունը խոստացել է վերջ դնել մոնոպոլիաներին, հարկային դաշտ բերել օլիգարխներին, ապահովել մրցակցություն շուկայում, բայց ոչինչ չի արվել: Նա նշել է, որ այսօր Հայաստանում որևէ մարդ չի գտնվի, ով չվկայի այն մասին, որ կառավարող կուսակցությունն ուղղակի գնում է ձայներն ընտրություններում, և այդ պատճառով ընտրությունների արդյունքները ՙկառավարության գործունեության գնահատականը համարել չի կարելի՚: Անդրադառնալով ռուսական գազի սակագների բարձրացմանը`նա նշել է, որ դա ՙքաղաքական հարց՚ է, և Ռուսաստանի կողմից Հայաստանի չընտրված իշխանությունների լեգիտիմացման դիմաց գին: Մանուկյանը նաև ընդգծել է, որ ծրագրի ընդունումը կհանգեցնի կամ ըմբոստացման, կամ քաղաքացիների արտագաղթի տեմպերի ակտիվացման:

ՀԱԿ խմբակցության անդամ Ստեփան Դեմիրճյանն իր հերթին նշել է, որ մտադիր է դեմ քվեարկել, քանի որ ՙկարևոր է ոչ միայն ծրագրի բովանդակությունը, այլ նաև այն, թե ով է այդ ծրագիրն իրականացնելու՚: Նա հիշեցրել է, որ ծրագրի հիմնական թիրախներն են`աղքատության, արտագաղթի, գործազրկության կրճատումը, բայց այս խոստումները տալիս է կառավարությունը, որի գործունեության տարիներին բոլոր հիշյալ ցուցանիշները միայն ավելացել են:

 Այն ժամանակ, երբ վերջին հինգ տարիներին Հայաստանը լքել է մոտ քառորդ միլիոն մարդ, իսկ դրա հետ մեկտեղ նշել, իբր ապահովվել է տնտեսության 6% աճ, կառավարության նախորդ ծրագրի հաջողության մասին խոսելն անիմաստ է: Այս մասին, մեկնաբանելով կառավարության 2013-2017 թվականների ծրագիրը, հատարարել է Հայաստանի նախկին վարչապետ Հրանտ Բագրատյանը:

Նրա խոսքերով, իրականում Հայաստանի բյուջեի եկամտային մասի ոչ մի աճ էլ չկա: Կարող է թվալ, որ 600 մլրդ.դրամն ավելացել է մինչև 1 տրլն.դրամ, բայց երբ համադրում ենք վերջին թիվը հարկային վարչարարության և ինֆլյացիայի հետ, ապա պարզվում է, որ բյուջեն ոչ մի աճ էլ չի ապահովել: ՙԻ՞նչ է նշանակում հարկային վարչարարության բարձրացման անհրաժեշտության մասին դրույթը: Այդ գործընթացը պետք է լինի մշտական, ցանկացած կառավարությնա պարագայում և ցանկացած երկրում՚,-նշել է Բագրատյանը, հավելելով, որ այդ կետը չի կարող լինել ծրագրային թեզ: ՙԻսկ ի՞նչ ասել 7 միլիոնանոց սփյուռքի մասին, որն ապահովում է դեպի երկիր ներդրումների հիմնական հոսքը, որոնց մասին կառավարությնա ծրագրում ոչինչ չի ասվում: Սակայն, սփյուռքի կողմից ներդրվող առնվազն 3-4 մլրդ.դոլարը պետք է ուղղվի տնտեսության զարգացմանը՚,-գտնում է Բագրատյանը, գործադիր իշխանությանը կոչ անելով կարգավորել օդանավակայանի և քաղաքացիական ավիացիայի հետ կապված պրոբլեմը, ինչը թույլ կտա ներգրավել լրացուցիչ 5 մլրդ,դոլարի ներդրումներ: ՙԿարող եք ընդհանրապես ոչինչ չանել, միայն լուծեք այս հարցը և պետբյուջեի հարցը կլուծվի՚ հայտարարել է նախկին վարչապետը, ով զարմացած է այն հայտարարությամբ, որ առողջապահությունը, պարզվում է, նախատեսվբած է երկրի քաղաքացիների համար: ՙԻսկ ո՞վ դա չգիտի: Բոլորս էլ գիտենք՚,-նշել է Բագրատյանը, վարչապետ Տիգրան Սարգսյանին կոչ անելով ուշադրությունը սևեռել Ազգային վիճակագրկան ծառայությունում տիրող իրավիճակին: Նրա խոսքերով, հանրապետությունում ֆիզիկապես անհնար է արտադրել 241 հազ.տոննա խաղող և 812 հազ.տոննա բանջարեղեն: Նախկին վարչապետը գործադիր իշխանությանը կոչ է արել նստել համակարգչի դիմաց և դիտել, թե ինչ է եղել և ինչպիսի թվեր են նկարվում: ՙԹվերը չափազանցված են ավելի քան 3 անգամ՚,-նշել է Բագրատյանը, կառավարությանը և անձամբ վարչապետին կոչ անելով ՙերկնքից իջնել ցած՚ և խոսել իրական արդյունքներից:

Հիշեցնենք, որ 2013-2017 թվականներին ՀՀ կառավարոթյունը նախատեսում է ապահովել ՀՆԱ-ի 5-7% աճ: Բացի այդ, նախատեսվում է ներմուծման համեմատ ապահովել արտահանման աճի առաջադեմ տեմպեր, կրկնապատկել նվազագույն աշխատավարձը, ապահովել բնակչության ծնելության մինչև 1.8 աճ: Կառավարությունը մտադիր է նաև 5-6 տարեկան երեխաների 90%-ի համար ապահովել նախադպրոցական կրթություն, բարձրացնել միջին աշխատանքային ¥ապահովագրական¤ կենսաթոշակի չափը, հասցնելով այն աղքատության շեմի 125%-ին, աղքատությունը կրճատել 8-10 տոկոսային կետով, ինչպես նաև ստեղծել ավելի քան 100 հազ.աշխատատեղ:

 Հնարավոր է, որ Հայաստան ներկրվող գազի սակագնի սուբսիդավորումը կարող է տեղի ունենալ ռուսական դրամաշնորհների հաշվին: Այս մասին այսօր Երևանում կայացած մամուլի ասուլիսում հայտարարել է Հայաստանի Հանրապետական կուսակցության անդամ, տնտեսագետ Վարդան Այվազյանը:

ՙՄայիսի 23-ին ՀՀ խորհրդարանում տեղի ունեցան լսումներ, այն մասին, թե որքանով է գազի սակագների բարձրացումը համարժեք և անհրաժեշտ: Սակայն, Ռուսաստանի հետ գազի սակագների շուրջ բանակցություններից բացի անհրաժեշտ է համապատասխան ճնշումներ գործադրել նաև Հայաստանի Հանրային ծառայությունները կարգավորող հանձնաժողովի, ինչպես նաև ՙՀայՌուսգազարդ՚ ընկերության վրա՚,-հայտարարել է նա:

Պատգամավորը իրոնիայով ընդգծել է, որ Մոսկվայի կողմից Երևանի վրա տեղի ունեցող քաղաքական ճնշումների մասին խոսակցութոյւններն անհիմն են, իսկ եթե, այնուամենայնիվ, ռուսական կողմը նման գործողութոյւններով փորձում է ազդել Հայաստանի վրա, ապա անհրաժեշտ է բարձրացնել Հայաստանի տարածքում ռուսական ռազմական բազաների տեղակայման հարցը: ՙՍա տնտեսական հարց է և դրա լուծման համար անհրաժեշտ է ապահովել Հայաստանի քաղաքացիների վճարունակությունը՚,-նշել է նա:

 Հայաստանում սահմանափակվում են կրոնական ազատությունները: Այս մասին է նշվում ԱՄն Պետդեպարտամենտի` 2012 թվականին կրոնական ազատությունների վերաբերյալ զեկույցում, որը հրապարակվել է նախօրեին:

ՙՀայաստանի Սահմանադրությունը երաշխավորում է կրոնի ազատություն, և անցյալ տարի այդ ազատությունների ոտնահարման էական դեպքեր չեն արձանագրվել, սակայն որոշ օրենքներ և իրականացված քայլեր դրանք սահմանափակում են՚,-ընդգծում է Պետդեպը:

Զեկույցում նշվում է նաև, որ օրենքը Հայ Առաքելական Եկեղեցուն տրամադրում է արտոնություններ, ինչից զրկված են մյուս կրոնական խմբերը: Պաշտոնապես գրանցված կրոնական խմբերի մեծ մասն իրենց գործունեության ընթացքում չեն բխվել լուրջ պրոբլեմների, բայց, ինչպես ասված է զեկույցում, ՙԵհովայի վկաներ՚ կազմակերպության 31 ներկայացուցիչ մինչ օրս գտնվում է բանտում` պարտադիր կամ այլընտրանքային զինվորական ծառայությունից խուսափելու համար:

Նշված է նաև, որ կրոնական փոքրամասնությունների ներկայացուցիչներ որոշ դեպքերում արժանանում են հանրության խտրական և անհանդուրժողական վերաբերմունքին, ինչը նկատվում է նաև աշխատավայրերում, իսկ լրատվմիջոցները հաճախ կողմնակալ վերաբերմունք են ցուցաբերում այդ խմբերի նկատմամբ: ՙԱՄՆ կառավարությունը Հայաստանի իշխանություններին առաջարկում է ընդունել այլընտրանքային ծառայության մասին նոր օրենք, որը կհամապատասխանի միջազգային ստանդարտներին՚,-նշվում է զեկույցում:

 Երևանի առևտրային բանկերից ԱրմԻնֆո գործակալությանը տրամադրված տվյալների համաձայն, տարադրամի փոխանակման բանկային կետերում
այսօր ԱՄՆ 1 դոլարի առքի առավելագույն գինը կազմել է 416,5 դրամ 1 դոլարի դիմաց, եվրոյի առքի առավելագույն գինը` 536 դրամ 1 եվրոյի դիմաց, իսկ ռուսական ռուբլու առքի գինը`13,3 դրամ 1 ռուբլու դիմաց: ԱՄՆ դոլարի վաճառքի նվազագույն գինը կազմել է 417,8 դրամ 1 դոլարի դիմաց, եվրոյի վաճառքի գինը կազմել է 539 դրամ 1 եվրոյի դիմաց, իսկ ռուսական ռուբլու վաճառքի գինը`13,5 դրամ 1 ռուբլու դիմաց: