ՀՀ երկրորդ նախագահ Ռոբերտ Քոչարյանի գրասենյակի ղեկավար Վիկտոր Սողոմոնյանը մեկնաբանել է ՌԴ դատախազության կողմից կոռուպցիոն գործի հետաքննման մասին լուրը, որում իբր հիշատակվում է երկրորդ նախագահի անունը:

Իր մեկնաբանության մեջ Սողոմոնյանը հիմարություն է անվանել նման հրապարակումները: Նրա կարծիքով, դա հավասարազոր է այն բանին, որ ՀՀ որևէ քաղաքացի դիմի ՀՀ դատախազությանը՝ պահանջելով գործ հարուցել որևէ այլ պետության նախկին նախագահի, ասենք՝ Ջորջ Բուշի դեմ, hետո, երբ նրան փոստով կառաքեն ստացման հաստատումը, հայտարարի, թե Բուշի գործը քննվում է ՀՀ դատախազությունում:

ՙԵթե դրանից այդ քաղաքացին եզրակացություն անի, թե Բուշի գործը քննվում է Գլխավոր դատախազությունում, ապա նա պետք է շտապ հոգեբույժի դիմի: Ցավոք, նույնը վերաբերվում է այն սակավաթիվ լրագրողներին և քաղաքական գործիչներին, որոնք ամենայն լրջությամբ վերլուծում են այս լուրը ու հանգում "ցնցող" եզրակացությունների: Հասկանալի է, որ Ռոբերտ Քոչարյանի դեմ այսպես կոչված "կոմպրոմատի" երկար տարիներ տևող անարդյունք փնտրտուքը ստիպում է ոմանց պրիմիտիվ հնարքներ բանեցնել ու նման տխմարություններ հորինել՚- ասվում է Սողոմոնյանի մեկնաբանության մեջ:

Ավելի վաղ հայկական ԶԼՄ-ները, վկայակոչելով է ՌԴ նախագահի աշխատակազմից ստացված նամակը՝ ստորագրված ընդունարանի պաշտոնյայի՝ Տ. Օվչիննիկովայի կողմից, հաղորդել էին, որ  Ռուսաստանի Դաշնության գլխավոր դատախազության վարույթում հայտնվել է մի գործ, որը կապ ունի Ռոբերտ Քոչարյանի անվան հետ։ Սա տեղի է ունեցել այն բանից հետո, երբ ՙԿոռուպցիայի դեմ պայքարի հասարակական խորհրդի՚ հասարակայնության հետ կապերի պատասխանատու Մարինա Գալյուչենկոն նամակ էր հղել Վլադիմիր Պուտինին՝ տեղեկացնելով, թե իրենց մոտ Հայաստանից հայտնվել են փաստաթղթեր, որոնցում ներկայացված են փաստեր խոշոր բիսզնեսում ՀՀ նախկին նախագահ Ռոբերտ Քոչարյանի մասնակցության վերաբերյալ։ Ըստ որում, խոսքը վերաբերում է այն ժամանակաշրջանին, երբ նա դեռ նախագահի պաշտոնում էր:

Օրերս ադրբեջանական ԶԼՄ-ները տեղեկություն տարածեցին Ադրբեջանի կողմից Ռուսաստանից նոր ռազմամթերք և ռազմական տեխնիկա գնելու վերաբերյալ բոլոր բանակցությունները դադարեցնելու մասին: Նման տեղեկության հայտնվելը կարող էր, սկզբունքայնորեն, դիտվել որպես օրինաչափություն, հաշվի առնելով վերջերս Մոսկվայի հրաժարվելը Գաբալայի ՌԼՍ-ի վարձակալությունից` Բաքվի կողմից նախկին 7 մլն.դոլարի փոխարեն 300 մլն.դոլար պահանջելու պատճառով: Սակայն, երբ միաժամանակ եվրոպական արտադրողների կողմից Հարավային Կովկասի երկրներին զենք վաճառելու պայմանների մեղմացման վերաբերյալ ադրբեջանական  լրատվամիջոցներում մեկ այլ տեղեկություն հայտնվեց, ապա այս տեղեկությունն սկսեց ուժգնորեն ձեռք բերել նպատակաուղղված լցոնի հատկանիշներ:

Ըստ Բաքվի աղբյուրների, Ադրբեջանը հրաժարվեց գնել ռուսական արտադրության նոր փրկարար ուղղաթիռներ, Տ-90Ս տանկեր և ԲՄՌՏ զրահատեխնիկա, ինչպես նաև զենիթահրթիռային համալիրներ: Նշենք, որ միայն վերջին 5 տարիներին Ադրբեջանը Ռուսաստանին պատվիրել էր 1.7 մլրդ.դոլարի ռազմական տեխնիկա: Հաշվի առնելով այն առանձնահատուկ զգայունությունը, որով Մոսկվան արձագանզում է ռազմատեխնիկական համագործակցության թեմային վերաբերվող ցանկացած թեմայի, ապա հարվածը, սկզբունքայնորեն, տեղի էր ունեցել ճիշտ ուղղությամբ: Բաքվում հաստատ չեն սխալվել, որ անգամ ռուսական նոր ռազմական տեխնիկայից հրաժրվելու դեպքում էլ խորհրդային տեխնիկան Ադրբեջանը կշարունակի օգտագործել, և դրանից հեռու չես փախչի: Հետևաբար, Բաքվի ստրատեգները, որոնք փորձում էին Մոսկվայից ստանալ որոշակի զիջումներ, հատկապես ղարաբաղյան կարգավորման հարցում, այսպես թե այնպես, դատապարտված չեն այն գնել Ռուսաստանից, թեկուզ պահեստամասերը: Եվ դա քաջ գիտակցում են ՙՌոսօբօրանէքսպորտում՚:

Ստացվում է, որ ադրբեջանական լրատվամիջոցները, հասկանալով այս ամենը, տարածեցին նաև երկրորդ տեղեկությունը, որի համաձայն 2013 թվականին Ֆրանսիան, Իտալիան, Իսպանիան, Շվեդիան, Դանիան, Հոլանդիան, Լեհաստանը և Խորվաթիա մեղմացրեցին Հարավային Կովկասի երկրներին զենք վաճառելու նկատմամբ խոչընդոտները: Մասնավորապես, նշվում է, որ նախկինում դեպի Հարավային Կովկաս զենքի մատակարարումն իրականացնում էին Ֆինլանդիան, Շվեյցարիան, Սերբիան, Հունաստանը, Բուլղարիան, Չեխիան, Ռումինիան, Սլովակիան և Հունգարիան: Իսկ Մեծ Բրիտանիան, Նորվեգիան և Գերմանիան միանշանակ հայտարարում էին, որ Հարավային Կովկասին զենք չեն մատակարարելու մինչև տեղական հակամարտությունները չավարտվեն: Ընդ որում, նման անսպասելի ՙմեղմացումների՚ պատճառներն ադրբեջանական լրատվամիջոցները չեն պարզաբանում:

Նշենք, որ իր նավթային եկամուտների շնորհիվ Ադրբեջանը պաշտպանությանն ուղղված իր էքպոնենցիալ ծախսերը 2003 թվականին 160 մլն.դոլարից 2013 թվականին հասցրեց 3.6 մլրդ.դոլարի: Ըստ Ստոկհոլմի խաղաղության պրոբլեմների հետազոտությունների միջազգային ինստիտուտի տվյալների, միայն անցյալ տարի Ադրբեջանի ռազմական ծախսերը կազմել են ավելի, քան աշխարհի որև երկրում, մեծացնելով այն 88%-ով: Այսպիսով, դժվար չէ պատկերացնել, թե Հարավային Կովկասի երկրներից որ մեկի համար, հանկարծ, եվրոպական երկրները որոշեցին ՙմեղմացնել՚ զենքի գնման պայմանները: Վերոնշյալ երկու տեղեկությունների համադրման և վերլուծության միջոցով կարելի է գալ եզրակացության, որ Բաքուն կացնային իր  դիվանագիտության լավագույն ավանդույթներով հերթական անգամ որոշեց Մոսկվային ցուցադրել ՙՌոսօբօրոնէքսպորտին՚ պատվերներից զրկելու իր ցանկությունը: Եվ եթե անգամ երկու տեղեկություններն էլ համապատասխանում են իրականությանը, ինչում կարելի է և կասկածել, ապա Ալիևի շրջապատի կողմից Մոսկվայի նկատմամբ ճնշումներ գործադրելու ցանկությունն ակնհայտ է: Եվ տվյալ պարագայում ռուսական պատասխանի բովանդակությունն ուղղակիորեն կախված կլինի այն բանից, թե ով կպատասխանի` այսպես կոչված ՙդերժավնիկները՚, որոնք ցանկացած կերպ փորձում են պահպանել Ռուսաստանի աշխարհաքաղաքական շահերը Կովկասյան լեռնաշղթայի մյուս կողմում, թե ՙսերդյուկովները՚, որոնք պատրաստ են այդ շահերը վաճառել ալիևյան մի քանի զույգ միլիոնների կամ սև խավիարի դիմաց: Առաջին դեպքում Ալիևին կհիշեցնեն 2011 թվականին Կազանում դրսևորած չխոսկանությունը, ինչպես նաև Արևմուտքի հետ ՙխաղեր տալը՚, հյուսիսային և հարավային սահմանների հետ կապված պրոբլեմները, և ամենագլխավորը` Ռուսաստանին շրջանցելով էներգակիրները վաճառելու անթաքույց ցանկությունը: Երկրորդ դեպքում ՙպրոբլեմը կկարգավորվի երկկողմ շահերի պահպանման հիման վրա՚, ռուսական շահերի համար բխող բոլոր հետևանքներով:

Այնուամենայնիվ, ամեն դեպքում, որպես կանոն, սուրբ տեղը դատարկ չի մնում: Եվ Բաքվին, որը ռազմական համագործակցություն է իրականացնում ՆԱՏՕ-ի անդամ 12 երկրների, ինչպես նաև`Պակիստանի, Խորվաթիայի, Կոլումբիայի, Ղազախստանի, Չինաստանի, Ուզբեկստանի, Կորեայի, Իսրայելի, Ավստրիայի, Ուկրաինայի, Կատարի և Բահրեյնի հետ, ըստ էության, ոչինչ չի խանգարում ռազմական հարաբերություններն դեպի այդ երկրներ վերակողմնորոշելու համար: Եվ այն, որ մինչ այսօր Ադրբեջանի դինաստիական ռեժիմը նման քայլի չի գնացել, շատ բանի մասին է վկայում, և առաջին հերթին`իր, ինչպես նաև Ադրբեջանի խոցելիության, որին եվրոպացի փորձագետներից մեկը դիպուկ կերպով բնորոշել է որպես կավե ոտներով հսկա: Եվ իրավիճակի նրբանկատությունը հասկանալով`Բաքվին այլ բան չի մնում, քան խաղալ Ռուսաստանի հետ ԶԼՄ-ների միջոցով, որոնք ակնհայտ կեղծ տեղեկատվություն են տարածում, ինչը լիովին տեղավորվում է ալիևյան քարոզչամեքենայի լավագույն ավանդույթներում:

ԱրմԻնֆո գործակալության կողմից Երևանի բանկերից ստացված տվյալների համաձայն, տարադրամի փոխանակման բանկային կետերում այսօր ԱՄՆ դոլարի առքի առավելագույն գինը 1 դոլարի դիմաց կազմել է 410 դրամ, ԵՎՐՈ-ի առքի առավելագույն գինը`5350 դրամ, իսկ ռուսական ռուբլու առքի գինը`13.1 դրամ: ԱՄՆ դոլարի վաճառքի նվազագույն գինը կազմել է 412 դրամ, ԵՎՐՈ-ի վաճառքի գինը` 537 դրամ, իսկ ռուսական ռուբլու վաճառքի գինը`13.2 դրամ:

ՀՀ ոստիկանության պետ Վլադիմիր Գասպարյանը, հիմք ընդունելով ծառայական քննության արդյունքները, որոշում է կայացրել կարգապահական տույժի ենթարկել հանրային միջոցառման ժամանակ իր պարտականություններում թերացած ոստիկանության տվյալ ծառայողին՝ նրան հայտարարվել է նկատողություն, նրա անմիջական ղեկավարին՝ խիստ նկատողություն, իսկ ոստիկանության ՆորՆորքի բաժնի պետի ծառայության գծով տեղակալը ազատվել է զբաղեցրած պաշտոնից:

Արդեն տեղեկացրել ենք, որ ապրիլի 23-ին Երևանի Նոր Նորքի 8-րդ զանգվածում Երևանի ավագանու ընտրությունների քարոզարշավի ընթացքում www.ilur.am լրատվական կայքի թղթակցի մասնագիտական պարտականությունները խոչընդոտելու վերաբերյալ ոստիկանության Նոր Նորքի բաժնում հետաքննություն է կատարվում: Տեղի ունեցածի վերաբերյալ մի հրապարակման մեջ նշվել էր, որ միջադեպի վայրում ծառայություն կատարող ոստիկանը չի միջամտել, չի փորձել կանխել միջադեպը: Հրապարակման առնչությամբ ոստիկանության Երևան քաղաքի վարչության պետ Աշոտ Կարապետյանի կողմից նշանակվել է ծառայական քննություն, որի արդյունքները զեկուցվել են ՀՀ ոստիկանության պետ Վլադիմիր Գասպարյանին:

Նշենք, որ ապրիլի 23-ին Հայ Ազգային Կոնգրեսը հայտարարություն էր տարածել, որտեղ նշվում էր, որ ապրիլի 23-ին, քաղաքապետ Տարոն Մարգարյանի կողմից Նոր-Նորք համայնքում իրականացված քարոզարշավի ընթացքում հանդիպման կազմակերպիչ, մայրաքաղաքի ավագանու անդամ Արամ Պապյանը խոչընդոտել է լրագրող Հակոբ Կարապետյանի աշխատանքներին, քանի որ նա հանդիսացել է ընդդիմադիր ԶԼՄ-ների ներկայացուցիչ: Պապյանն ու նրա կողմնակիցները լրագրողից վերցրել են նրա ֆոտոխցիկը և ջնջել նկարված նյութերը, որից հետո նրան ծեծի են ենթարկել, լրագրողին պատճառելով տարբեր աստիճանի մարմնական վնասվածքներ: Միջադեպին ներկա են եղել ոստիկանության աշխատակիցները, որոնք չեն միջամտել:

 Հայաստանի հանրապետական կուսակցությունում հերքել են ՙերիտասարդ՚ և ՙհին՚ հանրապետականների միջև հասունացող հակասությունների մասին ԶԼՄ-ներում շրջանառվող լուրերը, ինչի առիթ է իբր հանդիսացել քաղաքապետի թեկնածու Տարոն Մարգարյանի նախընտրական շտաբի ղեկավարումը ՀՀԿ նոր սերնդի, մասնավորապես` ՀՀ Ազգային ժողովի փոխնախագահ Էդուարդ Շարմազանովի կողմից:

ԱրմԻնֆո-ի թղթակցի հետ  զրույցում մեկնաբանելով այս տեղեկատվությունը` ՀՀԿ փոխնախագահ Ռազմիկ Զոհրաբյանն ընդգծել է, որ դա ԶԼՄ-ների հորինվածքն է: Զոհրաբյանը հավաստիացրել է, որ Մարգարյանի նախընտրական շտաբը Շարմազանովի ղեկավարությամբ աշխատում է շատ արդյունավետ, և կուսակցությունում վերջինիս գործունեության առնչությամբ որևէ բողոք չկա: ՀՀԿ փոխնախագահի կարծիքով, բոլոր այդ խոսակցությունները տարածվում են նախընտրական շտաբի ղեկավարությանը և, մասնավորապես, Շարմազանովին նախանձողների կողմից: Ըստ որում, Զոհրաբյանը չի բացառել, որ այդ նախանձողները կարող են նաև կուսակցության ներսում լինել:

Ապրիլի 24-ին Իզմիրում Հայոց ցեղասպանության հիշատակի միջոցառումն առանց միջադեպի չի անցել:

Ինչպես հաղորդում է ՙHaber՚-ը, Հայոց ցեղասպանության հարցում տարբեր տեսակետներ ունեցող խմբերի միջև ծեծկռտուք է տեղի ունեցել: Ոստիկանների ջանքերով բախման հետագա զարգացումը կասեցվել է:

Ամեն ինչ սկսվել է այն բանից, որ ՙԺողովրդի փրկություն՚ կուսակցության տարածաշրջանային ներկայացուցիչը հանդես է եկել հայտարարույթամբ, որում ընդգծել է, որ Ցեղասպանություն չի եղել, և դա ԱՄՆ-ի հորինած սուտն է։

Նույն տարածքում հավաքված մեկ այլ խումբ պատասխանել է այդ հայտարարությանը`ընդգծելով, որ 1915 թ. Հայոց ցեղասպանություն տեղի է ունեցել: Երկու խմբերը միմյանց հասցեին վիրավորական արտահայտություններ են հնչեցրել, այնուհետև ծեծկռտուք է սկսվել՝ բռունցքների և դրոշների փայտերի գործադրմամբ։

Ապրիլի 26-ին Երևանում տեղի կունենա Արմեն Տիգրանյանի ՙԱնուշ՚ օպերայի պրեմիերան:

Ինչպես պատմել է օպերայի բեմադրող և լիբրետոյի ադապտացման հեղինակ Սերժ Ավետիքյանը ապրիլի 25-ին կայացած մամուլի ասուլիսում, նոր ՙԱնուշն՚ զգալիորեն կտարբերվի հանդիսատեսին ծանոթ բեմադրությունից: Այսպես, դրանում գործարկվել է ընդամենը 37 մարդ` ներառյալ երաժիշտները: Բացի այդ,  կոմպոզիտոր Անահիտ Սիմոնյանի գործիքավորման շնորհիվ օպերայում առաջին անգամ կհնչեն հայկական ժողովրդական գործիքներ:

Հետաքրքիր լուծում կլինի այն, որ ներկայացման մեջ ՙՀովեր՚ երգչախմբի մասնակիցները կկատարեն երկրորդական դերեր: Երևանում նորացված ներկայացումը հանդիսատեսին կներկայացվի ապրիլի 26-27-ին և մայիսի 3-4-ին Սունդուկյանի անվան ազգային ակադեմիական թատրոնում: Դրանից հետո ՙԱնուշ՚ օպերան կարող է դիտել նաև ֆրանսիացի հանդիսատեսը. մայիսի 22, 23, 25 և 26 –ին այն կցուցադրվի Նանտեր- Ամանդյե թատրոնի բեմում: Օպերայի դիրիժորը կլինի Հայաստանի կամերային նվագախմբի գեղարվեստական ղեկավար Վահան Մարտիրոսյանը, հագուստների և բեմի ձեւավորումը` Նիկոլա Մյուզենի, լուսային ձևավրման գծով մասնագետ` Ժան Մարկ Սկաչկո: Մենակատարներն են Սոֆյա Սայադյանը (Անուշ), Լիպարիտ Ավետիսյանը (Սարո), Գուրգեն Բավեյանը (Մոսի), Քրիստինե Սահակյանը (Անուշի մայրը) և Լիլիթ Սողոմոնյանը (Սարոյի մայրը):

Օպերային ներկայացումը հայ-ֆրանսիական նախագիծ է, որն իրագործվել է երկու պետությունների մշակույթի նախարարությունների աջակցությամբ: Նախագծի գլխավոր հովանավորն է ՎիվաՍել-ՄՏՍ ընկերությունը:

Երևանի առևտրային բանկերից ԱրմԻնֆո գործակալությանը տրամադրված տվյալների համաձայն, տարադրամի փոխանակման բանկային կետերում  այսօր ԱՄՆ դոլարի առքի առավելագույն գինը կազմել է 412 դրամ 1 դոլարի դիմաց, եվրոյի առքի առավելագույն գինը` 536 դրամ 1 եվրոյի դիմաց, իսկ ռուսական ռուբլու առքի գինը`13,1 դրամ 1 ռուբլու դիմաց: ԱՄՆ դոլարի վաճառքի նվազագույն գինը կազմել է 413,2 դրամ 1 դոլարի դիմաց, եվրոյի վաճառքի գինը կազմել է 540 դրամ 1 եվրոյի դիմաց, իսկ ռուսական ռուբլու վաճառքի գինը`13,2 դրամ 1 ռուբլու դիմաց:

 Մոսկվան տեղաշարժ չի տեսնում Լեռնային Ղարաբաղի հակամարտության կարգավորման գործում, հայտարարել է ՌԴ արտգործնախարար Սերգեյ Լավրովը Հայաստանի իր պաշտոնակից Էդվարդ Նալբանդյանի հետ բանակցությունների արդյունքներն ամփոփող մամուլի ասուլիսում, հաղորդել է Ռուսաստանի ՙՆովոստի՚ լրատվական գործակալությունը:

Հայաստանի արտգործնախարարը համաձայնել է Լավրովի հետ, հավելելով, որ չէր ասի, թե իրավիճակը փակուղում է: ՙԱմենամոտ ժամանակներս նախապատրաստվում է արտգործնախարարների նոր հանդիպում, այն կկայանա մայիսին, արդեն մի քանի օր հետո` Կրակովում: Չի բացառվում նաև բարձրագույն մակարդակի հանդիպումը՚, - նշել է Նալբանդյանը: ՙԱյնպես որ, գործընթացը շարունակվում է, այլ բան է, որ իրոք տեղից չի շարժվում, քանի որ կողմերից մեկը դրսևորում է ոչ կառուցողական դիրքորոշում և, գործնականում, մերժում համանախագահներից բխող բոլոր առաջարկները՚, - նշել է Հայաստանի արտգործնախարարը:

 Թուրքական ԱԳՆ-ը քննադատության է ենթարկել Հայոց ցեղասպանության 98-ամյա տարելիցի առնչությամբ ԱՄՆ նախագահ Բարաք Օբամայի հայտարարությունը: Թուրքիայի արտաքին քաղաքական գերատեսչության հայտարարությունում, մասնավորապես, նշվում է, որ հայերի ու թուրքերի ընդհանուր պատմության դառը էջը ներկայացվել է միակողմանիորեն:

ՙՆերքաղաքական գործընթացների ազդեցության ներքո պատմական վիճահարույց  իրադարձությունների միակողմանի ներկայացման դեպքերը վնասում են թուրք-ամերիկյան հարաբերություններին, ինչպես նաև դժվարացնում հայերի ու թուրքերի հաշտեցման գործընթացը: Կարևոր դաշնակից ԱՄՆ-ից մենք ակնկալում ենք, որ վերջինս հստակ միջոցներ կձեռնարկի խնդրի լուծման համար, ինչպես նաև կստիպի խնդրի գիտական և անաչառ քննարկումից խուսափող հայկական կողմին իրատես լինել՚,- ասվում է Թուրքիայի ԱԳՆ պատասխանում:

Հիշեցնենք, որ ապրիլի 24-ին ԱՄՆ հայ համայնքին ուղղված իր ամենամյա ուղերձում նախագահ Բարաք Օբաման, սովորականի նման, խուսափելով ՙGenocide՚ միջազգային տերմինից, հերթական անգամ 1,5 միլիոն հայերի սպանությունն Օսմանյան կայսրությունում անվանել է ՙՄեծ եղեռն՚: Օբամայի ուղերձում, մասնավորապես, նշվում է, որ Մեծ եղեռնի` 20-րդ դարի ամենասարսափելի վայրագություններից մեկի տարելիցին ԱՄՆ հարգում է 1,5 մլն հայերի հիշատակը, ովքեր գազանաբար սպանվեցին Օսմանյան կայսրության մայրամուտին: ՙՀիշելով այդ ողբերգության զոհերին` մենք միանում ենք միլիոնավոր մարդկանց աշխարհում, ինչպես նաեւ այստեղ` ԱՄՆ-ում, որոնք հարգում են նրանց հիշատակը: Մենք պարտավոր ենք պահպանել հիշողությունն այդ իրադարձությունների զոհերի մասին, որպեսզի պատմության նման մութ էջերն ապագայում չկրկնվեն: Ես բազմիցս հայտարարել եմ 1915-ի դեպքերի վերաբերյալ իմ դիրքորոշման մասին, և իմ կարծիքը չի փոխվել: Փաստերի ամբողջական, անկեղծ եւ արդար ճանաչումը բխում են մեր ընդհանուր շահերից: Այսօր մենք համերաշխություն ենք հայտնում հայ ժողովրդին, հիշելով Մեծ եղեռնի սարսափները, հարգելով զոհերի հիշատակն ու վերստին հաստատելով մեր նվիրվածությունը Հայաստանի ժողովրդին՚, - հայտարարել է ԱՄՆ նախագահը:

 ՀՀ Ոստիկանությունը վերկուսակցական կառույց է, և պետք չէ քաղաքական գործընթացների մեջ ներքաշել, ասվում է Ոստիկանության հայտարարության մեջ`կապված ՙԲարգավաճ Հայաստան՚ կուսակցության առաջնորդ Գագիկ Ծառուկյանի հետ նախօրեին տեղի ունեցած փոքրիկ միջադեպի հետ:

Հիշեցնենք, որ ապրիլի 24-ին Ծիծեռնակաբերդում ՙԲարգավաճ Հայաստան՚ կուսակցության առաջնորդ Գագիկ Ծառուկյանին թույլ չեն տվել իջնել պատգամավորների և կառավարության անդամների համար նախատեսված ճանապարհով: Ծառուկյանը որդու հետ միասին այցելել է հուշահամալիր և ծաղիկներ դրել Անմար կրակին: Սակայն, հուշահամալիրից դուրս գալիս ոստիկանության աշխատակիցները թույլ չեն տվել նրան իջնել պատգամավորների և կառավարության անդամների համար նախատեսված ճանապարհով: ԲՀԿ առաջնորդի այն հարցին, թե ինչու իրեն չի կարելի իջնել այդ ճանապարհով, ոստիկանները նշել են, որ հարկավոր է իջնել ընդհանուր ճանապարհով`ժողովրդի հետ միասին: Նա իջել է ընդհանուր ճանապարհով, բայց ճանապարհի կեսից շրջանցել է ոստիկաններին և շարունակել ճանապարհը պատգամավորների և կառավարության անդամների համար նախատեսված ճանապարհով: Ոստիկանների այս արարքն արժանացել է ԲՀԿ որոշ ներկայացուցիչների քննադատությանը, ովքեր ոստիկանությանը մեղադրել են պրոֆեսիոնալիզմի բացակայության մեջ:

Ոստիկանությունը պատասխան հայտարարության մեջ նշում է, որ լիովին հասկանում է Երևանի Ավագանու խորհրդի նախընտրական փուլի առանձնահատկությունները, բայց, այնուամենայնիվ, ՙբարգավաճներին՚ խորհուրդ է տալիս զերծ մնալ հարցը քաղաքականացնելուց: ՙԻսկ ինչ վերաբերում է ոստիկանության ծառայողներին տրված գնահատականներին, ապա խիստ կասկածում ենք, թե նրանք տիրապետում են համապատասխան մասնագիտական գիտելիքների, որպեսզի գնահատեն ոստիկանության ծառայողի աշխատանքը՚,- ասվում է ոստիկանության հայտարարության մեջ:

 Լեհաստանը չի կարող ճանաչել Լեռնային Ղարաբաղի անկախությունը, քանի դեռ Հայաստանն ինքը չի արել դա, այսօր մամլո ասուլիսի ժամանակ հայտարարել է Հայաստանում Լեհաստանի դեսպան Զդիսլավ Ռաչինսկին:

ՙԼեհաստանը ղարաբաղյան հակամարտության կարգավորման հարցում Եվրամիության դիրքորոշման կողմնակից է և հանդես է գալիս խնդրի`խաղաղ ճանապարհով, ԵԱՀԿ Մինսկի խմբի շրջանակներում կարգավորման օգտին՚,- ընդգծել է դեսպանը: Միաժամանակ նա նշել է, որ չկարգավորված հակամարտությունը բացասաբար է անդրադառնում ինչպես հակամարտող կողմերի, այնպես էլ`ընդհանուր առմամբ տարածաշրջանի վրա:

Ըստ որում, նա համոզմունք է հայտնել, որ Հայաստանը և Ադրբեջանը կկարողանան պայմանավորվածություն ձեռք բերել, և դա տեղի կունենա խաղաղ ճանապարհով: ՙԵրկու երկրները դեռ երկար դարեր պետք է ապրեն կողք կողքի, և պետք է պատրաստ լինեն կարգավորելու հակամարտությունը: Եվ դա անպայման տեղի կունենա խաղաղ ճանապարհով, և լրագրողները, որպես կապող օղակ, պետք է ժողովուրդներին նախապատրաստեն իրավիճակի նման զարգացմանը՚,- ասել է նա:

Խոսելով ԼՂՀ քաղաքացիական ինքնաթիռները խփելու Ադրբեջանի սպառնալիքների մասին`Ռաչինսկին ընդգծել է, որ պաշտոնական մակարդակով նման հայտարարությունների վերաբերյալ տեղեկատվության չի տիրապետում: ՙՈրքանով ինձ հայտնի է, Ադրբեջանը պաշտոնական մակարդակով այդ մասին չի հայտարարել՚,- ասել է դիվանագետը:

Մեկնաբանելով ոճրագործ Ռամիլ Սաֆարովին ազատ արձակելը և նրա հերոսացումը`Ռաչինսկին ընդգծել է, որ Ադրբեջանի այդ գործողությունները տեղին չէին և
միմիայն վնասել են բանակցային գործընթացին:

 Հունաստանի ոստիկանությունը ցրել է Սալոնիկում թուրքական հյուպատոսության առջև Հայոց ցեղասպանության 98-ամյա տարելիցի կապակցությամբ հայկական համայնքի բողոքի ակցիան` պղպեղի աէրոզոլ օգտագործելով: Ինչպես հաղորդում է enetenglish.gr կայքը, ակցիային մասնակցել է շուրջ 250 մարդ: Միջադեպը տեղի է ունեցել, երբ ցուցարարները փորձել են ճեղքել ոստիկանական արգելափակոցը` պահանջելով թույլ տալ դիմումը հանձնել թուրքական հյուպատոսարանի աշխատակիցներին: Նշենք, որ Հունաստանը Հայոց ցեղասպանությունը ճանաչած երկրների թվում է:

Էթիկայի հարցերով խորհրդարանական հանձնաժողովը  ՀՀԿ խմբակցության պատգամավոր Նաիրա Կարապետյանի դեմ բողոք է ստացել Երեւանում Մոսկվայի տան տնօրենից, համանման նամակ է ստացվել նաև ԱԺ խոսնակ Հովիկ Աբրահամյանի անունով:

Նամակում տնօրենը խնդրում է քննարկել պատգամավորի վարքագիծը, ով, բողոքի հեղինակի պնդմամբ, հեռախոսազրույցի ժամանակ իրեն անպատվել է անպարկեշտ արտահայտություններով, խոսել բարձր տոնով ու ագրեսիա է դրսեւորել, վերջում, նույնիսկ, սպառնացել: Մոսկվայի տան տնօրենի կարծիքով, Նաիրա Կարապետյանի վարքագիծը վայել չէ ոչ միայն պատգամավորին, այլև կնոջը` ընդհանրապես:

Հեռախոսազրույցում Նաիրա Կարապետյանը, մասնավորապես, Մոսկվայի տան տնօրենից պահանջել է բաշխել Հայաստանում Ռուսաստանի դեսպանության կողմից աչքի ընկած ուսանողներին, ինչպես նաև գյումրեցի  ուսանողներին տրամադրվող կրթաթոշակները:

ԱՄՆ Կոնգրեսում Հայոց ցեղասպանության 98-րդ տարելիցի առնչությամբ իր ելույթում  Ադամ Շիֆը խոսել է հայերեն:

Նա, մասնավորապես, ընդգծել է, որ խոսում է Թուրքիայի կողմից բնաջնջման ենթարկված ժողովրդի լեզվով, այն մայրերի լեզվով, որոնք մահացան նորածիններն իրենց գրկում, այն փոքրաթիվ փախստականների լեզվով, որոնք փրկվել են թուրքական յաթաղանից և հանգրված գտել ԱՄՆ-ում: ՙԵվ այսօր, այդ ողբերգությունից գրեթե մեկ դար հետո, Թուրքիան դեռ ժխտում է Հայոց ցեղասպանությունը, սակայն ամերիկյան ժողովուրդը միշտ համարձակություն է ունեցել ուղիղ նայելու իրականության աչքերին և իրերն իրենց անուններով կոչելու: Համոզված եմ, որ վաղ թե ուշ ամերիկացիների օրինակին կհետևեն նաև ԱՄՆ իշխանությունները: Այսօր մենք բոլորս հայ ենք՚, - ամփոփել է կոնգրեսականը:

Եվրախորհրդի խորհրդարանական վեհաժողովի 21 պատգամավորներ տարածել են հայտարարություն, որում կազմակերպության անդամ երկրներին կոչ են արել ճանաչել և դատապարտել Հայոց ցեղասպանությունը: ԵԽԽՎ կայքում զետեղված փաստաթղթում, մասնավորապես, նշվում է, որ ցեղասպանությունների ճանաչումը քայլ է, որը խթանում է մարդկային արժանապատվության հանդեպ հարգանքն ու մարդկության դեմ հանցագործությունների կանխարգելումն ապագայում:

ՙՕսմանյան կայսրության կողմից իրագործված Հայոց ցեղասպանությունը հաստատված է մամուլի հրապարակումներով և ականատեսների վկայություններով, համապատասխան օրենքներով, բանաձևերով, ինչպես նաև Միացյալ Ազգերի կազմակերպության, Եվրախորհրդարանի, ԵԽ անդամ պետությունների խորհրդարանների` այդ թվում Շվեդիայի, Լիտվայի, Գերմանիայի, Լեհաստանի, Նիդերլանդների, Սլովակիայի, Շվեյցարիայի, Ֆրանսիայի, Իտալիայի, Հունաստանի, Բելգիայի, Կիպրոսի, Ռուսաստանի Դաշնության, ինչպես նաև ԱՄՆ Ներկայացուցիչների պալատի, ԱՄՆ 43 նահանգների, Չիլիի, Արգենտինայի, Վենեսուելայի, Կանադայի, Ուրուգվայի և Լիբանանի կողմից հրիապարակված հայտարարություններով: ԵԽԽՎ անդամ բոլոր պետություններին կոչ ենք անում անհրաժեշտ քայլեր ձեռնարկել Օսմանյան կայսրությունում հայերի և այլ քրիստոնյա փոքրամասնությունների նկատմամբ իրագործված ցեղասպանությունը ճանաչելու նպատակով, որը հեռանկարում կհանգեցնի Թուրքիայի իշխանությունների կողմից մարդկության դեմ այդ սարսափելի ոճրագործության ճանաչման և, որպես արդյունք` Թուրքիայի և Հայաստանի միջև հարաբերությունների կարգավորման՚, - նշվում է փաստաթղթում:

Հայտարարության տակ ստորագրել են Գերմանիայի, Սերբիայի, Հունգարիայի, Դանիայի, Ֆինլանդիայի, Խորվաթիայի, Հունաստանի պատվիրակները:

Հայաստանի ոստիկանությունը հայտարարություն է տարածել ՀԱԿ անդամի նկատմամբ բռնության վերաբերյալ: ԱրմԻնֆո գործակալությանը տրամադրված հաղորդագրությունում, մասնավորապես, ասվում է, որ ապրիլի 22-ին ոստիկանության Երևան քաղաքի վարչության օպերատիվ կառավարման կենտրոն ՙՀայ ազգային կոնգրես՚ կուսակցության Աջափնյակ համայնքի շտաբի պետից ահազանգ է ստացվել, որ Նազարբեկյան թաղամասի 9 շենքի մոտ, քարոզչություն իրականացնելիս, հարձակվել են իրենց կուսակցության երիտասարդների վրա:

Մեկնած օպերատիվ խմբին ՀԱԿ կուսակցության Աջափնյակի տարածքային կառույցի անդամ, 1986 թ. ծնված Ալեքսանդր Հ.-ն բանավոր հայտարարել է, որ նույն օրը, ժամը 19.30-ի սահմաններում, Նազարբեկյան թաղամասի թիվ 9 շենքի բակում, քարոզարշավ իրականացնելիս, անհայտ անձինք ծեծի են ենթարկել իրեն` խոչընդոտելով իր լիազորությունների իրականացմանը: Ալեքսանդր Հ.-ն հրաժարվել է հաղորդում տալուց և բուժօգնության է տեղափոխվել հիվանդանոց:

Հետաքննության ընթացքում պարզվել է, որ ապրիլի 22-ին, ժամը 19.30-ին, ՀԱԿ կուսակցության անդամները գտնվել են նշված շենքի բակում, նրանցից Ալեքսանդր Հ.-ի և 1995 թ. ծնված Իշխան Մ.-ի միջև վիճաբանություն է սկսվել, որին միջամտել է 1987 թ. ծնված Հովհաննես Գ.-ն: Ապրիլի 23-ին, ժամը 20.00-ին, Իշխան Մ.-ն բուժօգնության է դիմել հիվանդանոց: Փաստի առթիվ ոստիկանության Մաշտոցի քննչական բաժնում ՀՀ քրեական օրենսգրքի 117 հոդվածի հատկանիշներով հարուցվել է քրեական գործ:  Կատարվում է նախաքննություն:

 ԲՀԿ վճռականորեն դատապարտում է բռնության կիրառումն ընդդիմադիր լրագրողի նկատմամբ: Այդ մասին ԱրմԻնֆոյի թղթակցին հայտարարել է ԲՀԿ խորհրդարանական խմբակցության քարտուղար Նաիրա Զոհրաբյանը:

Ապրիլի 23-ին ՀԱԿ կուսակցությունը տարածել էր հայտարարություն, որում հաղորդել էր, թե ապրիլի 23-ին Նոր Նորքի ընտրողների հետ քաղաքապետ Տարոն Մարգարյանի հանդիպման ընթացքում հանդիպման կազմակերպիչ Արամ Պապյանը խոչըդնոտել է լրագրող Հակոբ Կարապետյանի աշխատանքին,  քանի որ նա ընդդիմադիր ԶԼՄ ներկայացուցիչ է: Պապյանն ու նրա կողմնակիցները խլել են լրագրողի լուսանկարչական ապարատը և մաքրել տեսագրությունը, ինչից հետո նրան ծեծի են ենթարկել: Արդյունքում` լրագրողը տարբեր մարմնական վնասվածքներ է ստացել:

Զոհրաբյանի ասելով, իր համար` որպես պատգամավորի, քաղաքացու և նախկին լրագրողի, միանգամայն անընդունելի է որևէ խոչընդոտի հարուցումը լրագրողների գործունեության համար: Պատգամավորն ընդգծել է, որ ընտրողների հետ ԲՀԿ անդամների հանդիպումներին հաճախ ներկա են լինում լրագրողներ, որոնք ՙվերևից՚ սադրանք հրահրելու հրահանգ են ստանում, սակայն, նույնիսկ այդ դեպքում, ԲՀԿ ըստ ամենայնի փորձում է թույլ չտալ կոնֆլիկտային իրավիճակներ և չխոչընդոտել այդ ԶԼՄ աշխատանքին: ՙՍակայն տվյալ դեպքում ես համոզված եմ, որ iLur-ի թղթակիցն ինքը ոչ մի դեպքում սադրանքի չէր գնա: Դա արդեն զանազան քրեական տարրերի և ՙբակային հեղինակությունների՚ ձեռքի գործն է: Նման երևույթներն անթույլատրելի են և հերթական անգամ ցույց են տալիս հանդուրժողականության և օբյեկտիվ իրականության մասին հայտարարությունների միջև տարբերությունը՚, - ասել է Զոհրաբյանը:

Հայաստանում սկսվում են միջոցառումները`նվիրված ՙՄենք հավատարիմ ենք մեր հիշողությանը՚ հայ-ռուսական երիտասարդական էստաֆետային և  ՙԳեորգիևյան ժապավեն- 2013՚ հայրենասիրական ակցիայի սկզբին:

Ըստ ավանդույթի` տասնյակ հազարավոր ՙՀաղթանակի խորհրդանիշների՚ բաժանումով սկիզբ կդրվեն Հայաստանում  Մեծ Հայրենական պատերազմում հաղթանակի 68-ամյակին նվիրված Հայաստանում անցկացվելիք միջոցառումներին: Ակցիայի մասնակիցներն են` երիտասարդական հասարակական կազմակերպությունների առաջնորդները, քաղաքական կուսակցությունների թևերի ղեկավարները, երկրի բուհերի ուսանողական կազմակերպությունները, հասարակական գործիչները, պատերազմների և զինված ուժերի վետերանները, ռուս հայրենակիցները: Նախատեսվում է` պատերազմների վատերանների հետ հանդիպումների, երիտասարդական երթերի, համերգների, ուսանողների և դպրոցականների համար բաց դասերի, ցուցահանդեսների, վիկտորինաների և մրցույթների, Մեծ Հայրենականի մարտերում ընկած Խորհրդային Միության երիտասարդ հերոսների հիշատակին նվիրված 15 հուշարձան-աղբյուրների մոտ հավաքի անցկացում:

Հայ ժողովուրդն անգնահատելի ներդրում է ունեցել հիտլերյան Գերմանիայի ջախջախման  և Գերմանիայի դաշնակից Թուրքիայի հետ ԽՍՀՄ  հարավային սահմանների անձեռնմխելիության ապահովման մեջ: Հաղթողների ժառանգները հնարավորություն կստանան մասնակցել   ՙՃակատային լուսանկար ընտանեկան ալբոմից՚ լուսանկարչական ցուցահանդեսին, պատմել իրենց պապերի մասին և նվիրել լուսանկարները Մեծ հայրենականի հանրապետական թանգարանին, ինչպես նաև կմասնակցեն մասնագիտացված և սիրողական կոլեկտիվների տոնական համերգներին: Հիշեցնենք, որ 1941թ. հունիսից մինչև 1945թ. մայիսը Խորհրդային բանակ է զորակոչվել ավելի քան  500 հազար հայ, որոնցից մոտ175 հազարը զոհվեց մարտերում:  Պատերազմի տարիներին 106 հայեր դարձան Խորհրդային միության հերոսներ, իսկ լեգենդար օդաչու Նելսոն Ստեփանյանը և Խորհրդային Միության մարշալ Հովհաննես Բաղրամյանը այդ կոչմանն արժանացան երկու անգամ: Բացի այդ` 27 հայեր դարձան Փառքի շքանշանակիրներ:

Երկրորդ Համաշխարհային պատերազմի խոշորագույն զորահրամանատարների շարքում են` Խորհրդային Միության կրկնակի հերոս, մարշալ Հովհաննես Բաղրամյանը, Խորհրդային Միության հերոս, զրահատանկային զորքերի գլխավոր մարշալ Համազասպ Բաբաջանյանը, ավիացիայի մարշալ Սերգեյ Խուդյակովը (Արմենակ Խամփերյանց), Խորհրդային Միության հերոս, ԽՍՀՄ նավատորմի ադմիրալ Իվան Իսակովը (Հովհաննես Իսահակյան):Հայ ժողովուրդը պատրաստեց և ճակատ ուղարկեց վեց մոտոհրաձգային դիվիզիաներ, իսկ Թամանյան 89-րդ դիվիզիան հասավ մինչև Բեռլին: Սփյուռքի մոտ 100 հազար ներկայացուցիչներ պատերազմում էին դաշնակիցների զորքերի կազմում:

Երևանի կենտրոնի կառուցապատումը կրկին ակտիվիստների ուշադրության կենտրոնում է հայտնվել: Հյուսիսային պողոտայի մոտ 2 բազմահարկ հյուրանոց կառուցելու ծրագրերով մտահոգված`ՙՓրկենք Երևանը՚ քաղաքացիական նախաձեռնությունը հանդես է եկել մայրաքաղաքի կենտրոնի կառուցապատման նախագծերի իրականացումը դադարեցնելու պահանջով:

Ինչպես ապրիլի 25-ին լրագրողների հետ զրույցում նշել է ակտիվիստ Իզաբելլա Սարգսյանը, Երևանի կենտրոնի կառուցապատման ակտիվ տեմպերը վտանգի տակ են դնում պատմության շատ հուշարձաններ: Այսպես, հայտնի ճարտարապետ Թամանյանի նախագծած շենքի հարևանությամբ`Պուշկինի-25 հասցեում, նախատեսվում է կառուցել բազմահարկ հյուրանոցներ, որոնք, ինչպես ընդգծվել է, չափազանց վիթխարի կառույցներ են այդքան նեղ փողոցների համար:

Սարգսյանը նշել է, որ նման նախագծերի իրականացման պատճառով Երևանը զրկվում է իր պատմական նկարագրից: Ստեղծված իրավիճակի հետ կապված`նախաձեռնությունը Երևանի Ավագանու խորհրդի ընտրություններին մասնակցող ընդդիմադիր ուժերին կոչ է արել աջակցել մայրաքաղաքը կառուցապատումից փրկելու իրենց ջանքերին:
Ավելի վաղ մի շարք նախաձեռնություններ իրենց մտոհոգությունն են հայտնել ԱՕԿՍ շենքի մոտ հյուրանոցային համալիր կառուցելու, ինչպես նաև Աֆրիկյանների տան տեղափոխման հեռանկարի առնչությամբ: Էկոլոգներն ուշադրությունը հրավիրել են այն բանի վրա, որ, համաձայն տիեզերիքից արված լուսանկարների, 20 տարվա ընթացքում, ակտիվ կառուցապատման պատճառով, Երևանը կորցրել է կանաչ տարածքների մինչև 70% -ը: