Արմինֆո. Ադրբեջանի նախագահ Իլհամ Ալիևը Եվրախորհրդին մեղադրում է երկակի ստանդարտներ կիրառելու, Հայաստանի և Ադրբեջանի նկատմամբ դիֆերենցված վերաբերմունքի համար համար` սպառնալով լքել նրա շարքերը:
Այսպես, Եվրամիության խորհրդի քաղաքականության և անվտանգության կոմիտեի պատվիրակության հետ հանդիպմանն Ալիևը հայտարարել է, որ Ադրբեջանում ԵԽ նկատմամբ հասարակական կարծիքն այնքան էլ դրական չէ: «Նախ, երբ մենք անդամակցում էինք այդ կազմակերպությանը, ապա մեր ակնկալիքներն առնչվում էին այն բանին, որ ԵԽ մեզ կաջակցի Լեռնային Ղարաբաղի հակամարտության կարգավորման գործում: Սակայն Եվրախորհուրդը հաջողության չհասավ այդ հարցում, այդ գործը չստացվեց, ու չի էլ ստացվի: Երկրորդ, մեր անդամության սկզբում ես մեր պատվիրակության առաջին ղեկավարն էի: Այն ժամանակ ես Ադրբեջանի խորհրդարանի անդամ էի և 2001-2003թթ. ղեկավարում էի Ադրբեջանի պատվիրակությունը Եվրախորհրդի խորհրդարանական վեհաժողովում: Այսինքն, ինձ հայտնի է, թե իրենից ինչ է ներկայացնում այդ կազմակերպությունը, և այնտեղ ինչպես են վերաբերվում Ադրբեջանին: Վերաբերմունքը չափազանց բացասական էր: Մենք այդ կազմակերպությանն անդամակցել ենք Հայաստանի հետ նույն օրը, և դեռ այն ժամանակ ենք տեսել Ադրբեջանի նկատմամբ չափազանց բացասական վերաբերմունք` Հայաստանի նկատմամբ դրական վերաբերմունքի դեպքում: Հայաստանը, որտեղ մշտապես կեղծվում են ընտրությունները, խորհրդարանում սպանում են քաղաքական գործիչների, որտեղ ահաբեկչությունը, կարելի է ասել, ընդունված է պաշտոնական քաղաքականության մակարդակով, որն օկուպացրել է այլ պետության տարածքը և տառապանք պատճառել միլիոնավոր մարդկանց` պատերազմական հանցագործություններ կատարելու արդյունքում, միշտ վայելել է ԵԽԽՎ լոբբիստական խմբերի հովանավորությունը, իսկ Ադրբեջանը միշտ ենթարկվել է հարձակումների՚, - դժգոհել է Ալիևը: Ընդ որում, նա հավելել է, որ վերջին ժամանակներս Եվրախորհրդի որոշ պաշտոնական ներկայացուցիչներ նոր հարձակումներ են կազմակերպել Ադրբեջանի դեմ. «Նրանք սպառնում են մեզ զրկել անդամությունից և մեր նկատմամբ պատժամիջոցներ կիրառել: Բնականաբար, մեր քաղաքական գործիչները, խորհրդարանականները, լրագրողներն ու քաղաքացիները համարժեք արձագանք են դրսևորում: Նախ, թող նրանք ապահովեն մասնակից երկրների վերաբերյալ Մարդու իրավունքների եվրոպական դատարանի ընդունած ավելի քան 10 հազար որոշումները: Միայն դրանից հետո կարող են խոսել Ադրբեջանին անդամությունից զրկելու կամ պատժամիջոցների մասին: Եթե դա տեղի ունենա, ապա այդ փաստը կդառնա երկակի ստանդարտների հաղթանակ: Այն դեպքում, երբ ՄԻԵԴ ավելի քան 10 հազար որոշումներ տարբեր պատճառներով չեն կատարվում, Ադրբեջանը կատարում է այդ որոշումները, անհրաժեշտության դեպքում վճարում է փոխհատուցում, ընդհանուր առմամբ, իրեն բավականին կառուցողական է պահում: Ուստի Ադրբեջանի նկատմամբ միտումնավոր հարձակումները հիասթափություն են հարուցում, նպաստում են այնպիսի մտքերի, թե` «իսկ ինչու է մեզ հարկավոր նման կազմակերպությունը՚: Ահա արդեն 16 տարի մենք Եվրախորհրդի անդամ ենք: Ասեմ անկեղծ, բարեկամաբար, որ եթե Ադրբեջանը լքի Եվրախորհուրդը, ապա դրան ոչ ոք կարևորություն չի տա: Մեր կյանքում ոչինչ չի փոխվի, մենք չենք սկսի ավելի լավ կամ վատ ապրել, ոչ կհարստանանք, ոչ էլ կաղքատանանք: Մարդու իրավունքներն ու ժողովդավարությունն այսուհետև էլ կլինեն մեր ուշադրության կենտրոնում: Մենք դա անում ենք ոչ այն բանի համար, որպեսզի դուր գանք Եվրախորհրդի գլխավոր քարտուղարին, որն անհիմն հարձակումներ է գործում Ադրբեջանի նկատմամբ: Մենք դա անում ենք մեր երկիրը զարգացնելու նպատակով՚, - եզրափակել է Ադրբեջանի նախագահը: