8 տարվա ընթացքում Հայաստանի Հանրապետությանը վերադարձվել է շուրջ 773 մլն դոլարի գույք և միջոցներ

Արմինֆո. Հակակոռուպցիոն դատարանի որոշմամբ Հայաստանի Հանրապետությանը վերադարձված 7 հազար քմ ընդհանուր մակերեսով հողամասը կառավարության որոշմամբ հանձնվել է Շրջակա միջավայրի նախարարության տնօրինությանը ՝ այն "Հայանտառ" ՊՈԱԿ-ին անորոշ ժամկետով տրամադրելու նպատակով: Որոշումն ընդունվել է մարտի 19-ին ՝ կառավարության նիստում։

ՀՀ տարածքային կառավարման և ենթակառուցվածքների նախարար Դավիթ Խուդաթյանի խոսքով ՝ գույքի կադաստրային արժեքը (շուկայական արժեքին մոտ) կազմում է մոտ 417 միլիոն դրամ:

Գլխավոր դատախազ Աննա Վարդապետյանն, իր հերթին, նշել է, որ ավելի վաղ Շրջակա միջավայրի նախարարության ենթակայությանն է հանձնվել ևս 5 հողատարածք հեռուստաաշտարակի հարակից տարածքում։

"Այսպիսով, այսօրվա դրությամբ Շրջակա միջավայրի նախարարությանն ամրագրվել է շուրջ 7,5 հեկտար մակերեսով 6 հողամաս, որոնք գտնվում են Երևանի Գ.Հովսեփյան փողոցի հեռուստաաշտարակի հարակից տարածքում ՝ 3 միլիարդ 381 միլիոն 573 հազար դրամ ընդհանուր կադաստրային արժեքով", - նշել է Վարդապետյանը:

Աննա Վարդապետյանն անդրադարձել է նաև 2018-2025 թթ. ՀՀ-ին վերադարձված գույքերին ու դրամական միջոցներին և նշել, որ Դատախազությունում վերլուծվել են այդ թվականների՝ քրեական վարույթներով, դատարաններում ավարտված գործերով, պետական և համայնքային շահերի պաշտպանության հայցերով ու հաշտություններով, դատախազական ներգործության միջոցներով, իսկ 2023 թ.-ից՝ նաև ապօրինի ծագում ունեցող գույքի բռնագանձման գործիքակազմի կիրառման արդյունքում, ՀՀ և համայնքների սեփականությանը կամ տիրապետմանը վերադարձված գույքերի և դրամական միջոցների ցուցանիշները:

Ըստ այդ ցուցանիշների՝ 2018-2025 թթ. ընթացքում Հայաստանի Հանրապետության և համայնքների սեփականությանը կամ տիրապետմանն է վերադարձվել շուրջ 291 միլիարդ 726 միլիոն դրամի (շուրջ 773 միլիոն դոլարի) գույք և դրամական միջոց, որից 65.8%-ը կամ շուրջ 193 միլիարդ դրամի (շուրջ 504 միլիոն դոլարի) գույքն ու դրամական միջոցը՝ 2023-2025 թթ.-ին: