ՀՀԿ․ ՀՀ վարչապետը շատ լավ գիտի, որ Հայաստանի եվրոպական ապագան միֆ է

Արմինֆո.ՀՀ վարչապետ Նիկոլ Փաշինյանը շատ լավ գիտի, որ Հայաստանի եվրոպական ապագան միֆ է, հեքիաթ, որի անվան տակ հայ ժողովրդին "ծախում են թյուրքացումը": Այդ մասին Facebook-ի իր էջից հայտարարել է Հայաստանի հանրապետական կուսակցության փոխնախագահ Արմեն Աշոտյանը։

Նրա ասելով, այն ժամանակ, երբ Նիկոլ Փաշինյանը Եվրոպական խորհրդարանում հայտարարում էր ԵՄ-ում Հայաստանի ապագայի եւ այդ կառույցին անդամակցելու Հայաստանի մտադրության մասին, նա, ինչպես եւ ԵԽ պատգամավորները, շատ լավ գիտեին, որ ընդամենը կես ժամ անց նույն Եվրախորհրդարանում տեղի է ունենալու "Եվրոպական միության ընդլայնման ռազմավարություն" կոչվող կարեւորագույն փաստաթղթի շուրջ քվեարկությունը: "Ես գտա այդ փաստաթուղթը։ Դրանում հստակ ասվում է, որ Հայաստանը, ի տարբերություն  բալկանյան պետությունների, Մոլդովայի և Ուկրաինայի, որոնց մասին հիշատակումներ կան մի քանի տեղերում, Եվրամիությանն անդամակցելու որևէ հեռանկար չունի ։ Առավելագույնը, ինչի մասին ասվում է փաստաթղթում, այն է, որ ԵՄ-ը ողջունում է ՀՀ Ազգային ժողովի կողմից ընդունված ԵՄ-ին անդամակցելու գործընթաց սկսելու հիմար օրենքը, և հույս կա, որ բարեփոխումների ընդլայնման և խորացման ծրագրի շարունակման դեպքում Հայաստան-ԵՄ հարաբերությունները կտեղափոխվեն տրանսֆորմացիայի փուլ", - նշել է ՀՀԿ փոխնախագահը:

Աշոտյանը նկատել է, որ Հայաստանի՝ ԵՄ-ին անդամակցելու հեռանկարների մասին փաստաթղթում որևէ հղում չկա, և Նիկոլ Փաշինյանը պետք է իմանար այդ մասին, էլ չեմ ասում հենց ԵԽ պատգամավորների մասին, հատկապես, երբ նրանք ծափահարում էին ՀՀ վարչապետի ինքնասիրահարված ելույթին: "Իսկ ինչ եք կարծում, Նիկոլը կարո՞ղ է բարեփոխումներ իրականացնել, որպեսզի համապատասխանի եվրոպական չափանիշներին։ Միայն մեկ օրինակ բերեմ․ ավիացիայի ոլորտում Հայաստանն արդեն 4 տարի գտնվում է ԵՄ "սև" ցուցակում։ Ավելին, այդ ցուցակի գործողության ժամկետը երկարաձգվել է մինչև 2030 թվականը, և դա միայն մեկ ոլորտ է: Եթե Փաշինյանը մնա իշխանության ղեկին, ապա 9 տարի չի կարողանա իրականացնել այդ բարեփոխումները։ Հայաստանի ապագան ԵՄ-ում հեքիաթ է, որի տակ մեզ "ծախում են թյուրքացումը"։ Այդ մասին շատ լավ գիտեն Եվրամիությունն ու Նիկոլ Փաշինյանը", - ասել է Աշոտյանը, հավելելով, որ վերոնշյալ փաստաթղթում մատնանշվում է ցեղասպանությունները ժխտող պետությունների՝ ԵՄ-ին անդամակցելու անհնարինությունը։ Իսկ Հայաստանի ներկայիս իշխանությունները ժխտում են Հայոց ցեղասպանությունը, ոչ միայն խոչընդոտելով դրա միջազգային ճանաչմանը, այլև համապատասխան քայլեր են իրականացնում պետության ներսում, ինչի վկայությունն է Հայոց ցեղասպանության թանգարան - ինստիտուտի տնօրենի պաշտոնանկությունը։

Հիշեցնենք, որ Փաշինյանի նախաձեռնությամբ աշխատանքից ազատվել է ՀՑԹԻ տնօրեն Էդիտա Գզոյանը։ Պաշտոնանկության համար հիմք է ծառայել ԱՄՆ փոխնախագահ Ջեյ Դի Վենսին ղարաբաղյան հիմնախնդրի թեմայով գրքեր նվիրելը։ Ինքը՝ Փաշինյանն, այդ գործողությունները համարել է սադրիչ, կառավարության վարած արտաքին քաղաքականությանը հակասող։