Վրացի փորձագետ. Իրանի շուրջ իրադարձությունները Վրաստանում ընկալվում են որպես ինչ-որ հեռավոր մի բան

Արմինֆո. Իրանի շուրջ իրադարձությունները ցավոտ թեմա են Հայաստանի և Ադրբեջանի համար, քանի որ այդ երկրները սահմանակից են Իրանին։ Սակայն Վրաստանում Իրանն ընկալվում է որպես ինչ-որ հեռավոր մի բան։ Նման կարծիք է հայտնել է վրացի քաղաքագետ Արչիլ Սիխարուլիձեն՝ «Ինչպես կազդի Իրանի պատերազմը Հարավային Կովկասի երկրների վրա» թեմայով Երևան-Թբիլիսի տեսակամրջի ընթացքում, անդրադառնաալով այն հարցին, թե ինչու Իրանի շուրջ իրավիճակը բավականաչափ ակտիվ չի քննարկվել Թբիլիսիում ՀՀ վարչապետ Նիկոլ Փաշինյանի և Վրաստանի վարչապետ Իրակլի Կոբախիձեի հանդիպման ժամանակ։

Որպես համանման օրինակ՝ փորձագետն ուշադրություն է հրավիրել այն հանգամանքին, որ Արցախում պատերազմը նույնպես արդիականություն և կաարեւորություն չի ունեցել վրացական տեղեկատվական դաշտում։ «Դա պայմանավորված է կառավարող «Վրացական երազանք» կուսակցության պրագմատիկ քաղաքականությամբ, որը լուրջ քաղաքական մարտահրավերների է բախվում: Վրաստանում 2024 թվականից  ակտիվ բողոքի ցույցեր են ընթանում, երկիրը ենթարկվում է արևմտյան պատժամիջոցների, իսկ կառավարությունը ճնշման է ենթարկվում: Հետևաբար, Վրաստանի կառավարության պայքարի համատեքստից դուրս տեղի ունեցող շատ գործընթացներ հաճախ աննկատ են մնում բնակչության շրջանում: Հենց դա բացատրում է, թե ինչու են Հայաստանի և Վրաստանի վարչապետները միայն ընդհանուր դիտողություններ արել անվտանգության և խաղաղության անհրաժեշտության մասին, սակայն լուրջ քննարկումներ չեն եղել», - պարզաբանել է Սիխարուլիձեն:

Փորձագետի խոսքով՝ Իրանում տեղի ունեցող իրադարձությունները Վրաստանի համար ավելի արդիական են Իրանի կառավարության դեմ բողոքի ցույցերի համատեքստում, հիշեցնելով, որ ավելի վաղ բողոքի ցույցի մասնակիցներից մեկը՝ իրանցի, հարձակվել էր Վրաստանում Իրանի դեսպանատան վրա և ձերբակալվել: «Բացի այդ, բողոքի ցույցերի ժամանակ որոշ ընդդիմադիր տրամադրված քաղաքացիներ, որոնք իրենց անվանում էին արևմտամետ վեկտորի կողմնակիցներ, ակտիվորեն աջակցում են Իրանին հասցվող հարվածներին և, նույնիսկ, պարզել են հսկայական ամերիկյան դրոշ, հայտարարելով, որ Վրաստանը պետք է հստակ դիրքորոշում որդեգրի՝ ի սատարումն Իսրայելի և Միացյալ Նահանգների: Այսպիսով, Վրաստանին մտահոգում է ոչ այնքան պատերազը, որքան ներքաղաքական պայքարի հարցերը, որոնց մասին քչերը գիտեն», - պարզաբանել է փորձագետը:

Խոսելով քրդական սցենարի իրագործման հավանականության մասին՝ Սիխարուլիձեն հիշեցրել է քրդական շարժման ղեկավարի այն հայտարարության մմասին, որ իրենք ապստամբություն չեն ծրագրում: Փորձագետն այդ որոշումը համարել է ողջամիտ, նշելով, որ քրդական հարցն արդիական է Իրաքի, Թուրքիայի և Իրանի համար, և այդ երկրներից ոչ մեկը հետաքրքրված չէ քրդերի հաջողությամբ տարածաշրջանային մակարդակում:

«Հնարավոր է՝ սա ԱՄՆ նախագահ Դոնալդ Թրամփի համար «Բ» պլան է, բայց, իրականում, դա ​​ոչ մեկին ձեռք չի տալիս», - ամփոփել է փորձագետը:

Հիշեցնենք, որ փետրվարի 28-ի առավոտյան Միացյալ Նահանգները և Իսրայելը հարձակվել են Իրանի վրա: Ի պատասխան՝ Իրանը հարվածներ է հասցնում Մերձավոր Արևելքում գտնվող ամերիկյան բազաներին: Ամերիկա-իսրայելական ագրեսիայի արդյունքում սպանվել են Իրանի գերագույն առաջնորդ Ալի Խամենեին և մի քանի բարձրաստիճան իրանցի զինվորականներ: Ամերիկյան կողմը մինչ այժմ հաստատել է իր վեց զինվորների մահը: Իրանի հարավում գտնվող մի նահանգում գտնվող աղջիկների դպրոցի վրա Իսրայելի կողմից իրականացված հարվածի հետևանքով, վերջին տվյալներով, զոհվել է 170 աշակերտ և նրանց ուսուցիչներ, իսկ տասնյակներ վիրավորվել են։

HRANA-ի տվյալներով՝ փետրվարի 28-ին հակամարտության սկսվելուց ի վեր քաղաքացիական բնակչության շրջանում զոհերի ընդհանուր թիվը հասել է 1097-ի, այդ թվում՝ մինչեւ 10 տարեկան 181 երեխա։ Եվս 880 զոհերի մասին հաղորդագրությունները ներկայումս ստուգվում և դասակարգվում են։ Փետրվարի 28-ից ի վեր քաղաքացիական բնակչության շրջանում զոհերի թիվը հասել է 5402-ի, այդ թվում՝ 100 երեխա։