Հայ թյուրքագետը պատմել է երեք կարևոր իրադարձությունների մասին, որոնք կարող են հիմք դառնալ Իրանի շուրջ հակամարտության համար

Արմինֆո. Գիտությունների թեկնածու, թյուրքագետ Վարուժան Գեղամյանը պատմել է երեք կարևոր իրադարձությունների մասին, որոնք կարող են հիմք դառնալ Իրանի շուրջ հակամարտության համար և առաջիկա օրերին փոխել տարածաշրջանի ապագան:

Փորձագետը Facebook-ում իր հրապարակման մեջ արձանագրել է, որ, պատկերավոր ասած, Հայաստանի դռան շեմին մեծ պատերազմ է, որի կողմերից մեկը գերտերություն ԱՄՆ-ն է՝ իր դաշնակից Իսրայելով, մյուս կողմում՝ մեր հարևան Իրանը։

«ԱՄՆ և հատկապես Իսրայելը առաջիկա օրերին, իրանական ենթակառուցվածքը թիրախավորող ավիահարվածներին զուգահեռ, փորձելու են անել երկու բան. նախ անկայունացնել ներքաղաքական իրավիճակը Իրանում, երկրորդ՝ դրդել զինված անջատողական պայքարի Իրանի տարբեր ժողովուրդներին։ Այլ բառերով ասած՝ Իրանը բաժան-բաժան անել», - համոզված է փորձագետը։

Գեղամյանի ասելով՝ վերոնշյալի կոնտեքստում այս պահին արդեն իսկ հայտնի է, որ Թրամփը (դարձյալ հավանաբար իսրայելական դրդմամբ) բանակցել է տարածաշրջանի քրդական ուժերի հետ (հղումը՝ մեկնաբանության մեջ)։ Նրա ասելով, եթե սրան գումարենք նաև քրդերով բնակեցված իրան-իրաքյան սահմանի իրանական սահմանապահ դիրքերի ու ռազմական հենակետերի վրա վերջին օրերին արված ավիահարվածները, ապա պատկերը դառնում է ամբողջական։

«Քրդերից զատ քարոզչական և այլ միջոցներով թիրախավորվում են Իրանի հարավ-արևելքում ապրող բելուջները և մեր սահմանների երկայնքով ապրող թյուրքախոս իրանցիները (ազարիները)։ Այաթոլլահ Խամենեիի սպանությունը մարտավարական հաջողություն էր ամերիկա-իսրայելական ուժերի համար, բայց ոչ ռազմավարական հաղթանակ: Տպավորություն է, որ ողջ հույսը դնելով Իրանի իշխանության արագ տապալման վրա ու դա չստանալով` հարձակվող կողմը չունի լիարժեք պատկերացում պատերազմի ավարտի այլ սցենարի մասին: Ավելին՝ կա իրանական համակարգը թերագնահատելու միտում։ Դրա համար են հայտնվում տարբեր ու իրար հակասող հայտարարություններ պատերազմը շարունակելու պատրաստակամության ժամկետների մասին: Այլ բառերով` հայտնի չէ ամերիկա-իսրայելյան exit strategy-ն», - հավելել է Գեղամյանը:

Ընդ որում, նա կարծում է, որ,  չնայած երկկողմանի քարոզչությանը, իրավիճակը դեռ շատ հեռու է կանխատեսելի լինելուց։ Թյուրքագետը հավելել է, որ  եթե Իրանում ներքին պառակտում չլինի, կարող է սկսվել այն, ինչ կոչվում է «հյուծման պատերազմ» (wars of attrition)՝ երկար, դիմացկունության, այլ ոչ թե միայն նյութական ռեսուրների պայքար, որում հաղթողը բնավ ամենաշատ զենքը ունեցողը չէ։ «Այն ներառելու է նոր երկրներ. արդեն իսկ 10-ից ավել երկիր տուժել է՝ հարևան Իրաքից մինչև Կիպրոս», - համոզված է փորձագետը։

Վերջում նա համոզմունք է հայտնել, որ այդ չափազանց կարևոր գործընթացի հետևանքները հայերն անմիջապես զգալու են բառացիորեն օրերս, օրինակ, երբ ամեն ինչ թանկանա՝ Հորմուզի նեղուցի փակվելու պատճառով։