Մոսկվա․ ՀԱՊԿ-ում Հայաստանին դուրս չեն թողնում դաշնակցային փոխգործակցությունից

Արմինֆո. ՀԱՊԿ-ում Հայաստանին դուրս չեն թողնում դաշնակցային փոխգործակցությունից, նրա համար պահպանում են կազմակերպության գծով մշակվող բոլոր լուծումներին միանալու հնարավորություն։ Այդ մասին հայտարարել է Ռուսաստանի փոխարտգործնախարար Միխայիլ Գալուզինը։

"ՀԱՊԿ-ում փոխգործակցության համատեքստում մեզ համար գլխավորըն այն է, որ Երևանը մնում է միավորման լիիրավ անդամ, և դա բազմիցս ընդգծել է Ռուսաստանի Դաշնության նախագահ Վլադիմիր Պուտինը։ Հայաստանին դուրս չենք թողնում դաշնակցային փոխգործակցությունից, նրա համար պահպանում ենք կազմակերպության գծով մշակվող բոլոր լուծումներին միանալու հնարավորությունը։ Ընդ որում, իհարկե, շարունակում ենք ուշադիր հետեւել գործընկերների քայլերին Արեւմուտքի հետ հարաբերություններում, այդ թվում ՝ ՀԱՊԿ շրջանակներում պարտավորություններին դրանց համապատասխանության վերաբերյալ", - ընդգծել է Գալուզինը՝ ՏԱՍՍ-ի հետ հարցազրույցում։

Հիշեցնենք, որ Հայաստանը բոյկոտում է 2022 թվականի վերջից ՀԱՊԿ շրջանակներում անցկացվող միջոցառումները։ 2024 թվականի փետրվարին ՀՀ վարչապետ Նիկոլ Փաշինյանը հայտարարել է, որ Հայաստանը, գործնականում, սառեցրել է իր մասնակցությունը ՀԱՊԿ-ին, քանի որ կազմակերպությունը չի կատարել իր պարտավորությունները ՀՀ-ի հանդեպ, ինչը չէր կարող անհետևանք մնալ։ Իսկ արդեն 2024 թվականի սեպտեմբերի 18-ին Հայկական երկրորդ համաշխարհային գագաթնաժողովում Փաշինյանը հայտարարել է, որ ՀԱՊԿ-ը սպառնալիքներ է ստեղծում Հայաստանի անվտանգության, նրա հետագա գոյության, ինքնիշխանության և պետականության համար։