"Առողջության իրավունք" ՀԿ ղեկավար. Հայաստանում մանկական մահացության աճ է արձանագրվել

Արմինֆո.  Հայաստանում արձանագրվել է մանկական մահացության աճ ՝ չնայած առողջապահության ոլորտի բարեփոխման վերաբերյալ իշխանությունների հավաստիացումներին։ Այդ մասին Facebook-ի իր էջում ահազանգում է "Առողջության իրավունք" իրավապաշտպան հասարակական կազմակերպության ղեկավար Անուշ Պողոսյանը:

Ըստ ներկայացված աղյուսակի՝ Հայաստանում 2024 թվականից երեխաների մահացությունը սրընթաց աճում է։ «Մանկական մահացությունը Հայաստանում շարունակում է մնալ կայուն բարձր մակարդակի վրա, իսկ 2025 թվականին նույնիսկ արձանագրվել է 0-1 տարեկան մահացության աճ՝ 207 դեպք՝ 2024 թվականի 188-ի համեմատ։

Յուրաքանչյուր մանկական մահ առողջապահական համակարգի ձախողման ազդանշան է, հատկապես երբ խոսքը վերաբերում է կանխարգելելի պատճառներին՝ ժամանակին ախտորոշման բացակայություն, անհասանելի կամ ուշացած բուժօգնություն, նորածնային և մանկական խնամքի որակի խնդիրներ։

Չնայած առողջապահական քաղաքականության մասին հնչող «բարեփոխումների» հայտարարություններին, գծապատկերը փաստում է, որ արդյունքները չեն համապատասխանում հնչեցվող խոստումներին։ Եթե համակարգը իսկապես աշխատեր արդյունավետ, մանկական մահացության կրճատումը պետք է լիներ կայուն և շարունակական, ոչ թե կախված տարեցտարի տատանումներից, - եզրափակել է Պողոսյանը:

Նշենք, որ ՀՀ վիճակագրական կոմիտեի տվյալների համաձայն, 2025 թվականին Հայաստանում ծնվել է 32 042 երեխա, ինչը 4.6% - ով ցածր է նախորդ տարվա ցուցանիշից, մեռելածինների թիվը կազմել է 389, տարեկան նվազումը՝ 12.8%: Հաշվետու ժամանակահատվածում երկրում մահացել է 0-1 տարեկան 219 երեխա (2024 թվականի 209-ի դիմաց)։