Իրանագետ․ "Թրամփի երթուղու" վերաբերյալ Իրանի գերագույն առաջնորդի խորհրդականի հայտարարությունը  լուրջ մոտեցում է պահանջում

Արմինֆո. Իրանի գերագույն առաջնորդի միջազգային հարաբերությունների հարցերով խորհրդական Ալի Աքբար Վելայաթիի հայտարարությունը հստակ արտահայտում է իրանական կողմի դիրքորոշումը "Թրամփի երթուղու" (TRIPP) վերաբերյալ: Այդ մասին իր տելեգրամյան Ալիքում գրել է իրանագետ Վարդան Ոսկանյանը ՝ արձագանքելով ԻԻՀ-ում ՀՀ դեսպան Գրիգոր Հակոբյանի հետ հանդիպման ժամանակ Իրանի գերագույն առաջնորդի խորհրդականի հայտարարությանը։

Ինչպես ավելի վաղ հաղորդել է ԱրմԻնֆո-ն, այդ հանդիպման ընթացքում Վելայաթին հայտարարել է, որ Կովկասի նկատմամբ, այսպես կոչված, "Թրամփի ծրագիրը" չի տարբերվում, այսպես կոչված, "Զանգեզուրի միջանցք" նախագծից, և Իրանի Իսլամական Հանրապետությունը կտրականապես դեմ է այդ նախաձեռնությանը:

Ոսկանյանը հորդորել է ամենայն լրջությամբ մոտենալ այդ հայտարարությանը։ «Որպեսզի հասկանալի լինի, թե ով է ազդանշանն ուղարկողը, պետք է ի նկատի ունենալ, որ Իրանի Իսլամական հեղափոխության առաջնորդի միջազգային հարցերով խորհրդականը չափազանց բարձր պաշտոնյա է, որի անմիջական մասնակցությամբ և խորհուրդներով  առաջնորդը հատկապես ռազմավարական նշանակության զգայուն հարցերում սահմանում է այն «կարմիր գծերը» և ուղենիշները, որոնց շրջանակում պետք է գործի այդ երկրի ԱԳՆ-ն և ընդհանրապես պաշտոնական դիվանագիտությունը։

Հետևաբար, այս ազդանշանին պետք է մոտենալ ամենայն լրջությամբ և ուղիղ ու անկեղծ երկխոսության միջոցով փորձել փարատել իրանական կողմի անհանգստությունները, քանի որ հայ-իրանական հարաբերությունները Հայաստանի համար չափազանց կարևոր են անխտիր բոլոր առումներով», - գրել է Ոսկանյանը:

Նշենք, որ Հայաստանի դեսպանի հետ հանդիպման ժամանակ Վելայաթին նաև հիշեցրել է, որ Իրանն ի սկզբանե դեմ է եղել, այսպես կոչված, "Զանգեզուրի միջանցքին", քանի որ Թեհրանը մերժում է տարածաշրջանային սահմանների ցանկացած փոփոխություն և զգուշանում է երկրի պարագծի երկայնքով անվտանգության ապահովման հետ կապված սպառնալիքներից: Իրանցի պաշտոնյայի խոսքով ՝ միջանցքը կարող է ապահովել ՆԱՏՕ-ի ներկայությունը Իրանից դեպի հյուսիս, ինչը անվտանգության լուրջ սպառնալիքներ կստեղծի Հյուսիսային Իրանի և Հարավային Ռուսաստանի համար: Նա հավելել է, որ "Թրամփի ծրագիրը", ըստ էության, նույն նախագիծն է, միայն փոփոխված անվանումով, և այժմ իրականացվում է ամերիկյան ընկերությունների Հայաստան ներթափանցման միջոցով:

Հիշեցնենք, որ TRIPP (Trump Route for International Peace and Prosperity /Թրամփի երթուղի հանուն միջազգային խաղաղության եւ բարգավաճման") նախագիծը Հայաստանի հարավում գտնվող սահմանամերձ ճանապարհի 42 կմ հատվածն է, որը 99 տարով հանձնվելու Է ԱՄՆ-ի ընկերության կառավարմանը՝ դրանով իսկ ապահովելով Ադրբեջանի ուղիղ հաղորդակցությունը Նախիջեւանի ինքնավարության, այնուհետեւ Թուրքիայի հետ: Փորձագետների կարծիքով, նախագիծը կարող է էապես փոխել աշխարհաքաղաքական իրավիճակը Հարավային Կովկասում: TRIPP-ը նախաձեռնվել է ԱՄՆ միջնորդությամբ և ամրագրվել Հայաստանի և Ադրբեջանի ղեկավարների համատեղ հռչակագրով՝ 2025 թվականի օգոստոսին։