ՀԾԿՀ ղեկավար․ էլեկտրաէներգիայի սակագնի նվազեցման մասին ՀԷՑ-ի նախկին կառավարիչների առաջարկը հիմնավորված չէր

Արմինֆո.  Էլեկտրաէներգիայի սակագինը նվազեցնելու մասին "Հայաստանի էլեկտրական ցանցեր" ՓԲԸ-ի նախկին կառավարիչների առաջարկը քիչ հիմնավորված էր և՝ մանիպուլյատիվ։ Այդ մասին նոյեմբերի 22-ին Կարեն Դեմիրճյանի անվան Մարզահամերգային համալիրի առջեւ լրագրողներին հայտարարել է ՀՀ Հանրային ծառայությունները կարգավորող հանձնաժողովի նախագահ Մեսրոպ Մեսրոպյանը:

Նրա ասելով՝ խոսքը 0,02 դրամի մասին է, ինչը ամսական կտրվածքով Հայաստանում միջին վիճակագրական ընտանիքի համար 40 դրամի ազդեցություն կունենա։ "Մենք չենք կարող տարվա կեսից իջեցնել սակագինը՝ ելնելով ինչ-որ մեկի քմահաճույքից։ Սակագնի վրա ազդում են բազմաթիվ գործոններ։ Մենք սակագների վերաբերյալ արդյունքներն ամփոփում ենք տարեվերջին, երբ հասկանում ենք, թե ինչ ազդեցություն կունենա գործոններից յուրաքանչյուրը, որպեսզի պարզենք ՝ կարող ենք իջեցնել սակագինը և պահել այն մի քանի տարի, թե ոչ, այլ ոչ թե        բարձրացնել - իջեցնել այն 6 ամիսը մեկ և բնակչությանը դնել հոգեբանական ծանր վիճակի մեջ", - նշել է Մեսրոպյանը։

"Ես հայտարարել եմ այն, ինչ հայտարարել եմ, և պատասխանատու եմ իմ խոսքերի համար։ Թե ինչպես են արձագանքում Նարեկ Կարապետյանը և "Հայաստանի էլեկտրական ցանցեր" ընկերության մյուս նախկին գործընկերները իմ յուրաքանչյուր խոսքին, դա իրենց գործն է: Կապրենք ՝ կտեսնենք, թե ով է ճշմարտություն ասում, ով ՝ սուտ, ով է մարդկանց մոլորեցնում, և ով է իրաապես մտածում պետության և էլեկտրաէներգիայի իրական սակագնի մասին։ Ժամանակը ցույց կտա", - հավելել է Մեսրոպյանը։

Հիշեցնենք, որ ՀԾԿՀ-ը նոյեմբերի 17-ին իր որոշմամբ "Հայաստանի էլեկտրական ցանցեր" ՓԲԸ-ին զրկել էր էլեկտրաէներգիայի բաշխման լիցենզիայիից: Հունիսի 18-ին իրավապահ մարմինները ձերբակալել էին, ապա դատարանի որոշմամբ կալանավորվել էր խոշոր գործարար, "Տաշիր" ընկերությունների խմբի ղեկավար Սամվել Կարապետյանը՝ սահմանադրական կարգը տապալելու կոչեր անելու մեղադրանքով: Դա տեղի էր ունեցել միայն այն պատճառով, որ վերջինս, հանդես գալով ի պաշտպանություն Հայ Առաքելական Եկեղեցու, հարցազրույցում հայտարարել էր․ "Մենք մեր ձեւով կմիջամտենք", եթե քաղաքական գործիչները չկարողանան կատարել այդ գործառույթը: Կարապետյանի ձերբակալությունից հետո իշխանությունները Կարապետյանների ընտանիքից, փաստացի, խլել են ՀԷՑ-ի կառավարումը՝ ժամանակավոր կառավարիչ նշանակելով "Քաղաքացիական պայմանագիր" կուսակցության անդամ Ռոմանոս Պետրոսյանին:

Նշենք նաև, որ այս պահին Դեմիրճյանի անվան մարզահամերգային համալիր է գալիս Հայաստանի ողջ բարձրագույն քաղաքական ղեկավարությունը։ Նրանց հետ միասին ՀՀ վարչապետի աշխատակազմի կազմակերպած միջոցառմանը հավաքվում են երկրի բոլոր գերատեսչությունների պետծառայողները։