Հայաստանի հավաքականը աշխարհի 4 և Եվրոպայի 7 ռեկորդ է սահմանել Կահիրեի աշխարհի առաջնությունում

Արմինֆո. Հայաստանի Պարա ծանրամարտի հավաքականը փայլուն ելույթ է ունեցել Կահիրեում կայացած Աշխարհի առաջնությունում։

Ինչպես ԱրմԻնֆո-ին հաղորդել են Հայաստանի Պարալիմպիկ կոմիտեի մամուլի ծառայությունից, Կահիրեում հոկտեմբերի 9-10-ը անցկացվել է Պարա ծանրամարտի երիտասարդների և պատանիների Աշխարհի առաջնությունը, որտեղ Հայաստանը ներկայացել է 8 մարզիկով՝ 5-ը՝ 18-20 տարեկանների, և 3-ը՝ 15-17 տարեկանների տարիքային խմբերում։

Հայաստանի պատվիրակության կազմում էին Հակոբ Աբրահամյանը, Գևորգ Հովհաննիսյանը և Արամ Զուրաբյանը։

Առաջինը մրցահարթակ է դուրս եկել Գյումրեցի Ռաֆայել Համազասպյանը (15-17 տ.), ով անթերի կատարել է իր բոլոր երեք մոտեցումները՝ սահմանելով Եվրոպայի երեք և Աշխարհի երկու ռեկորդ։ Նա գրավել է առաջին տեղը թե՛ բարձրացրած 115կգ առավելագույն քաշով (ԼԲՔ), թե՛ բարձրացրած 110կգ, 114կգ, 115կգ քաշերի հանրագումարով (ԲՔՀ)։ Ռաֆայել Համազասպյանը դարձել է ընդամենը երկրորդ հայ մարզիկը լենգենդար Պարալիմպիկ ծանրորդ Գագիկ Գասպարյանից հետո, ով Պարա ծանրամարտում սահմանում է Աշխարհի ռեկորդ։ Նա կներկայացվի Սպորտի վարպետի (ՍՎ) կոչման և 2026 թվականի սպորտային թոշակի թեկնածուների ցուցակում ընդգրկման համար։

Արագածոտնի մարզից Անյուտա Պետրոսյանը, հանդես գալով մինչև 45 կգ քաշային կարգում,

իր միջազգային դեբյուտում փայլել է լավ ելույթով (55կգ ԼԲՔ և ԲՔՀ95կգ)՝ նվաճելով երկու ոսկե մեդալ։ Նա կներկայացվի Միջազգային կարգի սպորտի վարպետի (ՄԿՍՎ) կոչման և 2026թ սպորտային թոշակի ստացման համար։

Մինչև 59 կգ քաշային կարգում հանդես են եկել Խորեն Ծատուրյանը (Գյումրի) և Արթուր Բաբայանը (Վանաձոր)։ Նրանց մենամարտը դարձել է առաջնության ամենաոգեղ միավորումը։

Վերջնական մոտեցումներում Արթուր Բաբայանը բարձրացրել է 141 կգ և սահմանել Եվրոպայի նոր ռեկորդ, իսկ անմիջապես հետո Խորեն Ծատուրյանը բարձրացրել է 142 կգ և սահմանել նոր ռեկորդ՝ գերազանցելով Արթուրի արդյունքը։ Արդյունքում՝ Խորեն Ծատուրյանը նվաաճել է 2 ոսկե մեդալ, Արթուր Բաբայանը՝ 2 արծաթե մեդալ։ Երկուսն էլ ընդգրկվելու են 2026 թվականի սպորտային թոշակի թեկնածուների ցուցակում։ Արթուրը նաև կներկայացվի ՄԿՍՎ մարզական կոչման

Մինչև 65 կգ քաշային կարգում հանդես են եկել Գավառցի Արտյոմ Մուխսյանը (15-17 տ.) և Երևանցի Դավիթ Հունանյանը (18-20 տ.)։ Արտյոմ Մուխսյանը նվաճել է երկու արծաթե մեդալ՝ 69կգ բարձրացրած առավելագույն քաշով և 128կգ բարձրացրած քաշերի հանրագումարով։

Դավիթ Հունանյանը նվաճել է արծաթե մեդալ 301կգ բարձրացրած քաշերի հանրագումար հաշվարկով։ Երկուսն էլ կներկայացվեն համապատասխանաբար ՄԿՍՎ և ՍՎ մարզական կոչման և 2026 թ․ սպորտային թոշակի թեկնածուների ցուցակում ընդգրկման համար։

Թիմի ամենաերիտասարդ անդամը՝ Վանաձորցի Կարինե Մանուկյանը, առաջին իսկ մոտեցմամբ սահմանել է նորմատիվ ռեկորդի համար և նվաճել ոսկե մեդալ։ Վերջնական 60կգ և 110կգ արդյունքներով նա գերազանցել է Եվրոպայի և Աշխարհի ռեկորդների նորմատիվը՝ նվաճելով երկու ոսկե մեդալ։ Կարինեն կներկայացվի ՍՎ մարզական կոչման և 2026 թ․ սպորտային թոշակի թեկնածուների ցանկում ընդգրկման համար։

Արարատի մարզի ներկայացուցիչ Տիգրան Խլղաթյանը հանդես է եկել մինչև 88կգ քաշային կարգում, 18-20 տարիքային խմբում՝ պայքարելով Իրանի և Ուզբեկստանի առաջատար մարզիկների հետ։ Գրագետ տակտիկական մոտեցման և անձնական գերլարման շնորհիվ նա 157կգ (ԲՔՀ) արդյունքով նվաճել է բրոնզե մեդալ՝ ամփոփելով Հայաստանի թիմի փայլուն մասնակցությունը։ Նա ևս կներկայացվի ՍՎ մարզական կոչման և 2026 թ․ սպորտային թոշակի թեկնածուների ցանկում ընդգրկման համար։

Հայաստանի երիտասարդական և պատանեկան հավաքականը Կահիրեի Աշխարհի առաջնությունում նվաճել է 8 ոսկե, 5 արծաթե և 1 բրոնզե մեդալ, սահմանել է Աշխարհի 4 և Եվրոպայի 7 նոր ռեկորդ։ Մեդալների ընդհանուր հաշվարկով Հայաստանի թիմը գրավել է 3-րդ տեղը՝ զիջելով միայն Ուզբեկստանի և հյուրընկալող Եգիպտոսի հավաքականներին։

«Այս փայլուն արդյունքը Հայաստանի Պարա ծանրամարտի հավաքականի ամբողջ անձնակազմի կուռ, նվիրված և գրագետ աշխատանքի արդյունքն է, ինչը ևս մեկ անգամ ապացուցեց մեր մարզիչների և մարզիկների բարձր մակարդակը ու հայկական պարալիմպիկ սպորտի կայուն զարգացումը», - ասվում է հաղորդագրությունում։

Նաեւ նշվում է, որ Աշխարհի առաջնությանը Հայաստանի մասնակցությունը 6 մարզիկի և 2 պատվիրակի ծախսերը, իրականացվել են Պետական բյուջեի միջոցներից՝ ՀՀ կրթության, գիտության, մշակույթի և սպորտի նախարարության և Հայաստանի ազգային պարալիմպիկ կոմիտեի միջև կնքված դրամաշնորհային 2025 թ․ պայմանագրի շրջանակում։

Մրցաշարին մասնակցող մնացած թիմի ծախսերի ֆինանսավորումը կազմակերպվել է Պարալիմպիկ կոմիտեի, մարզիկների մարզական ակումբների և մարզիկների անձնական միջոցներից։

«Շնորհակալություն ենք հայտնում Եգիպտոսում Հայաստանի դեսպան Արմեն Սարգսյանին, դեսպանատան և հյուպատոսական բաժնի աշխատակիցներին՝ թիմին ցուցաբերած աջակցության և ընդունելության կազմակերպման համար։ Նաև շնորհակալություն ենք հայտնում բոլոր նրանց ովքեր այս ողջ ախապատրաստական և հետմրցումային շրջանում աջակցեցին մեզ և մեր հավաքական թիմին», - նշվում է Հայաստանի Պարալիմպիկ կոմիտեի հաղորդագրությունում։