Տիգրան Աբրահամյան․ Ադրբեջանն ու Թուրքիան ամեն ինչ անում են Թրամփի երթուղուց հայկական կողմի օգուտները նվազագույնի հասցնելու համար

Արմինֆո.Ադրբեջանն ու Թուրքիան ամեն ինչ անում են, որպեսզի Թրամփի երթուղու իրականացման շրջանակներում Հայաստանի տարածքով անցնող միջազգային բեռները երկրին նվազագույն օգուտ բերեն: Լրագրողների հետ ճեպազրույցում նման կարծիք է հայտնել Ազգային ժողովի ընդդիմադիր "Պատիվ ունեմ" խմբակցության պատգամավոր Տիգրան Աբրահամյանը ՝ անդրադառնալով Վաշինգտոնում ձեռք բերված պայմանավորվածությունների շրջանակներում հաղորդակցությունների ապաշրջափակման հարցին։

Այդ առումով նա հիշեցրել է, որ նախկինում այդ հարցը միշտ քննարկվել է բոլոր ուղղություններով ճանապարհների բացման համատեքստում, մինչդեռ, այսօր Թուրքիան և Ադրբեջանը, եթե անգամ հաշվի են առնում Հայաստանի համար որոշակի տնտեսական օգուտներ այդ ճանապարհից, սակայն ձգտում են անել այնպես, որ տնտեսական, քաղաքական և ռազմական առավելությունները առավելագույն լինեն միայն իրենց համար:

"Ինչ վերաբերում է Թրամփի երթուղուն, ապա այստեղ մենք բախվում ենք բազմաթիվ հակասական մոտեցումների։ Օրինակ, մինչ նախագահ Դոնալդ Թրամփը խոսում է ճանապարհի վարձակալության մասին, Հայաստանի իշխանությունները հայտարարում են, որ այդ թեման այս պահին չի քննարկվում։ Այլ կերպ ասած, թեման բարդ է, եւ առայժմ դրա շուրջ տարաձայնությունները չափազանց շատ են", - նշել է պատգամավորը։

Աբրահամյանն անդրադարձել է նաև վարչապետ Նիկոլ Փաշինյանի այն հայտարարությանը, թե, այսպես կոչված, "Զանգեզուրի միջանցք" ասելով Ադրբեջանում նկատի ունեն Հորադիզ-Զանգելան ճանապարհը: Պատգամավորը նշել է, որ նման հայտարարությունը տրամաբանական չի համարում և վստահ է, որ միջանցքային տրամաբանությունը քննարկվում է բացառապես Ադրբեջանի կողմից ՀՀ տարածքից օգտվելու համատեքստում՝ Նախիջևանի հետ կապ հաստատելու համար:

Ընդդիմադիրը նաև նշել է, որ ՄԱԿ-ում Ադրբեջանի նախագահի արած հայտարարությունները տպավորություն են ստեղծում, թե Վաշինգտոնում որևէ բանակցություն գոյություն չի ունեցել: "Ավելին, նկատենք, որ այդ հայտարարությունները զարմանք են առաջացրել անգամ վարչապետի մոտ, ով համոզված էր, որ ձեռք բերված պայմանավորվածությունները վերջակետ են դրել շատ հարցերում", - եզրափակել է պատգամավորը:

Հիշեցնենք, որ TRIPP (Trump Route for International Peace and Prosperity, թարգմանաբար ՝ "Թրամփի երթուղին հանուն միջազգային խաղաղության և բարգավաճման") նախագիծը 42 կմ ճանապարհ է Հայաստանի հարավում, որը ճանապարհի կառավարումը 99 տարով կհանձնի ԱՄՆ-ին ։ Փորձագետների կարծիքով, դա կարող է էապես փոխել աշխարհաքաղաքական իրավիճակը Հարավային Կովկասում: