Ընդդիմադիրը՝ իմփիչմենտի գործընթացի մասին. շարունակում ենք սպասել "Հայաստան" խմբակցության պատգամավորների պատասխանին

Արմինֆո.  "Պատիվ ունեմ" խմբակցությունը շարունակում է սպասել "Հայաստան" խմբակցության պատգամավորների պատասխանին՝ իմպիչմենտի գործընթացին միանալու առնչությամբ: Այդ գործընթացին նրանց միանալը թույլ կտա ձևավորել ընդդիմադիր ուժերի միասնական դիրքորոշում ՀՀ վարչապետ Նիկոլ Փաշինյանի հետագա պաշտոնավարման անհնարինության վերաբերյալ: Այդ մասին սեպտեմբերի 9-ին լրագրողների հետ զրույցում հայտարարել է "Պատիվ ունեմ" խմբակցության ղեկավար Հայկ Մամիջանյանը։

Հիշեցնենք, որ "Հայաստան" խմբակցությունն ավելի վաղ հայտարարել էր, որ պատրաստ է իմփիչմենտի ընթացակարգի շրջանակներում տրամադրել 28 պակասող ստորագրությունները՝ դրանք հրապարակելով ֆեյսբուքյան էջում, հենց որ այդ գործընթացը նախաձեռնողները ապացույցներ ներկայացնեն կառավարության ղեկավարին անվստահություն հայտնելու համար մնացած բացակայող ձայները հավաքելու համար:

Մինչդեռ, Մամիջանյանը կարծում է, որ առանց ընդդիմադիր ուժերի համախմբման անիմաստ է խոսել կառավարող ուժի պատգամավորների կողմից նախաձեռնությանն աջակցելու անհրաժեշտության մասին: "Ակնկալում ենք, որ մեր գործընկերները կամ կմիանան այդ գործընթացին, կամ, գոնե, այլընտրանքային օրակարգ կառաջարկեն, թեև վստահ եմ, որ այն չի լինելու", - հավելել է խմբակցության ղեկավարը:

Անդրադառնալով այն հարցին, թե ինչու է իրենց քաղաքական ուժը շարունակում առաջ տանել այդ գաղափարը, չնայած աջակցության բացակայությանը, Մամիջանյանը պարզաբանել է, որ իրենց համար Նիկոլ Փաշինյանի իշխանության յուրաքանչյուր նոր օրը մեծացնում է այն ռիսկերը, որոնց բախվում է երկիրը և անդառնալի հետևանքներ ստեղծում նրա համար: Հենց այդ պատճառով, ինչպես ընդգծել է ընդդիմադիրը, իրենք կարևորում են այդ ընթացակարգի իրականացումը մինչև 2026 թվականի խորհրդարանական ընտրությունները ։ Բացի այդ, նա ուշադրություն է հրավիրել այն հանգամանքին, որ այս փուլում դա Հայաստանի քաղաքական դաշտում խնդրի լուծման միակ առաջարկված տարբերակն է։

Նա, սակայն, խոստովանել է, որ ամբողջ գործընթացն իրականացնելու և այն արդյունավետ դարձնելու համար անհրաժեշտ է նաև հանրության համախմբում և փողոցային պայքար։ "Առանց այդ բաղադրիչների վարչապետին անվստահություն հայտնելու գործընթացը հնարավոր չի լինի", - վստահ է Մամիջանյանը:

Հիշեցնենք, որ գործող վարչապետին անվստահություն հայտնելու հարցը խորհրդարանում կարող է քննարկվել միայն այն դեպքում, եթե առնվազն 36 պատգամավոր ներկայացնի գործընթացը սկսելու համար անհրաժեշտ ստորագրությունները: Ընդդիմադիր երկու խմբակցությունները ("Հայաստան" և "Պատիվ ունեմ") միասին կազմում են 34 պատգամավոր։ Եվս չորսն ունեն անկախ կարգավիճակ։ Կառավարության ղեկավարին անվստահություն հայտնելու համար իմփիչմենտի օգտին պետք է քվեարկի 107 պատգամավորներից, առնվազն, 54-ը: