Ղազախստանի Մաժիլիսը հավանություն է տվել միգրացիայի ոլորտում հայ-ղազախական համագործակցության շուրջ համաձայնագրին

Արմինֆո. Ղազախստանի Մաժիլիսն այսօր լիագումար նիստում վավերացրել է Ղազախստանի և Հայաստանի կառավարությունների միջև միգրացիայի ոլորտում համագործակցության շուրջ համաձայնագիրը, որն ստորագրվել է 2024 թվականի ապրիլի 15-ին Երեւանում: Այդ մասին հաղորդում է Kazinform-ը։

Համաձայնագիրն ուղղված է միգրացիոն ոլորտում երկու երկրների իրավասու մարմինների միջև փոխգործակցության կարգավորմանը և կոչված է նպաստելու երկկողմ համագործակցության ամրապնդմանը:

Ղազախստանի կողմից պատասխանատու գերատեսչություններ են սահմանվել Ներքին գործերի նախարարությունը և Բնակչության աշխատանքի և սոցիալական պաշտպանության նախարարությունը, Հայաստանի կողմից՝ Ոստիկանությունը և ՆԳՆ միգրացիայի և քաղաքացիության ծառայությունը:

Կողմերը պայմանավորվել են փոխանակել վիճակագրական, իրավական և գիտամեթոդական տեղեկատվություն, պետությունների տարածքում գտնվող քաղաքացիների վերաբերյալ տվյալներ, ինչպես նաև տեղեկություններ միգրացիոն օրենսդրության հայտնաբերված խախտումների մասին: Բացի այդ, համատեղ կքննարկվեն քաղաքացիների կացության իրավական կարգավիճակի հարցերը, և օգնություն կցուցաբերվի ծագող հարցերի վերաբերյալ: Նման փոխանակումն անհրաժեշտ է, մասնավորապես, երկքաղաքացիության դեմ պայքարի եւ անօրինական միգրացիայի ուղիները կանխելու համար։

"Համաձայնագրով նախատեսվում է հարցումների կատարման մերժում ինքնիշխանությանը, անվտանգությանը սպառնալիքի և օրենսդրությանը հակասելու դեպքում։ Համանման համաձայնագրեր են կնքվել 6 երկրների հետ", - նշել է նախագիծը ներկայացնող ներքին գործերի նախարար Երժան Սադենովը։

 Քննարկման ընթացքում պատգամավոր Եկատերինա Սմիշլյաևան բարձրացրել է անձնական տվյալների պաշտպանության հարցը: Նա ճշտել է, թե արդյոք նախատեսված չեն փոխանցվող տեղեկատվության ծավալի սահմանափակումներ, և ինչպես է ապահովվելու դրա անվտանգությունը:

Նախարար Սադենովը պարզաբանել է. "Կողմերը պարտավոր են ապահովել անձնական տվյալների պաշտպանությունը երկու կողմից։ Պատասխանատվությունը կրում են Ղազախստանի Հանրապետության ներքին գործերի նախարարությունը և Հայաստանի Հանրապետության ներքին գործերի նախարարությունը: Հարցումները կլինեն խստորեն պաշտպանված խողովակներով: Սույն համաձայնագրի 11-րդ հոդվածում հստակ կանոնակարգված է այդ ամենը։ Եթե հարցումների վերաբերյալ կասկածներ լինեն, մենք իրավունք ունենք համոզվել, ուսումնասիրել այդ հարցը, մենք իրավունք ունենք մերժել։ Համաձայնագրում դա գրված է"։

 Քննարկման ընթացքում նաև նշվել է, որ այսօրվա դրությամբ Ղազախստանում աշխատում է Հայաստանի 2134 քաղաքացի, մինչդեռ, նախորդ տարի նրանց թիվը 2623 էր: