ՀԷՑ-ի հնարավոր գնորդը ստիպված կլինի հաշվի նստել բարձր ռիսկերի հետ․Ղազինյան

Արմինֆո.  "Հայաստանի էլեկտրական ցանցերի" հնարավոր գնորդն ապագայում կարող է բախվել լուրջ իրավական հետեւանքների։ Այդ մասին օգոստոսի 27-ին կայացած մամուլի ասուլիսում հայտարարել է ՀԷՑ-ի գործադիր տնօրենի տեղակալի նախկին պաշտոնակատար, վաճառքի դեպարտամենտի տնօրեն Դավիթ Ղազինյանը։

"ՀԷՑ - ի հնարավոր գնորդը պետք է հաշվարկի բազմաթիվ ռիսկեր, իսկ բոլոր ռիսկերը գնահատելու դեպքում՝ գնորդ չի լինի", - ասել է Ղազինյանը:

Նրա խոսքով՝  հարցի բարոյական կողմից զատ առկա է նաև իրավական ասպեկտը, եւ, նույնիսկ, բարեխիղճ գնորդը կարող է բախվել շատ լուրջ իրավական հետևանքների։

"Համոզված եմ, որ իշխանափոխությունից հետո սա շատ լուրջ քրեական գործ է դառնալու. ցուցմունք են տալու միմյանց դեմ այն մասին, թե ով ում է զանգել, ով է ղեկավարել հանձնաժողովը (ՀԾԿՀ-խմբ.)", - նշել է Դավիթ Ղազինյանը:

Հիշեցնենք, որ հուլիսի 18-ին Հանրային ծառայությունները կարգավորող հանձնաժողովի նախագահի որոշմամբ Ռոմանոս Պետրոսյանը նշանակվել է ՀԷՑ-ի ժամանակավոր կառավարիչ ՝ "Էլցանցերի" նկատմամբ վարչական վարույթի և կանխարգելիչ միջոցառումների կիրառման շրջանակներում: Պետրոսյանի նշանակումը տեղի է ունեցել "Տաշիր" ընկերությունների խմբին պատկանող "Հայաստանի էլեկտրական ցանցերի" հնարավոր պետականացման մասին վարչապետ Նիկոլ Փաշինյանի հայտարարությունների ֆոնին: Հուլիսի 21-ին "Հայաստանի էլեկտրական ցանցեր" (ՀԷՑ) ընկերության վաճառքի գծով տնօրեն և ղեկավարի պաշտոնակատար Դավիթ Ղազինյանն ազատվել է զբաղեցրած պաշտոնից:

Հուլիսի 22-ին "Տաշիր" ընկերությունների խմբի ղեկավար Սամվել Կարապետյանը (կալանավորվել է Հայ Առաքելական Եկեղեցուն հրապարակային աջակցություն հայտնելուց հետո) եւ նրա ընտանիքը շահել են ՀԷՑ-ի պետականացման գործով Հայաստանի կառավարության դեմ արբիտրաժային վեճը:

Այնուամենայնիվ, Հայաստանի կառավարությունը, «յուրովի» մեկնաբանելով Ստոկհոլմի Առեւտրի պալատի արբիտրաժային ինստիտուտի որոշումը, հայտարարել է, որ "անհետաձգելի գործում քննարկվող հարցերի (վեճի) ծավալը տարբերվում է ժամանակավոր կառավարիչ նշանակելու մասին որոշման նպատակներից եւ այն գործողությունների ծավալից, որոնք պետք է ձեռնարկի վերջինս": "Հարգելով օտարերկրյա արբիտրաժային որոշումներով կիրառվող միջանկյալ միջոցները, միաժամանակ բոլորը պարտավոր են ղեկավարվել Հայաստանի Հանրապետության օրենսդրությամբ և արբիտրաժային որոշումների ճանաչման և կատարման կանոններն ու ընթացակարգերը սահմանող միջազգային պայմանագրերով", - ասվում է Հայաստանի կառավարության հայտարարության մեջ:

ՀԷՑ-ի ժամանակավոր կառավարիչ Ռոմանոս Պետրոսյանն, իր հերթին, նշել է, որ արբիտրաժի վճիռը Հայաստանում իրավական ուժ կստանա միայն դատարանի համապատասխան որոշումից հետո եւ հուլիսի 24-ից սկսել է կադրային փոփոխություններ կատարել "Հայաստանի էլեկտրական ցանցեր" ընկերության ղեկավար կազմում: ՀՀ արդարադատության նախարար Սրբուհի Գալյանն, իր հերթին, նշել է, որ Ստոկհոլմի Առևտրի պալատի արբիտրաժային ինստիտուտի որոշումը, որը կայացվել է հօգուտ Սամվել Կարապետյանի Հայաստանի դեմ արբիտրաժում, ենթակա չէ պարտադիր կատարման, եթե այն հակասում է հասարակական կարգին: Նա նաև վստահեցրել է, որ ՀԷՑ-ի ազգայնացման դեպքում Սամվել Կարապետյանը փոխհատուցում կստանա: