«Համահայկական խաղերի համաշխարհային կոմիտեն» Կոտայքում մարզական գյուղ կկառուցի

Արմինֆո. "Պատիվ ունեմ" ընդդիմադիր խմբակցության նախկին պատգամավոր, այժմ Ազգային ժողովի անկախ պատգամավոր Իշխան Զաքարյանի ղեկավարած "Համահայկական խաղերի համաշխարհային կոմիտե" հասարակական կազմակերպությանը տարածք կփոխանցվի Կոտայքի մարզում: Տարածքում նախատեսվում է կառուցել Համահայկական խաղերի մարզական գյուղ, որը կծառայի որպես մարզիկների բնակության վայր Համահայկական խաղերի (ձմեռային և ամառային) ժամանակ:

Ինչպես ասվում է որոշման հիմնավորման մեջ, «Ջրվեժ» անտառպարկը  հիմնադրվել է 1977 թվականին, այն գտնվում է Հայաստանի Հանրապետության Կոտայքի մարզի հարավ-արևմտյան մասում` Աբովյանի տարածաշրջանում 1400 մ բարձրության վրա: ««Ջրվեժ» անտառպարկի ստեղծման հիմնական նպատակն արհեստական պայմաններում աճեցված տեղական և 100-ից ավելի ներմուծված ծառաթփային տեսակների, պարտեզային ձևերի և դարավանդավորված տեղանքի հետ համադրվող տնտեսական, գեղազարդային և գիտական նշանակություն ունեցող  պարկաշինության եզակի նմուշների պահպանության, վերարտադրության, նրանց էկոլոգիական առանձնահատկությունների ուսումնասիրության իրականացումն է, ինչպես նաև  ընտրված և կլիմայավարժեցված լավագույն տեսակների ներդրումը կանաչ շինարարության տարբեր բնագավառներում: Անտառպարկում աճում են նաև ՀՀ Կարմիր գրքում գրանցված հազվագյուտ և անհետացող 21 բուսատեսակներ (սոսի արևելյան, գիհի բազմապտուղ, գիհի կազակական, նշենի սովորական և այլն): Բնական ֆլորան կազմված է ավելի քան 300 բարձրակարգ ծաղկավոր բուսատեսակներից: Այս գոտու համար բնորոշ մնացորդային էկոհամակարգերում տարածված են Հայաստանի համար էնդեմիկ հանդիսացող 11 տեսակի բզեզներ:

«Համահայկական խաղերի համաշխարհային կոմիտե»-ի միջոցով ֆինանսավորվելու է «Համահայկական խաղերի համաշխարհային կոմիտե» հասարակական կազմակերպության կանոնադրական նպատակներին համապատասխան ավանի պահպանման ծախսերը և ավանը օգտագործվելու է որպես Համահայկական խաղերի անցկացման, իսկ խաղերից դուրս՝ երիտասարդական տարբեր հավաքների, Հայաստան-Սփյուռք բազմաբովանդակ միջոցառումների, հանգստի և ժամանցի կազմակերպման բազմաֆունկցիոնալ մարզական բազմաբովանդակ ծրագրերի ապահովման միջոց:

«Համահայկական խաղերի համաշխարհային կոմիտե» հասարակական կազմակերպության կողմից առաջին փուլում տեղադրվելու են էկո տնակներ, ճաշարան և բժշկական սպասարկման կենտրոն։ Վերոնշյալ կառույցները չեն ենթադրում հիմնական շինություններ։ Հաջորդ փուլերում նախատեսվում են սպորտային տարբեր հարթակների և մարզասրահների կառուցում։ Յուրաքանչյուր տնակի համար անհրաժեշտ կլինի հարթեցնել 110-120 քմ հողատարածք։ Տնակների հավաքումը նախատեսվում է ոչ անտառածածկ տարածքներում։ Ծրագրի ընդհանուր արժեքը կազմելու է մոտ 20,900,000,000 (քսան միլիարդ ինը հարյուր միլիոն) ՀՀ դրամ։

Ներդրումային ծրագրով նախատեսված միջոցառումների արդյունքում ակնկալվում է, որ «Համահայկական խաղերի համաշխարհային կոմիտե» հասարակական կազմակերպությունը նախատեսված ծրագրային 3 փուլերի ավարտից հետո, ավանի ամբողջական ծանրաբեռնվածության դեպքում, կստեղծվի շուրջ 1240 նոր աշխատատեղ, ինչպես նաև կտնկվի շուրջ 20,000 ծառ։