Դավիթ Ղազինյանը նոր հայց է ներկայացրել ՀԷՑ-ի դեմ

Արմինֆո. "Հայաստանի էլեկտրական ցանցեր" ՓԲԸ գործադիր տնօրենի տեղակալի նախկին պաշտոնակատար, վաճառքի դեպարտամենտի տնօրեն Դավիթ Ղազինյանը նոր հայց է ներկայացրել ընդդեմ "Հայաստանի էլեկտրական ցանցեր" ՓԲԸ: Այդ մասին հաղորդվում է Datalex դատական տեղեկատվական պորտալը։

Տեղեկատվության համաձայն՝ հայցադիմումը ներկայացվել է օգոսստոսի 18-ին։ Հայցի շրջանակում Ղազինյանը պահանջում է պարտավորեցնել ՀԷՑ-ին պետական գրանցման ներկայացնել ՀԷՑ ՓԲԸ 2025 թվականի հուլիսի 14-ին Կանոնադրության մեջ կատարված փոփոխությունները, վերականգնել իրեն տնօրենի ժամանակավոր պաշտոնակատարի պաշտոնում, ինչպես նաև սահմանել ՀԷՑ գործադիր մարմնի ղեկավարի ժամանակավոր պաշտոնակատարի և ժամանակավոր կառավարչի լիազորությունների սահմանները:

Ավելի վաղ, հուլիսի 25-ին ներկայացված հայցով Ղազինյանը պահանջել էր անվավեր ճանաչել ՀԷՑ ՓԲԸ 21.07.2025 թ.թիվ Կ-550-Ա հրամանը և իրեն վերականգնել  նախկին պաշտոնում:

Հիշեցնենք, որ հուլիսի 18-ին Հանրային ծառայությունները կարգավորող հանձնաժողովի նախագահի որոշմամբ Ռոմանոս Պետրոսյանը նշանակվել էր ՀԷՑ-ի ժամանակավոր կառավարիչ ՝ "Էլցանցերի" նկատմամբ վարչական վարույթի և կանխարգելիչ միջոցառումների կիրառման շրջանակներում: Պետրոսյանի նշանակումը տեղի է ունեցել "Տաշիր" ընկերությունների խմբին պատկանող "Հայաստանի էլեկտրական ցանցերի" հնարավոր պետականացման մասին վարչապետ Նիկոլ Փաշինյանի հայտարարությունների ֆոնին:

Հուլիսի 21-ին "Հայաստանի էլեկտրական ցանցեր" (ՀԷՑ) ընկերության վաճառքի գծով տնօրեն և ղեկավարի պաշտոնակատար Դավիթ Ղազինյանն ազատվել է զբաղեցրած պաշտոնից:

Հիշեցնենք, որ 2015 թվականին ռուսական "Ինտեր ՌԱՕ ԵԷՍ" ընկերությունը որոշեց վաճառել Հայաստանում իր էլեկտրաէներգետիկ ակտիվները, այդ թվում ՝ ՀԷՑ-ը։ Որպես գնորդ հանդես եկավ Liormand Holdings Limited ընկերությունը, որը ձեռք բերեց "Հայաստանի էլեկտրական ցանցեր" ընկերության բաժնետոմսերի 30% - ը, իսկ մնացած 70% - ը գնեց "Տաշիր Կապիտալ"ընկերությունը: