Քաղաքագետ. ԱՄՆ-ն ամրապնդում է իր դիրքերը Հարավային Կովկասում՝ Բաքվին վերածելով ռազմավարական գործընկերոջ՝ էներգակիրների տարանցման հարցում

Արմինֆո. Մեզ բաժին են հասնում կենացներ, Բաքվին՝ կոնկրետ դիվիդենտներ: Ֆեյսբուքյան իր էջում նման կարծիք է հայտնել քաղաքագետ Սուրեն Սուրենյանցը՝ ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի հետ ԱՄՆ նախագահ Դոնալդ Թրամփի  այսօր Վաշինգտոնում կայանալիք հանդիպման առնչությամբ:

«Վաշինգտոնում ստորագրվել է համագործակցության հուշագիր ադրբեջանական SOCAR-ի և ամերիկյան նավթային հսկա ExxonMobil-ի միջև։ Սա սովորական էներգետիկ գործարք չէ․ սա քաղաքական ուղերձ է։

ԱՄՆ-ն ամրապնդում է իր դիրքերը Հարավային Կովկասում՝ Բաքվին վերածելով ռազմավարական գործընկերոջ՝ Կասպից ծովի էներգակիրների տարանցման հարցում։

Ուշագրավ է, որ հուշագիրը ստորագրվում է այն պահին, երբ քննարկվում է նաև Սյունիքով «Թրամփի ճանապարհի» կառուցումը՝ հավանական էներգետիկ տարանցման հեռանկարով։

Հայաստանի համար սա զգուշացնող ազդակ է՝ մեր տարածքը կարող է դառնալ մեծ խաղերի օբյեկտ, եթե մենք ինքներս չձևավորենք սեփական օրակարգ», - ընդգծել է քաղաքագետը:

Հիշեցնենք, որ այսօր ՝ օգոստոսի 8-ին, Սպիտակ տանը կկայանա ԱՄՆ-ի, Հայաստանի և Ադրբեջանի ղեկավարների եռակողմ հանդիպում: Թրամփ - Փաշինյան հանդիպումը նախատեսված է Վաշինգտոնի ժամանակով 14:30-ին (Երևանի ժամանակով 22:30-ին), Ալիևի հետ ՝ 15:20-ին (Երևանի ժամանակով 23:20-ին): Երկկողմ բանակցությունների ավարտին ժամը 16:00-ին (Երևանի ժամանակով 24: 00-ին) նախատեսված է ԱՄՆ-ի, Ադրբեջանի և Հայաստանի ղեկավարների համատեղ հայտարարություն: