Դաշնակցականը՝ զինակիցների հետապնդումների մասին. Փաշինյանը փորձում է ոչնչացնել դիմադրության բոլոր օջախները

Արմինֆո. Երկրում տեղի ունեցող բոլոր գործընթացները, ներառյալ իշխանության ընդդիմախոսների ձերբակալություններն ու քաղաքական բռնաճնշումները, պետք է դիտարկել ՀՀ վարչապետ Նիկոլ Փաշինյանի՝ գոյություն ունեցող դիմադրության բոլոր օջախները ոչնչացնելու փորձի համատեքստում: Այդ մասին լրագրողների հետ զրույցում հայտարարել է ԱԺ ընդդիմադիր "Հայաստան" խմբակցության պատգամավոր, ՀՅԴ գերագույն մարմնի ներկայացուցիչ Իշխան Սաղաթելյանը՝ անդրադառնալով ՀՅԴ անդամների շարունակվող ձերբակալություններին։

Նա նշել է, որ իրավիճակը պարզ է և ակնհայտ. կուսակցության անդամների տներն արդեն խուզարկության են ենթարկվել, և սա նոր երևույթ չէ. նման գործողությունները շարունակվում են վերջին հինգ տարիների ընթացքում:

Սաղաթելյանը, սակայն, ուշադրություն է հրավիրել այն հանգամանքի վրա, որ տեղի ունեցածը, ներառյալ կուսակցության երիտասարդական շարժման անդամներին, իբր, "ահաբեկչություն" կազմակերպելու համար առաջադրված մեղադրանքները, ավելի լուրջ մասշտաբի խուլիգանության դրսեւորում է, որն իրականացվում է ՀՀ վարչապետի հրահանգով եւ ուժային կառույցների անմիջական մասնակցությամբ:

Դաշնակցականը համոզված է, որ ձերբակալությունները տեղի են ունենում երկրում առկա գործընթացների դեմ հանդես եկող ազգային եւ համահայկական կուսակցության հնարավոր դիմակայության առնչությամբ, հատկապես, Հայաստանի եւ Ադրբեջանի միջեւ բանակցությունների բովանդակության հետ կապված:

"ՀՅԴ-ն, որպես քաղաքական ուժ, ակտիվորեն պայքարում է պետականության կորստի վտանգի դեմ։ Այս գործերը շուտով բոլորի համար ակնհայտ կդառնան, և պարզ կդառնա, որ "ահաբեկչության" ոչ մի փորձ չի եղել ։ Այդ ամենը սարքվել է, այդ թվում ՝ քննիչների կողմից", - ընդգծել է Սաղաթելյանը։

Նա նաև համոզմունք է հայտնել, որ ընդդիմադիրների չեզոքացման օրակարգն առկա է Ադրբեջանի հետ կապիտուլյացիոն պայմանագրում, որը Փաշինյանն անվանում է "խաղաղության պայմանագիր": "Այդ պայմանագրում ակնհայտորեն պարունակվում է այն ամենը, ինչ հիմա տեղի է ունենում երկրում, այն է ՝ "ռևանշիստական ուժերն" արմատախիլ անելու պահանջը՝ դրանով իսկ սահմանափակելով նրանց գործունեությունը։ Այսինքն,  խոսքը բոլոր նրանց մասին է, ովքեր հանդես են գալիս ազգային շահերի օգտին ։ Ակնհայտ է, որ Նիկոլ Փաշինյանը պայմանավորվածություն ունի Ադրբեջանի նախագահ Իլհամ Ալիևի հետ՝ սյս բոլոր գործողություններն իրականացնելու վերաբերյալ: Չէ որ բոլորի համար պարզ է, որ քանի դեռ գոյություն ունի «Դաշնակցությունը», թուրքերն ու ադրբեջանցիները չեն կարողանա իրենց հարմարավետ զգալ Հայաստանում եւ չեն կարողանա թուրքացնել երկիրը", - նշել է Սաղաթելյանը։

Այդ առումով նա նաև հիշեցրել է, որ ՀՅԴ գոյության 130 տարիների ընթացքում բազմիցս փորձեր են արվել կասեցնելու կուսակցության գործունեությունը: Սաղաթելյանը, սակայն, համոզված է, որ քաղաքական ուժը շարունակելու է իր գոյությունը, քանի որ նրա գործունեությունը բխում է հայ հասարակության շահերից:

"Երկրի սահմանների վրա առաջին իսկ հարձակման ժամանակ հենց դաշնակներն էին այնտեղ մեկնում՝ հայրենիքը պաշտպանելու։ Դաշնակների զենքը միշտ ուղղված է եղել արտաքին թշնամիներին։ Եվ հիմա այդ մարդկանց ահաբեկչության մեջ մեղադրելն ուղղակի զզվելի է և, նույնիսկ, ծիծաղելի", - ամփոփել է պատգամավորը։

Հիշեցնենք, որ հուլիսի 9-ին Հայաստանի իրավապահ մարմինների ներկայացուցիչները խուզարկություններ են իրականացրել ՀՅԴ մի շարք անդամների տներում, այդ թվում ՝ ԱԺ ընդդիմադիր "Հայաստան" խմբակցության պատգամավոր Գեղամ Մանուկյանի տանը: Ինչպես հաղորդել է ՀՀ քննչական կոմիտեի մամուլի ծառայությունը, «ահաբեկչության նախապատրաստման» մասին գործով ձերբակալվել է 7 անձ ։ Ընդ որում, դաշնակցականները վստահ են, որ իրենց զինակիցների ձերբակալությունները հերթական քաղաքական պատվերն են։