Իրավապահ մարմինների աշխատակիցները չեն բացատրում "Հայաստանի էլեկտրական ցանցեր" ընկերության աշխատակիցների մուտքն աշխատավայր թույլ չտալու պատճառները

Արմինֆո.  Իրավապահ մարմինների աշխատակիցները չեն բացատրում "Հայաստանի էլեկտրական ցանցեր" ընկերության աշխատակիցների մուտքն աշխատավայր թույլ չտալու պատճառները: Այդ մասին ԱրմԻնֆո-ի թղթակցին հաղորդել է ՀԷՑ-ի մամուլի քարտուղար Նատալյա Սարջանյանը:

Նա նշել է, որ առավոտյան ժամը 09:00-ին ընկերության գլխամասային գրասենյակի աշխատակիցները ժամանել են աշխատավայր, սակայն, ինչպես պարզվել է, արդեն ժամը 08:00-ից իրավապահները շրջափակել էին շենքը՝ իրականացնելով խուզարկություններ: "Մենք առայժմ ոչինչ չգիտենք, միայն գիտենք, որ ընկերության գլխավոր տնօրենի պաշտոնակատարը գտնվում է ընկերության շենքում", - նշել է մամուլի քարտուղարը:

Վաղ առավոտից ԱԱԾ դիմակավորված աշխատակիցներն ընկերության աշխատակիցներին թույլ չեն տվել մուտք գորրրծել աշխատավայր: Միաժամանակ իրավապահներն առավոտից ներխուժել են ՀԷՑ-ի տնօրենների խորհրդի նախագահ Նարեկ Կարապետյանի տուն, որտեղ նույնպես խուզարկություններ են իրականացրել: Նարեկ Կարապետյանը "Տաշիր" ընկերությունների խմբի նախագահ Սամվել Կարապետյանի եղբորորդին է:

Ավելի վաղ Հայաստանի խորհրդարանն ընդունել էր օրենսդրական փոփոխությունների փաթեթ, որոնք ուղղված են "Տաշիր" ընկերությանը պատկանող "ՀԷՑ" - ի ազգայնացմանը:

Հիշեցնենք, որ բարերար եւ "Տաշիր" ընկերությունների խմբի նախագահ Սամվել Կարապետյանը Հայաստանի իրավապահ մարմինների կողմից ձերբակալվել էր հունիսի 18-ի գիշերը Երեւանում՝ այն բանից հետո, երբ Հայ Առաքելական Եկեղեցուն աջակցություն էր հայտնել: Դրան ի պատասխան ՝ բացահայտ սպառնալիքներ էին հնչել վարչապետի կողմից։ Հունիսի 19-ի գիշերը Երևանի ընդհանուր իրավասության դատարանը երկու ամսով կալանավորել է Սամվել Կարապետյանին: Նա պահվում է "Երևան - Կենտրոն" ՔԿՀ-ում (հայտնի "ՊԱԿ-ի նկուղը" ՝ ԱԱԾ շենքում)։ Նրան մեղսագրվում են երկրում իշխանությունը զավթելու հրապարակային կոչեր։ Կարապետյանը մեղքը չի ընդունում։