Սամվել Կարապետյանը դատական կարգով ներողություն է պահանջում Արսեն Թորոսյանից և Հայկ Կոնջորյանից՝ զրպարտության համար

Արմինֆո. "Տաշիր" ընկերությունների խմբի ղեկավար Սամվել Կարապետյանը դատական հայց է ներկայացրել "Քաղաքացիական պայմանագիր" խմբակցության պատգամավորներ Արսեն Թորոսյանի և Հայկ Կոնջորյանի դեմ՝ վիրավորական արտահայտությունների և զրպարտության համար: Այդ մասին տեղեկատվություն է զետեղված դատական տեղեկատվական Datalex.am պորտալում:

Կարապետյանը դատարանից պահանջում է պարտավորեցնել Արսեն Թորոսյանին և Հայկ Կոնջորյանին հրապարակայնորեն ներողություն խնդրել Սամվել Կարապետյանից վիրավորական արտահայտությունների համար և հերքել հունիսի 17-ին և 18-ին ՀՀ Ազգային ժողովի ամբիոնից հնչեցրած տեղեկությունները, ինչպես նաև վճարել 9 մլն դրամ փոխհատուցում:

Հիշեցնենք, որ այն ժամանակ Հայաստանի առողջապահության նախկին նախարար Արսեն Թորոսյանը խորհրդարանական ամբիոնից Կարապետյանին մեղադրել էր "Լուբյանկայի"՝ ԱԴԾ (Ըստ Թորոսյանի ՝ "Լյուբլյանկա") հետ կապերի համար։

Կոնջորյանն, իր հերթին, Ամենայն հայոց Գարեգին Բ կաթողիկոսի վեղարը համեմատել էր "մարտագլխիկի" հետ, որի տակ "հավաքվել են ամեն տեսակի հանցագործներ՝ օլիգարխներ, նախկին թալանչիներ, իզգոյներ, սրբապիղծներ և կեղծարարներ", "բոլորը հավաքվել են այդ մարտագլխիկի տակ, ուզում են կրակել պետության վրա": "Իսկ երեկ այդ մարտագլխիկի տակ սահուն հայտնվեց նաև ՀԷՑ - ի սեփականատեր Սամվել Կարապետյանը", - ասել էր նա: Կոնջորյանը նաեւ հայտարարել էր, որ Սամվել Կարապետյանն ստանձնել է  "որոշ անբարոյական հոգեւորականների պաշտպանությունը, ունենալով գործակալական հավակնություններ, հանդես գալով որպես, այսպես կոչված, տրոյական ձի": Միևնույն ժամանակ, նա գործարարին մեղադրել էր այն բանում, որ վերջինս "տասնամյակներ շարունակ օգտագործել և թալանել է հայ ժողովրդին և Հայաստանի Հանրապետությունը, պետական գույքը ստացել է 10-100 անգամ ավելի էժան գներով և փոխարենը ինչ-որ տեղ աննշան ինչ-որ բան կառուցել՝ այն ներկայացնելով որպես բարեգործություն":

Հիշեցնենք, որ բարերար եւ "Տաշիր" ընկերությունների խմբի նախագահ Սամվել Կարապետյանը ձերբակալվել էր հունիսի 18-ի գիշերը Երեւանում Հայաստանի իրավապահ մարմինների կողմից՝ այն բանից հետո, երբ Հայ Առաքելական Եկեղեցուն աջակցություն էր հայտնել: Դրան ի պատասխան՝ բացահայտ սպառնալիքներ էին եղել վարչապետի կողմից։ Հունիսի 19-ի գիշերը Երևանի ընդհանուր իրավասության դատարանը երկու ամսով կալանավորել է Սամվել Կարապետյանին: Նա պահվում է "Երևան - Կենտրոն" ՔԿՀ-ում (ԱԱԾ շենքում)։ Նրան մեղադրում են երկրում իշխանությունը զավթելու հրապարակային կոչերի համար։ Կարապետյանը մեղքը չի ընդունում։

Հուլիսի 1-ին Սամվել Կարապետյանի պաշշտպանության խորհուրդը հաղորդել էր, որ հուլիսի 4-ին ՝ ժամը 18:00-ին, Երևանի Մաշտոցի պողոտայի (Մալիբու) Seasons այգում կմեկնարկի քայլերթ դեպի Սամվել Կարապետյանի ապօրինի ձերբակալման վայր: