"Ոսկե ծիրանի" տարածաշրջանային մրցութային ծրագրում ընդգրկվել է հայ ռեժիսորի ընդամենը մեկ ֆիլմ

Արմինֆո.  "Ոսկե ծիրան" 22-րդ միջազգային կինոփառատոնի տարածաշրջանային մրցութային ծրագիրը ներկայացված է Վրաստանի, Իրանի, Հայաստանի, Մեքսիկայի, ԱՄՆ-ի, Նիդերլանդների, Նորվեգիայի, Գերմանիայի, Եգիպտոսի, Լեհաստանի, Քաթարի, Սաուդյան Արաբիայի և այլ ֆիլմերով:

Որպես "Ոսկե ծիրանի" տարածաշրջանային մրցութային ծրագրի նախագահ հրավիրվել է իրանցի ռեժիսոր, սցենարիստ, լուսանկարիչ Ամիր Նադերին: Նրան կմիանան հոլիվուդյան հայազգի դերասան Կարեն Կարագուլյանը և ռուս ռեժիսոր Կիրա Կովալենկոն:

Կինոփառատոնի կազմակերպիչների մամուլի ծառայության հաղորդգարության համաձայն, տարածաշրջանային մրցութային ծրագրում ներառված են հետեւյալ աշխատանքները. «Իմագո» (Վրաստան),  ռեժիսոր՝ Դենի Ումար Պիցաև, Աբխազիայից բռնագաղթի, ինքնության և խարանված հիշողության սահմանները քանդող հոգեբանական դրամա, որի պրեմիերան կայացել է Կաննի միջազգային կինոփառատոնում;  «Երազելուց հետո» (Հայաստան/Մեքսիկա/ԱՄՆ),  ռեժիսոր՝ Քրիստինե Հարությունյան,

նուրբ կինեմատոգրաֆիկ հայացք՝ իրարամերժ հիշողությունների, երազների ու իրականության փխրուն սահմանի մասին, պրեմիերա՝ Բեռլինի միջազգային կինոփառատոն;  «Ամբոխը» (Իրան),  ռեժ.՝ Սահանդ Քաբիրի, քաղաքական և էթիկական ընդվզման վավերագրություն Իրանի փողոցներում ձևավորվող դիմադրության մասին, պրեմիերա` Ռոտերդամի միջազգային կինոփառատոն;  «Տիգրիս գետի առյուծները» (Նորվեգիա/Նիդերլանդներ),  ռեժ.՝ Զարադաշտ Ահմեդ, տրագիկոմիկ մոտիվներով լի անձնական պատմություն Իրաքի պատերազմի հետևանքների և քաղաքական հիշողության մասին, պրեմիերա՝ Կոպենհագենի միջազգային վավերագրական ֆիլմերի փառատոն (CPH:DOX);  «Աբո Զաաբալ 89» (Գերմանիա/Եգիպտոս),   ռեժ.՝ Բասսամ Մորտադա, քաղաքական բռնության մոռացված էջի վերաիմաստավորում՝ Աբո Զաաբալի բանտում 1989 թվականին տեղի ունեցած դեպքերի մասին, պրեմիերա՝ Կահիրեի միջազգային կինոփառատոն;  «Այշան չի կարող թռչել հեռանալ», (Թունիս/Քաթար/Եգիպտոս/Ֆրանսիա/Սաուդյան Արաբիա/Սուդան/Գերմանիա),  ռեժ.՝ Մորադ Մոստաֆա,

սոցիալական պատում անօրինական ներգաղթի, սեռական բռնության և համակեցության ճգնաժամի մասին Կահիրեի մարգինալ ոլորաններում, պրեմիերա` Կաննի միջազգային կինոփառատոն;  «Խելահեղ խոժոռմունք» (Լիբանան),  ռեժ.՝ Օմար Միսմար, արվեստի, ճարտարապետության և քաղաքական անորոշության միջև ընթացող ֆիլմ-էսսե Բեյրութի փլուզվող իրականության մասին, պրեմիերա` Ամստերդամի վավերագրական ֆիլմերի միջազգային կինոփառատոն (IDFA);  «Սիրտդ ձեռքդ առ ու քայլիր» (Ֆրանսիա/Պաղեստին/Իրան),   ռեժ.՝ Սեփիդե Ֆարսի, պատմություն կանացի տոկունության և գիտակցական մոռացության մասին կրոնական և քաղաքական ճնշումների ֆոնին, պրեմիերա՝ Կաննի միջազգային կինոփառատոն;  «Թեհրան. անավարտ պատմություն» (Իրան),  ռեժ.՝ Սաիդ Նուրի, նրբին վավերագրություն Թեհրանի անցյալի ստվերների և ներկայի ճարտարապետական լաբիրինթոսների մասին,  պրեմիերա` Ռոտերդամի միջազգային կինոփառատոն;  «Ժուկով-ժամանակով Գազայում» (Պաղեստին/ԱՄԷ/Ֆրանսիա/Պորտուգալիա/Գերմանիա/ՄԹ/Հորդանան),  ռեժ.՝ Տարզան Նասեր, Արաբ Նասեր, Գազայի երիտասարդության առօրյան հումորի, ցավի ու քնարականություն քողի տակ, պրեմիերա` Կաննի միջազգային կինոփառատոն:

Նշենք, որ այս տարի "Ոսկե ծիրան" կինոփառատոնը կանցկացվի հուլիսի 13-20-ը, որի ընթացքում երևանյան հանդիսատեսին, ավանդույթի համաձայն, կներկայացվեն միջազգային առաջատար կինոփառատոններում (Կաննի, Բեռլինի, Վենետիկի և այլն) ընտրված կինոաշխատանքները: Սպասվում է համաշխարհային կինոյի նշանավոր գործիչների այցը, ովքեր հանրության հետ կկիսվեն իրենց փորձով և արվեստով: