Ապագայի գրավական. "Կերոն" հիմնադրամը կօգնի Ազգային ֆիլհարմոնիկ նվագախմբի շարքերն անհրաժեշտ երաժիշտներով համալրման հարցում

Արմինֆո."Կերոն" հիմնադրամն իր Talent Pool (տաղանդների հիմնադրամ) ծրագրի շրջանակում Հայաստան կհրավիրի տաղանդավոր երաժիշտների, այլ երկրների մասնագետների՝ ապրելու, աշխատելու և իրենց փորձով կիսվելու,  ովքեր կհամալրեն ազգային ֆիլհարմոնիկ նվագախմբի շարքերը:

Համագործակցության մասին համապատասխան հուշագիրը հունիսի 19-ին ստորագրել են Հայաստանի ազգային ֆիլհարմոնիկ նվագախմբի տնօրեն Նորայր Նազարյանը և <Կերոն> հիմնադրամի նախագահ Վանանե Արարքցյանը: Հուշագրի ստորագրման արարողության շրջանակում լրագրողների հետ զրույցում ազգային ֆիլհարմոնիկ նվագախմբի գեղարվեստական ղեկավար և գլխավոր դիրիժոր Էդուարդ Թոփչյանը նշել է, որ այսօր նվագախմբում բացակայում են տրոմբոնի, ֆլեյտա-պիկոլոյի, ֆագոտի, շեփորի  մենակատարները: Նա հույս է հայտնել, որ այս նախաձեռնության շնորհիվ հնարավոր կլինի Ազգային նվագախմբում առկա բացը  լրացնել եվրոպացի բարձր մակարդակի երաժիշտներով:

Մաեստրո Թոփչյանի ասելով՝ այդ երաժիշտները նաեւ կդասավանդեն հայ երաժիշտների երիտասարդ սերնդին, ինչը թույլ կտա մի քանի տարի հետո Հայաստանում լավ փողային դպրոց ունենալ, որի առնչությամբ հիմա որոշակի դժվարություններ կան: Աճող սերունդը, դրա շնորհիվ, ապագայում կկարողանա համալրել ոչ միայն Հայաստանի ֆիլհարմոնիկ, այլև այլ նվագախմբերի շարքերը, և արդյունքում բարձր մակարդակով ներկայացնել երաժշտական դասական արվեստը աշխարհին:

"Կերոն" հիմնադրամի ղեկավար Վանանե Արարքցյանն, իր հերթին, նշել է, որ որդեգրած քաղաքականության շրջանակներում հիմնադրամն ունի 5 ռազմավարական ուղղություն, որոնք միտված են մեր երկրում միջավայրի փոփոխությանը: Այդ 5 ուղղություններից «Կերոնն» առավել ուշադրություն է դարձնում հենց արվեստին եւ մշակույթին ՝ հաշվի առնելով այդ ուղղություններով իրականացված ծրագրերի կշիռը: "Եվ մեզ համար մեծ պատիվ է աշխատել դարավոր պատմություն ունեցող կառույցի հետ, եւ ես վստահ եմ, որ տարիներ անց, երկարաժամկետ հեռանկարում, մենք կտեսնենք մեր համագործակցության պտուղները", - ընդգծել է նա:

Նշենք, որ "Կերոն" հիմնադրամի "Տաղանդների հիմնադրամ" ծրագիրն ուղղված է աշխարհի տարբեր ոլորտների առաջատար մասնագետների ներգրավմանը, Հայաստանում 3-5 և ավելի տարի ժամկետով նրանց կյանքի և աշխատանքի համար կայուն հնարավորությունների ստեղծմանը, ինչպես նաև ոլորտների միջև համագործակցության և գիտելիքների փոխանցման խրախուսմանը ՝ նորարարությունների և աճի խթանման նպատակով:

"Կերոն" հիմնադրամը ստեղծվել է բոլորովին վերջերս՝ 2024թ. գարնանը: Նրա առաքելությունն է աջակցել Հայաստանում տրանսֆորմացիոն փոփոխություններին մշակույթի, կրթության, սպորտի, առողջապահության և տարածքային զարգացմանն աջակցող նախաձեռնությունների միջոցով ՝ միաժամանակ աջակցելով ողջ աշխարհի տաղանդներին և հզորացնելով տեղական հնարավորությունները: