Լոռիում իրականացվել են գետերի մաքրման լայնածավալ աշխատանքներ՝ նախորդ տարվա մայիսին տեղի ունեցած ջրհեղեղից հետո

Արմինֆո.  Լոռիում գետերի մաքրման լայնածավալ աշխատանքներ են իրականացվել անցած տարվա մայիսին տեղի ունեցած ջրհեղեղից հետո, որն իր հետևանքներն է թողել ոչ միայն բնակավայրերի, այլև ենթակառուցվածքների, ջրային համակարգերի և գետերի վրա: Այդ մասին հաղորդել է ՀՀ տարածքային կառավարման և ենթակառուցվածքների նախարարության "Մելիորացիա" ՓԲԸ տնօրեն Սասուն Միրոյանը։

Ընդհանուր առմամբ, աշխատանքներ են իրականացվել 5 գետերի՝ Դեբեդի, Փամբակի, Ձորագետի, Տաշիրի և Շնողի 13 տեղամասերում: Աշխատանքների ամենամեծ ծավալը բաժին է ընկել Դեբեդ գետին, որն ընդգրկել է 8 տեղամաս։

Այդ բոլոր գործընթացներն իրականացրել է "Մելիորացիա" ՓԲԸ-ն՝  ՀՀ Ջրային կոմիտեի ջրային համակարգերի օգտագործման և պահպանության տեխնիկական հանձնաժողովի ուսումնասիրության հիման վրա: Ընդհանուր առմամբ, աշխատանքներն ընդգրկել են 185 հազար խմ ծավալ:

Միրոյանը նշել է, որ վերջին անգամ գետերի մաքրման աշխատանքներ կատարվել էին մի քանի տասնյակ տարի առաջ: Այդ առնչությամբ նա նշել է, որ Հայաստանում հասունացել է ջրային ռեսուրսների եւ համակարգերի կառավարման եւ պահպանության նկատմամբ քաղաքացիների վերաբերմունքի փոփոխության անհրաժեշտությունը։

Միևնույն ժամանակ, "Մելիորացիա" ՓԲԸ ղեկավարը պատմել է կոլեկտորադրենաժային ցանցերի  մաքրման առաջիկա ծրագրերի մասին: Նրա խոսքով ՝ ընթացիկ տարում նախատեսվում է 175.5 կմ երկարությամբ ցանցերի մաքրում իրականացնել Արարատի, Արմավիրի, Կոտայքի և Լոռու մարզերում: Անցած տարի մաքրման աշխատանքներն ընդգրկել են 221 կմ:

Հիշեցնենք, որ 2024 թվականի մայիսի 26-ին Հայաստանի հյուսիսում տեղի էր ունեցել ջրհեղեղ՝ առատ տեղումների, հորդառատ անձրևի և Դեբեդ և Աղստև գետերի ափերից դուրս գալու հետևանքով, ինչը հանգեցրել էր ենթակառուցվածքների զգալի ավերածությունների և 4 մարդու մահվան։ Տարերքը վնասել էր ճանապարհներ, կամուրջներ ու երկաթուղային գծեր։ Աղետի հետևանքների վերացման նպատակով ՀՀ տարածքային կառավարման և ենթակառուցվածքների արդեն նախկին նախարար Գնել Սանոսյանի գլխավորությամբ ձևավորվել էր օպերատիվ խումբ: