ՌԴ դեսպանություն. Հայ ժողովրդի հետ սգում ենք Հայոց ցեղասպանության զոհերի հիշատակի օրվա կապակցությամբ

Արմինֆո.  Հայաստանում Ռուսաստանի դեսպանատունը Հայոց ցեղասպանության 110-րդ տարելիցի կապակցությամբ հրապարակում է տարածել:

"Սգում ենք հայ ժողովրդի հետ Օսմանյան կայսրությունում Հայոց ցեղասպանության զոհերի հիշատակի օրվա կապակցությամբ", - ասվում է սոցիալական ցանցերում Ռուսաստանի դեսպանատան հրապարակման մեջ:

1995թ.ապրիլի 14-ին Ռուսաստանի Դաշնային ժողովի Պետական դուման ընդունել է "1915-1922 թթ. հայ ժողովրդի ցեղասպանության դատապարտման մասին" հայտարարություն, որում արձանագրվել է, որ այն ընդունվել է 1915-1922 թթ. Արեւմտյան Հայաստանի տարածքում հայերի բնաջնջման մասին վկայող անհերքելի պատմական փաստերի հիման վրա: Փաստաթղթում, մասնավորապես, հիշեցվում է, որ Ռուսաստանի նախաձեռնությամբ եվրոպական մեծ տերությունները դեռևս 1915 թվականին Օսմանյան կայսրության գործողությունները հայ ժողովրդի նկատմամբ որակել են որպես հանցագործություն մարդկության դեմ: Դրանում նաեւ նշված է, որ եղբայրական հայ ժողովրդի ֆիզիկական բնաջնջումն իր պատմական հայրենիքում կատարվել է Ռուսաստանի կործանման համար պայմաններ ստեղծելու նպատակով: Պետական Դուման դատապարտել է հայերի բնաջնջման կազմակերպիչներին, ցավակցություն հայտնել հայ ժողովրդին և ապրիլի 24-ը ճանաչել Ցեղասպանության զոհերի հիշատակի օր:

2015 թվականի ապրիլի 24-ին Ռուսաստանի նախագահ Վլադիմիր Պուտինը մասնակցել է Հայոց ցեղասպանության զոհերի հիշատակի արարողությանը Ծիծեռնակաբերդի հուշահամալիրում: Իր խոսքում ռուսական պետության ղեկավարը հայտարարել է, որ 1915 թվականի իրադարձությունները ցնցեցին ողջ աշխարհը, իսկ Ռուսաստանում ընկալվեցին որպես սեփական վիշտ ՝ նշելով, որ հարյուր հազարավոր անպաշտպան և ապաստան կորցրած հայեր ապաստան ստացան Ռուսաստանի տարածքում և փրկվեցին:

Նախագահը նաև հիշեցրել է, որ հենց ռուսական դիվանագիտությունն է հասել հայ ժողովրդի նկատմամբ բռնության միջազգային դատապարտմանը. ԱԳ նախարար Սազոնովի նախաձեռնությամբ արդեն 1915 թվականին Ռուսաստանը, Ֆրանսիան և Մեծ Բրիտանիան համատեղ հայտարարությամբ կատարվածն ուղղակիորեն անվանել են հանցագործություն մարդկության և քաղաքակրթության դեմ: