Կառավարությունը նախատեսում է 2 ամսով երկարաձգել արցախցիներին աջակցության պետական ծրագիրը

Արմինֆո. Հայաստանի կառավարությունը մտադիր է մինչև 2025 թվականի հուլիսի 1-ը երկարաձգել արցախցիներին սոցիալական աջակցության պետական ծրագիրը, սակայն պատրաստվում է կրճատել դրա ամսական չափը նախկին "40+10" հազար դրամից մինչև 40 հազար դրամ ՝ շահառուների թվի հետագա կրճատմամբ:

Ինչպես լրագրողների հետ զրույցում պարզաբանել է Արցախցիների իրավունքների պաշտպանության խորհրդի անդամ Նժդեհ Իսկանդարյանը, խորհրդի ներկայացուցիչների հետ հերթական հանդիպման ժամանակ փոխվարչապետ Տիգրան Խաչատրյանը հաղորդել է, որ այդ ծրագրի շահառուների ցանկից կհեռացվեն 18-63 տարեկան անձինք:

Իսկանդարյանը նշել է, որ հանդիպմանը բարձրացվել է նաև շահառուների ցանկից ուսանողներին հանելու պատճառների վերաբերյալ հարցը, ինչին ի պատասխան կառավարության ներկայացուցիչն ասել է. "Որովհետև նրանք կարող են համատեղել ուսումը աշխատանքի հետ":

Այդուհանդերձ, ինչպես հաղորդել Է խորհրդի անդամը, Հայաստանի կառավարությունը հետագայում չի պատրաստվում չեղարկել օգնության կրճատման եւ շահառուների ցանկի վերանայման վերաբերյալ իր որոշումը, սակայն պատրաստ է ձեւավորել մասնագիտական խմբեր ' սոցիալական եւ բնակարանային ծրագրերին վերաբերող հարցերը քննարկելու համար:

Իսկանդարյանը հաղորդել է, որ խորհուրդը կառավարությանը ներկայացրել է հարցերի մի ամբողջ փաթեթ, որոնցից շատերի շուրջ փոխհամաձայնության չեն հանգել: Մասնավորապես, ըստ նրա, պահանջների մնացած 11 կետերը դեռ չեն քննարկվել։ "Հիմա մեզ երկու-երեք օր է պետք արցախցիների հետ հանդիպումներ կազմակերպելու համար, որպեսզի հասկանանք նրանց դիրքորոշումն այդ ծրագրի վերաբերյալ։ Դրանից հետո խորհուրդը հանդես կգա նոր հայտարարությամբ", - ընդգծել է Իսկանդարյանը։

 Նա նշել է, որ խորհուրդը չի դադարեցնի իր բողոքի ակցիաները։ "Մենք փոխվարչապետի հետ հանդիպմանը հստակ հայտարարել ենք մեր դիրքորոշման մասին. դրանք սոսկ սոցիալական պահանջներ չեն։ Մենք խոսելու ենք հավաքական վերադարձի, գերիների հարցի մասին, և մեր պայքարը շարունակվելու է։ Ձևաչափը կարող է փոխվել, բայց պայքարը չի դադարի", - եզրափակել է Իսկանդարյանը։

Հիշեցնենք, որ 2023 թվականի հոկտեմբերին Հայաստանում մեկնարկել է ծրագիր, որի շրջանակներում Լեռնային Ղարաբաղից բռնի տեղահանված յուրաքանչյուր ընտանիքի բնակարանային ծախսերը հոգալու համար հատկացվել է ամսական 40 հազար դրամ (մոտ 100 դոլար) մեկ անձի համար, ևս 10 հազար դրամ ՝ կոմունալ ծառայությունների համար։ Ծրագիրը պետք է ընդգրկեր տեղահանված բոլոր քաղաքացիներին ՝ անկախ տարիքից, բացառությամբ հատուկ կենտրոններում գտնվողների և նրանց, ովքեր չեն գտնվում Հայաստանի տարածքում։ Ի սկզբանե ծրագիրը հաստատվել է որպես ժամանակավոր միջոց՝ 6-ամսյա ժամանակահատվածի համար, քանի որ նախատեսվում էր բնակապահովման ծրագրի իրականացում: Այնուհետև որոշվել է ծրագիրը շարունակել մինչև 2024 թվականի ավարտը, հաշվի առնելով, որ ժամանակ կպահանջվի երկրորդ ծրագիրն ամբողջությամբ իրականացնելու և շահառուներին դրանում ընդգրկելու համար: Իսկ 2024 թվականի նոյեմբերին իշխանությունները հայտարարեցին, որ ծրագրի պայմանները (40+10) կվերանայվեն. խոսքն այն ժամանակ գումարի և շահառուների ցանկի կրճատման մասին էր ՝ դրանից բացառելով աշխատունակ տարիքի արցախցիներին։