Փաստաբանը հանցագործության մասին հաղորդում է ուղարկել ՀՀ քննչական կոմիտե՝ արցախցիների հասցեին ատելության խոսքի առնչությամբ

Արմինֆո. Արցախցի փաստաբան Ռոման Երիցյանը հանցագործության մասին հաղորդում է ներկայացրել ՀՀ քննչական կոմիտե՝ "Ֆեյսբուք" սոցիալական ցանցի օգտատերերից մեկի՝ Արսեն Արշակյանի անվան տակ արցախցիների հասցեին հնչեցրած ատելության խոսքի առնչությամբ:

Հրապարակելով վերը նշված օգտատիրոջ ատելության խոսքի սքրինշոթը՝ փաստաբանը գրել է. «Չնայած ՀՀ քննչական կոմիտեն կարող էր և ըստ իս՝ անգամ պարտավոր էր արձագանքել ստորև հրապարակված նյութին և շարադրված մեկնաբանություններին՝ անհապաղ քրեական վարույթ նախաձեռնելու և ակտիվ քննչական ու վարութային գործողություններ կատարելու եղանակով, այնուամենայնիվ մինչև այս պահ որևէ արձագանք չեմ նկատել։ Ըստ այդմ՝ այսօր հաղորդում եմ ներկայացրել ՀՀ քննչական կոմիտե՝ ՀՀ քրեական օրենսգրքի 329-րդ հոդվածով նախատեսված արարք կատարվելու հիմքով։

Միաժամանակ տեղեկացնում եմ, որ ՀՀ քրեական օրենսգրքի 329-րդ հոդվածը առավելագույնը 2 տարվա ազատազրկման տեսքով պատասխանատվություն է նախատեսում անձի կամ անձանց խմբի նկատմամբ ռասայական, ազգային, էթնիկ կամ սոցիալական ծագումով, կրոնով, քաղաքական կամ այլ հայացքներով կամ անձնական կամ սոցիալական բնույթի այլ հանգամանքներով պայմանավորված ատելություն, խտրականություն, անհանդուրժողականություն կամ թշնամանք հրահրելուն կամ քարոզելուն ուղղված հրապարակային խոսքը, ինչպես նաև այդ նպատակով նյութ կամ առարկա տարածելու համար։

Նույն հոդվածի երկրորդ մասով բացառապես 1-4 տարի ազատազրկման ձևով պատիժ է նախատեսված նույն արարքի համար, որը կատարվել է հրապարակայնորեն ցուցադրվող ստեղծագործությունների, զանգվածային լրատվության միջոցների կամ տեղեկատվական կամ հաղորդակցական տեխնոլոգիաների օգտագործմամբ։ Սպասենք հաղորդման գնահատականին»:

Ավելի վաղ սոցիալական ցանցերի հայկական հատվածում տարածվել էր օգտատեր Արշակյանի հրապարակման սքրինշոթը, որը, հղում անելով Արցախի խորհրդարանի պատգամավոր Մետաքսե Հակոբյանի այն հայտարարությանը, թե արցախցիների 30 տոկոսը լքել է Հայաստանը, կոչ է արել ուրախանալ այդ լուրով և հուսալ, որ հեռացածները չեն վերադառնա, իսկ մնացածները կհետևեն իրենց հայրենակիցների օրինակին:

Այսօր արցախատյաց հերթական հրապարակմամբ հանդես է եկել նաև ՀՀ ԱԺ նախագահ Ալեն Սիմոնյանը: Վերջինս արդեն մշտական հիմունքով հայտնվում է սկանդալների կիզակետում՝ արցախցիների հասցեին իր օդիոզ, իսկ երբեմն էլ՝ ատելության արտահայտությունների պատճառով։

Հավելենք, որ սա առաջին դեպքը չէ, երբ սոցիալական ցանցերում տարածվում են արցախցիների նկատմամբ ատելություն սերմանող հրապարակումներ կամ մեկնաբանություններ: Անկախ փորձագետները հակված են կարծել, որ դրանք համակարգված բնույթ են կրում և կառավարվում են իշխանամետ կառույցներից։

Բացի այդ, դեռևս 2024 թվականին Արցախի մարդու իրավունքների պաշտպան Գեղամ Ստեփանյանը, ուշադրություն հրավիրելով այն փաստի վրա, որ սոցիալական ցանցերում և լրատվամիջոցներում շատ է խոսվել Արցախի ժողովրդի նկատմամբ ատելություն հրահրելու մասին, հայտարարել է, որ արցախցիների նկատմամբ ատելության խոսքը ոչ միայն չի նվազում, այլև օրեցօր նոր դրսևորումներ է ստանում։