Քաղաքապետարանում հավաստիացնում են.  Երևանի օդն այլևս ամենաաղտոտվածը չէ

Արմինֆո. Եթե նախորդ տարիներին Երևանում արձանագրվել է փոշու ամենաբարձր մակարդակը դիտարկվող քաղաքների շարքում, ապա 2024 թվականին այդ ցուցանիշը նվազել է։ Այդ մասին քաղաքապետ Տիգրան Ավինյանին զեկուցվել է քաղաքապետարանի աշխատանքային նիստի ընթացքում:

Մասնավորապես, նշվել է, որ Հայաստանի մյուս քաղաքների շարքում օդի աղտոտվածության ցուցանիշով Երևանն արդեն ոչ թե առաջին, այլ չորրորդ տեղում է։ Այն մասին, որ մայրաքաղաքում օդի որակը բարելավվում է, ինչպես նշել է Ավինյանը, վկայում են Երևանի շինհրապարակներում տեղադրված 173 տվիչների տվյալները։ Միաժամանակ նշվել է, որ օդի աղտոտվածության մակարդակը բարձրանում է հենց ձմռան շրջանում, ինչը պայմանավորված է ջեռուցման սեզոնով։ Քաղաքապետարանից ևս մեկ անգամ հավաստիացրել են, որ այս ժամանակահատվածում մթնոլորտային օդի աղտոտման հիմնական աղբյուրներին (շինարարություն, տրանսպորտ, բաց հանքերի շահագործում) գումարվում է ջեռուցման նպատակով տարբեր տեսակի վառելիքի այրումը, ինչը հանգեցնում է օդում փոշու և ծխի ավելացման:

Հղում անելով մարտի տվյալներին՝ քաղաքապետարանում ներկայացրել են  օդի որակի  ինդեքսի (AQI) միջին նշանակությունը, բայց՝ միայն 6 ցուցանիշների 2-ինը՝ PM 10 (կոպիտ, անզեն աչքով տեսանելի) և PM 2.5 (մանր մասնիկներ), մինչդեռ, ամբողջական պատկերի համար  անհրաժեշտ են նաեւ հետեւյալ ցուցանիշները. ածխածնի օքսիդ (CO), օզոն (O3), ազոտի երկօքսիդ (NO2) և ծծմբի երկօքսիդ (SO2): Այդպիսով՝ մարտին PM2.5 մակարդակը կազմել է 91 մկգ/մ 3, իսկ PM10-ը' 37 մկգ/մ 3: Այս ցուցանիշները, ինչպես նշել են աշխատանքային նիստի ժամանակ, գտնվում են «լավ» կամ «չափավոր» միջակայքում: Միևնույն ժամանակ, Տիգրան Ավինյանը վկայակոչել է նաև Հայաստանում օդի աղտոտվածության վերաբերյա Հիդրոմետկենտրոնի 2024 թվականի հաշվետվությունը, որում ասվում է, որ նախորդ տարիների համեմատ Երևանում փոշով աղտոտվածության մակարդակը նվազել է:

Չնայած քաղաքային իշխանությունների հավաստիացումներին՝ քաղաքացիները շարունակում են բողոքել Երևանում օդի որակից։ Անկախ փորձագետները մայրաքաղաքում օդի աղտոտվածությունն, առաջին հերթին, կապում են անվերահսկելի կառուցապատման, քաղաքում մեքենաների քանակի ավելացման և ծառերի հատման հետ, ինչն իրականացվում է քաղաքապետարանի կանաչապատման ծրագրի շրջանակում: Իշխանություններն այդ նախաձեռնությունը բացատրում են կենսունակության կորստի փուլում գտնվող ծառերն ավելի արժեքավոր ծառերով փոխարինելու անհրաժեշտությամբ: Սակայն, ոլորտի փորձագետները հակառակ կարծիքին են: Նրանք վստահեցնում են, որ քաղաքապետարանը էկոցիդ է կազմակերպել։ Քաղաքի կենտրոնական փողոցները պատվում են հիմնականում դեկորատիվ ծառերով, որոնք ի վիճակի չեն լինի լիարժեք կատարել փոշու կլանման գործառույթը։