Իրանի դեսպանը հանդես է եկել Երևանի և Բաքվի միջև խաղաղության պայմանագրի ստորագրման օգտին

Արմինֆո. Թեհրանը հանդես է գալիս Հարավային Կովկասում խաղաղության հաստատման օգտին և հույս ունի, որ Երևանն ու Բաքուն, դրսեւորելով զսպվածություն, ճանապարհ կհարթեն խաղաղության պայմանագրի ստորագրման համար: Այդ մասին ապրիլի 3-ին հայտարարել է Հայաստանում Իրանի դեսպան Մեհդի Սոբհանին՝ Երեւանում լրագրողների հետ զրույցում։

Նրա համոզմամբ՝ հերթական էսկալացիան կործանարար է տարածաշրջանի համար։ "Հուսով ենք, որ բոլոր կողմերը հավատարիմ կմնան խաղաղությանն ու հանգստությանն ուղղված քայլերին։ Մենք կապի մեջ ենք և Հայաստանի, և Ադրբեջանի հետ, և մեր շփումների ընթացքում կողմերին կոչ ենք անում հավատարիմ մնալ խաղաղության օրակարգին։ Իրանը պատրաստ է աջակցել կողմերի առաջարկած ցանկացած ձևաչափի, որը կօգնի պահպանել հրադադարի ռեժիմը և խաղաղություն հաստատել", - հավելել է դիվանագետը:

Սոբհանիի համոզմամբ՝ "3+3" տարածաշրջանային հարթակն այդպիսի հաջողված ձևաչափերից է, որը կարող է օգնել կողմերին շարժվել խաղաղության հաստատման ճանապարհով:

Անդրադառնալով Ադրբեջանի կողմից Իսրայելից սպառազինության գնումներին՝ դիվանագետը նշել է, որ Իրանը դեմ է տարածաշրջանի ռազմականացմանը: "Մենք հիանալի հարաբերություններ ունենք Ադրբեջանի հետ ։ Մենք հարևաններ ենք, և օգտագործում ենք Ադրբեջանի հետ այդ կապերը, որպեսզի տարածաշրջանում խաղաղություն հաստատվի։ Մենք ուշադիր հետեւում ենք տարածաշրջանում տեղի ունեցող գործընթացներին", - ամփոփել է դիվանագետը։