Երևանում  մեկնարկել է «Թևեր» վերականգնողական ծրագիրը՝ ի աջակցություն Արցախից տեղահանված ընտանիքներին

Արմինֆո. Արցախից բռնի տեղահանված ընտանիքների համապարփակ վերականգնմանն ուղղված «Թևեր» ծրագիրն այժմ հասանելի է նաև Երևանում: Ծրագրի այս փուլին մասնակցում են 69 երեխա և 44 ծնող: Այն իրականացնում է «Մենք ենք մեր սարերը» զարգացման գործակալությունը՝ ֆրանսիական «Սատար Արցախին» միության հովանավորությամբ։

«Մենք ենք մեր սարերը» զարգացման գործակալության հաղորդագրության համաձայն, ծրագիրը ներառում է հոգեբանական, ինտելեկտուալ և ֆիզիկական վերականգնման բաղադրիչներ, որոնք օգնում են տեղահանված երեխաներին և նրանց ընտանիքներին հաղթահարել ադապտացման դժվարությունները։ Ծրագիրը մեկնարկել է 2023 թվականին Դիլիջանում և հետագայում ընդլայնվել՝ ընդգրկելով նաև Գյումրին։

«Դիլիջանում գրեթե բոլոր արցախցի երեխաները մասնակցել են «Թևեր» ծրագրին, և դրա արդյունքները վկայում են երեխաների և ծնողների հուզական կայունության ու նոր հմտությունների զարգացման մասին», – նշում է ծրագրի ղեկավար Սոնա Հովհաննիսյանը։

Երևանում «Թևեր»-ն իրականացվում է «Ինթրա» Intra Mental Health Center հոգեկան առողջության կենտրոնի հետ համատեղ: Նախնական գնահատումները ցույց են տալիս, որ ծրագրի շահառուների մեծ մասը տագնապայնության բարձր մակարդակ ունի, ուստի նրանց համար մշակվել են հատուկ թերապևտիկ մոտեցումներ։

«Ստեղծագործական մեթոդները օգնում են երեխաներին բացահայտել իրենց ներաշխարհը և հաղթահարել ներքին լարվածությունը», – նշում է ծրագրի արտթերապևտը։ «Խզբզանքի վարժության միջոցով, օրինակ, ուսումնասիրում ենք, թե ինչպես են երեխաները կառուցում իմաստային կապեր ու գտնում լուծումներ քաոսային իրավիճակներում»։

Ֆիզիկական վերականգնման բաղադրիչը իրականացվում է Հայաստանի Ֆուտբոլի ֆեդերացիայի ակադեմիայի հետ Football Federation of Armenia համագործակցությամբ։ Արցախցի երեխաները երեք առաջարկված մարզաձևերից ընտրել են լողը։

Առաջիկայում կմեկնարկի նաև կրթական բաղադրիչը, որը նպատակ ունի խթանել 12-18 տարեկան երեխաների անհատական զարգացումը։

«Թևեր» ծրագրին առ այսօր մասնակցել է 387 երեխա և 228 ծնող։ Դիլիջանում ծրագրին միացել են նաև տեղաբնակ ընտանիքներ, ինչը նպաստել է փոխադարձ ինտեգրմանը։