Փորձագետ. Միգրանտների երեխաներին Ռուսաստանի դպրոցներում ընդգրկելու նոր կանոնները կարող են հանգեցնել նրանց կրթություն ստանալու հնարավորությունից զրկելուն

Արմինֆո. Միգրանտների երեխաներին Ռուսաստանի դպրոցներում ընդգրկելու նոր կանոնները կարող են հանգեցնել նրանց կրթություն ստանալու հնարավորությունից զրկելուն։ Այդ մասին ապրիլի 2-ին Երեւանում կայացած մամլո ասուլիսում հայտարարել է "Հայկական Կարիտաս" կազմակերպության միգրացիոն ծրագրի փորձագետ Տաթեւիկ Բեժանյանը։

Ինչպես պարզաբանել է փորձագետը, ապրիլի 1-ից ուժի մեջ են մտել փոփոխություններ, որոնց համաձայն, միգրանտների երեխաները, որոնք ցանկանում են հաճախել Ռուսաստանի դպրոցներ, պարտավոր են ռուսաց լեզվի իմացության ատեստավորում անցնել: Հակառակ դեպքում, ըստ Բեժանյանի, նրանք չեն կարողանա շարունակել ուսումը։ Փորձագետն ընդգծել է, որ այդ կանոնը վերաբերում է միայն օտարերկրացիների երեխաներին, քանի որ այն դեպքում, երբ երեխան ունի երկքաղաքացիություն, նա արդեն համարվում է Ռուսաստանի քաղաքացի և, հետևաբար, ենթակա չէ ատեստավորման:

"Փետրվարի 5-ից սկսվել են Ռուսաստանի տարածքում միգրանտների երեխաների գտնվելու օրինականության ստուգումներ։ Ապրիլի 1-ից այդ ստուգումներն ավելի խիստ կլինեն և կանցկացվեն երկրի բոլոր դպրոցներում: Երեխաների գրանցման հետ կապված խնդիրների հայտնաբերման դեպքում, օրինակ, եթե այն անվավեր է կամ դրա գործողության ժամկետը լրացել է, հետեւանքները կկրեն ոչ միայն երեխաները, այլեւ նրանց ծնողները, նույնիսկ, այն դեպքում, եթե ծնողը օրինական հիմքերով գտնվում է Ռուսաստանում", - պարզաբանել է Բեժանյանը։ Նրա խոսքով՝ այդ իրավիճակում կարող է կասկածի տակ դրվել նաև ծնողի ՝ Ռուսաստանում գտնվելու օրինականությունը։

Անդրադառնալով ծնողներին ուղղված հանձնարարականներին՝ Բեժանյանն ընդգծել է, որ չի կարելի ոչ մի դեպքում փորձել կեղծ փաստաթղթերով գրանցել երեխաներին: Նրա խոսքով՝ դա կարող է հանգեցնել քրեական պատասխանատվության կամ արտաքսման։ Այս կապակցությամբ փորձագետը ծնողներին կոչ է արել Ռուսաստան մեկնելուց առաջ երեխաների համար ռուսաց լեզվի դասընթացներ ապահովել, քանի որ թեստը հաջող հանձնելու համար անհրաժեշտ է հարցերի 90% - ին ճիշտ պատասխանել:

"Արդեն նշանակված են վայրերը և հանձնաժողովները, որոնք այդ քննությունները կընդունեն երեխաներից։ Առանց թեստը հաջող հանձնելու նրանք չեն կարող սովորել Ռուսաստանի տարածքում", - հավելել է Բեժանյանը։

Անդրադառնալով այն երեխաներին, որոնք արդեն սովորում են ռուսական դպրոցներում, աշխատանքային միգրացիայի հարցերով փորձագետը նշել է, որ դեռևս հստակ տեղեկատվություն չկա, թե նոր կանոններն ինչպես կազդեն նրանց վրա: Սակայն նա ընդգծել է, որ բոլոր աշակերտների փաստաթղթերը կստուգվեն ։

"Մենք արդեն ունեցել ենք դեպքեր, երբ դպրոցներում ստուգումների ընթացքում երեխան չի ունեցել միգրացիոն հաշվառում, այսինքն ՝ գրանցում, կամ փաստաթղթերը կեղծ են եղել ։ Նման դեպքերում երեխաներին ծնողների հետ ուղարկել են օտարերկրյա քաղաքացիների պահման վայրեր, որտեղից նրանց արդեն արտաքսել են, չնայած այն բանին, որ Ռուսաստանի օրենքով երեխաներին իրավունք չունեն այդ հաստատություն ուղարկել", - նշել է փորձագետը։

Անդրադառնալով այն հարցին, թե ինչպես կարելի է օրինական հիմունքներով երկարաձգել ՌԴ տարածքում գտնվելը, Բեժանյանը հստակեցրել է, որ եթե ընտանիքում մեկ անդամ աշխատանքային միգրանտ է, ապա նա կարող է աշխատանքային պայմանագիր կնքել և դրա ժամկետների շրջանակներում երկարաձգել, օրինակ, իր կնոջ և երեխաների գտնվելու ժամկետը: Ընդ որում, աշխատանքային միգրացիայի գծով փորձագետը նշել է, որ անհրաժեշտ է ուշադրություն դարձնել պայմանագրում աշխատավարձի տողին, որտեղ նշվում է ապրուստի արժեքը ՝ բազմապատկած ընտանիքի անդամների քանակով: Ինչպես պարզաբանել է Բեժանյանը, դա անհրաժեշտ է, որպեսզի անձը հնարավորություն ունենա երկարաձգել ընտանիքի անդամների գրանցումը։

Փորձագետն ուշադրություն է հրավիրել այն հանգամանքի վրա, որ Ռուսաստանում օտարերկրացիների շուրջ 387 000 անչափահաս երեխա կա։ Նա նշել է, որ Ռուսաստանի տարածքի համար դա այնքան էլ մեծ թիվ չէ, որը կարող է խանգարել այլ երեխաների ուսուցման գործընթացին, նույնիսկ, եթե յուրաքանչյուր դասարանում կա մի քանի երեխա, որոնք լավ ռուսերեն չգիտեն:

"Դա, հաստատ, կհանգեցնի այն բանին, որ կլինեն երեխաներ, որոնք կմնան առանց սովորելու հնարավորության, քանի որ այն շեմը, որը սահմանվել է, կարող է հանգեցնել այն բանին, որ երեխաները չկարողանան անցնել այն ։ Ընդ որում, այդ շեմը չեն կարող անցնել ոչ միայն հայ երեխաները, այլեւ այլ երկրներից Ռուսաստան ժամանող երեխաները", - ամփոփել է Բեժանյանը ։