Հայաստանի պաուերլիֆտինգի հավաքականն արժանացել է հատուկ գավաթի՝ լավագույն արդյունքի համար

Արմինֆո. Հայաստանի պաուերլիֆտինգի  ֆեդերացիայի նախագահ և գլխավոր մարզիչ Գագիկ Սարոյանի գլխավորությամբ Հայաստանի պաուերլիֆտինգի հավաքականը գրանցել է իր հերթական պատմական արդյունքը:

Ինչպես հաղորդել է ՀՊՖ մամուլի ծառայությունը, մարտի 26-30-ը Լեհաստանում կայացած XPC վարկածով պաուերլիֆտինգի Եվրոպայի առաջնությանը, 15 երկրի ավելի քան 400 մարզիկների պայքարում, մեր հավաքականը տպավորիչ արդյունք է գրանցել:

Պառկած սեղմում վարժության երիտասարդների պայքարում  Արսեն Ավետիսյանն (67,5կգ) ու Միշա Խաչատրյանը (90կգ) 1-ին տեղ են զբաղեցրել:Միշա Խաչատրյանը նաեւ բացարձակ հաշվարկում գրավել է 3-րդ տեղը: Մեծահասակների պայքարում 1-ին տեղ են զբաղեցրել  Գառնիկ Աբրահամյանը (82,5 կգ), Արթուր Հայրապետյանը (90 կգ) և Աշոտ Անտոնյանը (100 կգ), իսկ 2-րդ տեղ՝ Գևորգ Կարապետյանը (110 կգ):

Ինչպես նշվում է ՀՊՖ-ի  հաղորդագրության մեջ, ձգում վարժության մեծահասակների պայքարում Գևորգ Առաքելյանը (82,5 կգ) գրավել է 1-ին տեղը, և 2 - րդ տեղը՝ բացարձակ հաշվարկով, Գոռ Հովհաննիսյանը (100 կգ) ՝ 1-ին տեղը և 3-րդ տեղը՝ բացարձակ հաշվարկով: Վետերանների պայքարում առաջինը Ռոբերտ Հովհաննիսյանն էր ։ Ըստ աղբյուրի ՝ կանանց պայքարում 67,5 կգ քաշային Անգելինա Չոբանյանը գրավել է 1-ին տեղը և 3-րդ տեղը՝ բացարձակ հաշվարկում:

Երիտասարդների երկամարտում 2-րդ տեղը նվաճել է Արսեն Ավետիսյանը (67,5 կգ), իսկ մեծահասակների պայքարում 100 կգ քաշային Հայկ Աֆյանը դարձել է  առաջինը: Նա նաև սահմանել է  Եվրոպայի 6 ռեկորդ եռամարտում: Նույն նորմատիվի մասով Գևորգ Կարապետյանը (110 կգ) դարձել է հաղթող և սահմանել Եվրոպայի 3 ռեկորդ, իսկ Գևորգ Առաքելյանը (82,5 կգ) զբաղեցրել է 3-րդ տեղը:

Գրանցած լավագույն արդյունքի համար Հայաստանի պարուերլիֆտինգի հավաքականը պարգևատրվել է հատուկ գավաթով։