Արցախի խորհրդարանի "Ազատ Հայրենիք - ՔՄԴ" խմբակցությունը քաղաքացիներին կոչ է արել մասնակցել Երևանի Ազատության հրապարակում վաղվա հանրահավաքին

Արմինֆո. Արցախի Հանրապետության Ազգային ժողովի "Ազատ Հայրենիք - ՔՄԴ" խմբակցությունը հանդես է եկել հայտարարությամբ ՝ կոչ անելով քաղաքացիներին մասնակցել Երևանի Ազատության հրապարակում վաղը ժամը 15:00-ին նախատեսված հանրահավաքին, որը հրավիրվում է արցախցիներին սոցիալական օգնությունը կասեցնելու ՀՀ իշխանությունների մտադրության առնչությամբ։

«Սիրելի´ հայրենակիցներ, Արցախահայությունը կանգնած է ծանր հումանիտար և սոցիալական մարտահրավերների առջև։ ՀՀ իշխանությունների անգործությունն ու անպատասխանատվությունը ստեղծել են անելանելի իրավիճակ, որը սպառնում է մեր հայրենակիցների իրավունքներին ու ապագային։ Այս պայմաններում մեր հանրությունը չի կարող լռել և ստիպված է բարձրացնել իր ձայնը՝ իր իրավունքներն ու արդար պահանջները ներկայացնելու համար։

Ուստի կոչ ենք անում բոլորին միանալ հանրության նախաձեռնած հանրահավաքին և պահանջել ՀՀ կառավարությունից՝

Մշակել և իրականացնել հստակ ու երկարաժամկետ քաղաքականություն՝ Արցախի հայության սոցիալական ու տնտեսական խնդիրների լուծման համար,

Ապահովել տեղահանված ընտանիքների կայուն կենսապայմաններ՝ ներառյալ բնակարանային, առողջապահական և կրթական ծրագրերը,

Կիրառել գործուն միջոցներ՝ աշխատատեղերի ստեղծման և տնտեսական զարգացման համար,

Միջազգային հարթակներում հետևողականորեն բարձրաձայնել Արցախի հայության կոլեկտիվ վերադարձի իրավունքների հարցը,

Գործադրել իրավական և քաղաքական բոլոր հնարավոր լծակները՝ մեր գերեվարված հայրենակիցների անհապաղ ազատման համար՝ նրանց հարցը բարձրացնելով միջազգային կառույցներում և պահանջելով արդարություն։

Վայրը: Երևանի Ազատության հրապարակ (Օպերա): Օր և ժամ: Մարտի 29-ին, ժամը 15:00»,- ասված է հայտարարության մեջ: