Շվեդ պատգամավոր. Ադրբեջանում ոչ մի դատավարություն ազատ կամ արդար չէ, հատկապես՝ հայերի նկատմամբ

Արմինֆո.Ադրբեջանում ընդհանրապես չկա օրենքի գերակայություն, երկրում ոչ մի դատավարություն ազատ կամ արդար չէ։ Ամենաքիչը՝ հայերի համար, որոնց ռեժիմն արդեն ահաբեկիչներ է անվանել։ Այդ մասին հայտարարել է Շվեդիայի խորհրդարանի պատգամավոր Էրիկ Հելսբորնը։

Շվեդ խորհրդարանականը հաղորդել է, որ մարտի 10-ին էլեկտրոնային նամակ է ստացել "Ադրբեջանի և Շվեդիայի միջև միջխորհրդարանական կապերի աշխատանքային խմբից", որը ստորագրել են Ադրբեջանի խորհրդարանի յոթ անդամներ:

"Սա պատասխան էր Ռիկսդագի շվեդ-հայկական բարեկամության խմբի հայտարարությանը հայ ռազմագերիների և Բաքվի ռեժիմի կողմից նրանց նկատմամբ շինծու դատավարությունների վերաբերյալ, որը ստորագրել եմ ես և խորհրդարանի ևս 5 անդամ: Էլեկտրոնային նամակը հասանելի է առցանց կարդալու համար, ես այն այստեղ չեմ ընթերցի: "Ադրբեջանական դատական համակարգն աշխատում է միջազգային չափանիշներին լիովին համապատասխան, եւ հակառակի մասին ցանկացած պնդում ոչ այլ ինչ է, քան զրպարտություն", - ադրբեջանական կողմի նամակից մեջբերում է հրապարակել Հելսբորնը՝ Twitter-ի (X) իր միկրոբլոգում:

Այս առումով խորհրդարանականը հիշեցրել է, որ Freedom House-ի ազատության ինդեքսում երկրներին տրվում է 0-100 միավոր, կախված ան բանից, թե որքանով են նրանք ազատ:

"Այս միավորներից 16-ը հիմնված են այն բանի վրա, թե որքանով է արդար և հուսալի իրավական համակարգը, 4 ենթակարգ՝ յուրաքանչյուրում առավելագույն միավորներով: Ադրբեջանը ստանում է 0 միավոր: Բոլոր 4 կարգերում: 0 միավոր՝ 16 հնարավորից: Ասել, որ դա չի համապատասխանում միջազգային չափանիշներին,  մեղմ է ասված։ Ադրբեջանում ընդհանրապես չկա օրենքի գերակայություն, երկրում չկան ազատ և արդար դատարաններ ։ Եվ ամենաքիչը՝ հայերի համար, որոնց ռեժիմն արդեն որպես ահաբեկիչներ է պիտակավորել", - ամփոփել է պատգամավորը։

Ավելի վաղ Ռիկսդագի Շվեդիա-Հայաստան բարեկամության խումբը կոչ էր արել Ադրբեջանին դադարեցնել հայերի նկատմամբ դատը և ազատ արձակել նրանց ՝ միջազգային իրավունքի նորմերին և միջազգային կառույցների շրջանակներում ստանձնած պարտավորություններին համապատասխան: