Հայաստանի ԶՈՒ գլխավոր շտաբի պետի նախկին տեղակալը 10 մլն դրամ գրավի դիմաց ազատ կարձակվի

Արմինֆո.ՀՀ զինված ուժերի գլխավոր շտաբի պետի նախկին տեղակալ, երկրի Ազգային հերոս գեներալ-լեյտենանտ Տիրան Խաչատրյանը 10 միլիոն դրամ գրավի դիմաց ազատ կարձակվի կալանքից: Գորիսում փետրվարի 18-ին տեղի ունեցած դատական նիստի ժամանակ նման որոշում է կայացրել դատավոր Արթուր Ոսկանյանը:

Նիստի ընթացքում պաշտպանական կողմն ընդգծել է, որ դատարանը հիմքեր չունի Խաչատրյանի կալանքի ժամկետը երկարացնելու համար: Փաստաբան Արմեն Անդրիկյանն ուշադրություն է հրավիրել այն հանգամանքի վրա, որ քննարկվում է արդեն կալանքի տակ գտնվող գեներալի խափանման միջոցը: Այդ առնչությամբ նա պարզաբանել է, որ դատարանը կարող է ավելի խիստ միջոցներ կիրառել միայն համապատասխան հանգամանքների կամ պայմանների խախտումների առկայության դեպքում։

Դատավորը բավարարել է խափանման միջոցը փոխելու վերաբերյալ պաշտպանական կողմի միջնորդությունը՝ կալանքը փոխարինելով 10 մլն դրամ գրավի դիմաց ազատ արձակմամբ՝ չհեռանալու մասին ստորագրությամբ:

Հիշեցնենք, որ ՀՀ ԶՈՒ գլխավոր շտաբի պետի նախկին տեղակալ, գեներալ-լեյտենանտ Տիրան Խաչատրյանն այս տարվա հունվարի 5-ին երկու ամսով կալանավորվել էր՝ Լեռնային Ղարաբաղի Հանրապետությունում 44-օրյա պատերազմի ընթացքում անփութության մեղադրանքով: Նրա նկատմամբ գործը հարուցվել էր այս տարվա հունվարի 3-ին։ Խաչատրյանն իր մեղքը չի ընդունում։

Հիշեցնենք, որ Խաչատրյանը բանակից ազատվել էր 2021 թվականի սկզբին՝ ռուսական "Իսկանդեր" հրթիռային համալիրների մասին Հայաստանի վարչապետ Նիկոլ Փաշինյանին առնչվող զավեշտից հետո ։ Փաշինյանը հայտարարել էր, որ Հայաստանի "Իսկանդերները" կամ չեն աշխատել, կամ "պայթել են միայն 10 տոկոսով": Խաչատրյանը, մեկնաբանելով այդ հայտարարությունը եւ տեղյակ չլինելով, թե ով է հայտարարության հեղինակը, սրտանց ծիծաղել էր, ապա անլուրջ էր համարել այդ հայտարարությունները՝ լրագրողներին հորդորելով կեղծ պատկերացում չձևավորել այդ սպառազինության մասին:

Հավելենք, որ 2020 թվականի հոկտեմբերին Լեռնային Ղարաբաղում ռազմական գործողությունների թեժ պահին Խաչատրյանին շնորհվել էր Հայաստանի ազգային հերոսի կոչում: