Արցախի օմբուդսմենը տիեզերական մակարդակի ցինիզմ է որակել ՀՀ ԱԺ նախագահի արտահայտություններն արցախցիների հասցեին

Արմինֆո. Արցախցիների հանդեպ ատելության խոսք գեներացնող  թեզերը հրապարակ են նետվում հենց Հայաստանի քաղաքական իշխանության և նրանց սպասարկող լրատվամիջոցների կողմից: Արցախի մարդու իրավունքների պաշտպան Գեղամ Ստեփանյանն այդպես է արձագանքել է ԱԺ նախագահ Ալեն Սիմոնյանի այսօրվա հայտարարությանը, թե՝ "եթե արցախցիները հայրենիք էին ուզում, ապա թող կռվեին դրա համար"։

«Երբ Ֆրիդոմ Հաուսը ներկայացնում էր Արցախում էթնիկ զտման մասին անգլալեզու զեկույցը՝ փաստագրելով ադրբեջանական հանցագործությունները, քննարկման ժամանակ հարց տվեցի, թե ինչպես կարելի է անել, որ զեկույցը հասանելի լինի նաև հայ հանրությանը, որպեսզի մարդիկ ծանոթանան Արցախում կատարվածին, և ի վերջո վերանա այն անիմաստ հարցերի շարանը, թե ինչու չկռվեցիք, կարելի էր մնալ ու պայքարել և այլն:

Երևի միամտություն էր կարծել, թե զեկույցը կամ բազմաթիվ այլ փաստագրող նյութեր կարող են որևէ բան փոխել, քանի որ ատելության խոսք գեներացնող այդ թեզերը հրապարակ են նետվում քաղաքական իշխանության և նրանց սպասարկող լրատվամիջոցների կողմից, և դրա դեմ պայքարը ենթադրում է պայքար պետական քարոզչամեքենայի դեմ։

Ի պատասխան ԱԺ նախագահի՝ կարելի է բերել բազմաթիվ փաստեր, պայքարի և անձնազոհության բազմաթիվ դրվագներ, բայց այդ ամենն անիմաստ է, երբ գործ ունենք տիեզերական մակարդակի անբարոյականության, ստորության և ցինիզմի հետ», - գրել է Գեղամ Ստեփանյանը՝ «Ֆեյսբուքի» իր էջում։