Երևանի քաղաքապետը ՝ հասարակական տրանսպորտում բոյկոտի մասին. Մենք պետք է որոշակի ջանք գործադրենք՝ քաղաքական շոուներին վերջ տալու համար

Արմինֆո. Մենք պետք է որոշակի ջանք գործադրենք քաղաքական շոուներին վերջ տալու համար։ Երևանի քաղաքապետ Տիգրան Ավինյանը քաղաքապետարանում աշխատանքային նիստի ժամանակ այդպես է մեկնաբանել Երևանի նախկին քաղաքապետ Հայկ Մարությանի գլխավորությամբ փետրվարի 1-ից մեկնարկած 150 դրամ հասարակական տրանսպորտի նոր սակագների բոյկոտը Երևանի բնակիչների կողմից։ Բողոքի շարժմանը միացել է նաև Երևանի ավագանու "Մայր Հայաստան" խմբակցությունը:

Նիստի ընթացքում Երևանի քաղաքապետը պատասխանատուներին հանձնարարել է հարցը լուծել հնարավորինս հանգիստ և զուսպ ՝ հարգանք դրսեւորելով քաղաքական ընդդիմախոսների հանդեպ:

Ընդ որում, նա հայտարարել է, որ ընդդիմադիր քաղաքական ուժերի վերջնական նպատակը ոչ թե վերադարձն է հասարակական տրանսպորտի 100 դրամ ուղեվարձին, այլ՝ քաղաքային իշխանությունների միասնական տոմսային համակարգի ձախողումը: Ավինյանն ընդգծել է, որ վերջիններիս  դա չի հաջողվել, քանի որ երևանցիները, նրա կարծիքով, ունեն իրավիճակի և դրա պատճառների միասնական ընկալում: <Շուրջ 30 տարի մեզ մոտ գործում էր հասարակական տրանսպորտի ուղեվարձի 100 դրամանոց համակարգ, և մենք տեսել ենք այդ տրանսպորտի որակը։ Հասարակական տրանսպորտի շարունակական զարգացումը կարիք ունի վճարման նոր համակարգերի: Երևանցիները հասկացել են այդ տրամաբանությունը և աջակցում են դրան", - ասել է նա՝ շնորհակալություն հայտնելով քաղաքացիներին և վարորդներին։

Միաժամանակ, Ավինյանը պահանջել է հաջորդ շաբաթվանից ներկայացնել ուղևորահոսքի հստակ ցուցանիշներ և պակասուրդի նվազեցման ճանապարհային քարտեզ:

Նշենք, որ փետրվարի 1-ից Երևանում ուժի մեջ է մտել հասարակական տրանսպորտի ուղեվարձի նոր սակագինը, որը նախկին 100 դրամի փոխարեն կազմում է 150 դրամ: Ավագանու ընդդիմությունը կոչ է արել քաղաքի բնակչությանը և հյուրերին բոյկոտել քաղաքապետարանի այդ որոշումը:

Հարկ է ընդգծել, որ շատերն արձագանքել են այդ կոչին։ Մտնելով ավտոբուսների և տրոլեյբուսների սրահներ՝ նրանք կամ ընդհանրապես ոչինչ չեն վճարում, կամ 100 դրամ են տալիս վարորդներին ։ Բայց կան նաև օրինապաշտ քաղաքացիներ, ովքեր ողջ ծավալով վճարում են ուղեվարձը։

"Մայր Հայաստան" շարժման առաջնորդ Անդրանիկ Թևանյանը Facebook-ի իր էջում նշել է, որ նոր աշխատանքային շաբաթվա մեկնարկին բոյկոտը պետք է ավելի ինտենսիվ դառնա: Քաղաքական գործիչը հավելել է, որ քանի դեռ Երևանի ավագանու նիստում չի քննարկվել նախկին 100 դրամ սակագնին վերադառնալու հարցը, որի պահանջի տակ ստորագրել են մայրաքաղաքի 17 հազար բնակիչներ, բոյկոտը կշարունակվի: "Հարգելի քաղաքացիներ, ցույց տվեք ձեր սոցիալական համերաշխությունը նրանց հետ, ովքեր նոր սակագնով վճարելու հնարավորություն չունեն", - ընդգծել է նա։