Փաշինյանը մեկնաբանել է տարածքների փոխանակման ծրագրերի մասին Պետդեպարտամենտի գաղտնազերծած  փաստաթղթերը, որոնք հրապարակել է "Ազատություն" ռադիոկայանը

Արմինֆո. Հայաստանի վարչապետ Նիկոլ Փաշինյանը հունվարի 31-ին կայացած մամուլի ասուլիսում մեկնաբանել է "Ազատություն" ռադիոկայանի հայկական ծառայության հրապարակումը: Դրանում ներկայացվել են ԱՄՆ Պետդեպարտամենտի գաղտնազերծած փաստաթղթերը, որոնք հաստատում են, որ 90-ականների վերջին Ռոբերտ Քոչարյանն ու Հեյդար Ալիեւը առանձնազրույցի ձեւաչափով, առանց միջնորդների, պայմանավորվել են կարգավորել Լեռնային Ղարաբաղի հարցը տարածքների փոխանակման միջոցով. Մեղրին՝ Արցախի դիմաց:

Փաշինյանի ասելով՝ հենց այդ նյութում ներկայացված փաստերն են դարձել սոցցանցում իր վերջերս կատարած  այն գրառման առարկան, որ սկսած 1994 թվականից, այսինքն, հրադադարից հետո, բանակցային գործընթացն ընթացել է բացառապես Լեռնային Ղարաբաղն Ադրբեջանի կազմ վերադարձնելու շուրջ: Այն ժամանակ Հայաստանի վարչապետի այդ գրառմանը կոշտ էին արձագանքել ՀՀ նախկին նախագահների գրասենյակներից, որոնց օրոք ընթացել է բանակցային գործընթացը։ Ի պատասխան քննադատությունների ՝ Փաշինյանը նախագահներին հրավիրել էր հրապարակային բանավեճի այդ հարցի շուրջ, կոչ անելով օգտվել բացառիկ հնարավորությունից ՝ ավարտին հասցնելու հեռավար բանավեճը՝ "ով է մեղավոր Արցախի կորստի համար" թեմայով ։ Կրկնակի հրավերը նույնպես անտեսվել է երկրի նախկին ղեկավարների կողմից։

Փաշինյանը մեջբերել է հրապարակված ռեպորտաժից մի հատված. "Պետքարտուղարի տեղակալ Թելբոտը պատասխանել է, որ նման տարբերակը կարող է շեղել հակամարտող կողմերին Մինսկի խմբի առաջարկներից, այլ ոչ թե՝ լուծել խնդիրը, այլ հակառակը՝ ավելի խճճել այն: Աշխարհի տարբեր տարածաշրջանների փորձը ցույց է տալիս, որ սահմանների փոփոխությունը նման է Պանդորայի արկղի բացմանը։ Ղարաբաղի պարագայում՝ դա, լավագույն դեպքում, բանակցությունները կտանի փակուղի, վատագույն դեպքում՝ կհանգեցնի բռնության", - հայտարարել է նա»։

Վարչապետի գնահատմամբ, այդ մեջբերումն այն մասին է, որ 1999թ.  ԵԱՀԿ ՄԽ նախագահողը  խոսում է այն մասին, որ Լեռնային Ղարաբաղի խնդիրը պետք է լուծվի առանց սահմանների փոփոխության:

«Դա այն է, ինչի մասին ես խոսել եմ: Այն գրառումը, որը ես արել եմ, և որից հետո եղան մեկնաբանություններ, որոնց ես պատասխանեցի քննարկման հրավերով, այն գրառումը դրա մասին էր: Իսկ իմ թեզն այն մասին էր, որ եթե դուք (Հայաստանի նախկին նախագահները - խմբ.) ասում եք, որ Ղարաբաղը Ադրբեջանի մաս չեք ճանաչել, ապա ինչու՞ եք Հայաստանի ինքնիշխան մասը տալիս Ադրբեջանին, որպեսզի կարողանայիք Ղարաբաղը վերցնել» - նշել է Փաշինյանը։

Այդ համատեքստում, կարծում է ՀՀ կառավարության ղեկավարը, այդ դիվանագիտական փաստաթղթերի հրապարակումը փակել է ՀՀ նախկին ղեկավարների հետ հնարավոր բանավեճի թեման։ «Հիմա ես, նույնիսկ, կարող եմ ասել, որ այլևս չեմ հրավիրում Հայաստանի երեք նախկին նախագահներին բանավեճի, որովհետև քննարկելու այլ բան չկա: Հրապարակված փաստաթղթերը բանավեճն անիմաստ են դարձրել>, - ամփոփել է Հայաստանի վարչապետը։