Մինչ Հայաստանի իշխանությունները շարունակում են խոսել խաղաղության մասին, Բաքուն հերթական պայմաններն է առաջ քաշում Երևանին

Արմինֆո. Չնայած Ադրբեջանի հետ մոտալուտ խաղաղության մասին Հայաստանի գործող իշխանությունների հավաստիացումներին՝ տարածաշրջանում խաղաղության հոտ էլ չի գալիս։ Այդ մասին են վկայում Բաքվից պարբերաբար հնչող նոր պահանջները Երևանի հանդեպ՝ հայկական կողմի հերթական զիջումներից հետո։

Ինչպես հայտնի է դարձել տեղական ԶԼՄ-ներից, այսօր ԱՀ ԱԳ փոխնախարար Էլնուր Մամեդովը "Հիմնական խոչընդոտները Ադրբեջանի և Հայաստանի միջև խաղաղության համաձայնագրի ստորագրման ճանապարհին" միջոցառման ժամանակ հայտարարել է, որ Հայաստանի և Ադրբեջանի միջև կայուն խաղաղության հասնելու ճանապարհին կա երկու հիմնական խոչընդոտ, որոնցից մեկը Հայաստանի Սահմանադրությունն է:

Այնուհետև, պարծենալով Արցախի անպատիժ օկուպացմամբ, նա հայտարարել է, որ 2021 թվականին Ադրբեջանն առաջին անգամ Հայաստանին խաղաղության վերաբերյալ առաջարկներ է արել։

"Մենք պատրաստել ենք խաղաղության մասին հիմնարար սկզբունքները։ 2020-2022 թվականներին մենք չգիտեինք, թե ինչ է ուզում Հայաստանը։ Դրանից հետո մենք անցկացրել ենք համակողմանի քննարկումներ։ Դրանք ընթացել են ԱՄՆ-ում, Ռուսաստանում և Ղազախստանում։ Այդ քննարկումների ընթացքում մենք փորձել ենք մշակել խաղաղության համաձայնագիր։ Հայաստանի և Ադրբեջանի միջև կայուն խաղաղության հասնելու ճանապարհին կա երկու հիմնական խոչընդոտ: Դրանցից մեկը Հայաստանի սահմանադրությունում է։ Այդ խոչընդոտն արտացոլված է նաև Հայաստանի անկախության մասին ակտում։ Այնտեղ հիմք է ընդունվել "Լեռնային Ղարաբաղը Հայաստանի մաս է կազմում" կետը", - ընդգծել է դիվանագետը։

Ընդ որում, նա չի հնչեցրել Բաքվի երկրորդ պահանջը Երեւանից։ Սակայն անկախ փորձագետները հակված են կարծելու, որ Բաքվի երկրորդ պայմանը Հայաստանի բնակեցումն է ադրբեջանցիներով, որոնք, հայկական պետությունից բարեհաջող դրամական փոխհատուցում վերցնելով, Ադրբեջան են մեկնել՝ նախորդ դարի 90-ականների սկզբին։ Հատկանշական է, որ ոչ ոք չի հիշում Ադրբեջանի տարածքում իրենց տներից դուրս նետված ավելի քան 500 հազար հայերի մասին։ Եվ, առավել ևս, ոչ ոք չի հիշում Արցախից տեղահանված հայերի մասին։