Փորձագետ. ԱՄՆ-ը հարված է հասցրել ռուսական և իրանական ազդեցությանը Մերձավոր Արևելքում. Հայաստանի գլխին ամպեր են կուտակվում

Արմինֆո. Հայաստանի գլխին ամպեր են կուտակվում։ Հավաստի աղբյուրներից ստացվող տեղեկությունների համաձայն, ադրբեջանական ուժերը սպառազինությունն ավելացնում են Հայաստանի հետ սահմանին։ Այդ կարծիքին է ԱՄՆ-ի Սթենֆորդի համալսարանի քաղաքագիտության դոկտոր, "Մայր Հայաստան" շարժման նախաձեռնող խմբի անդամ Արթուր Խաչիկյանը:

Նրա խոսքով՝ շարունակվում են ռազմական բեռ փոխադրող չվերթները Իսրայելից դեպի Ադրբեջան։ "Թուրքական հրամանատարությունը, Սիրիան կայծակնային արագությամբ գրավելուց հետո, բացահայտ ասում է, որ հաջորդ փուլը Զանգեզուրի միջանցքն է։ Ադրբեջանի ղեկավարությունը հրամայում է այս վարչակազմին պաշտոնապես բանակցել Արևմտյան Ադրբեջանի հետ, այսինքն, ընդունել, որ Հայաստանը պետություն չէ։ Այս վարչախումբը խոստովանում է, որ պատրաստ է զիջել նաև այս հարցում, հրաժարվում է ասել, թե ինչի շուրջ է բանակցում։ "Ինչ ուզում ենք, այն էլ անում ենք": "Ղեկավարը" զբաղված է ֆոտո սեսիաներով, ռեալիթի-շոուներով, ձվածեղ պատրաստելով եւ տրիկոյով հեծանիվ քշելով", - հավելել է փորձագետը։

Միևնույն ժամանակ, քաղաքագետը ուշադրություն  է հրավիրել այն հանգամանքի վրա, որ "ընդդիմությունը" և գյուղական նապոլեոնները հերթական անգամ պատրաստվում են տապալել բողոքի շարժումը, բղավել անիմաստ կարգախոսներ, շոյել իրենց "էգոն" և օգնել ռեժիմին մնալ իշխանության ղեկին: "Ժողովուրդն անելանելի վիճակում է, Նոր տարվա համար սնունդ է գնում։ Հայ հասարակությունը մոտեցել է անդունդի եզրին, հնարավոր է ՝ վերջին անգամ", - ասել է Խաչիկյանը։

Միևնույն ժամանակ, փորձագետն ընդգծել է, որ Սիրիային կայծակնային հարված հասցվեց Թուրքիայի, Իսրայելի, ԱՄՆ-ի և, հնարավոր է, Ուկրաինայի դաշինքի կողմից: "Թուրքիան հսկայական հաղթանակ տարավ և տարածեց իր ազդեցությունը ։ Իսրայելը ջախջախեց թշնամի ռեժիմները, որոնք աջակցում էին Հըզբոլլահին, Սիրիային և Իրանին: ԱՄՆ-ը հարված հասցրեց ռուսական և իրանական ազդեցությանը և ստիպեց դուրս բերել ռուսական ռազմակայանները։ Կովկասում գործելու է նույն դաշինքը՝ ԱՄՆ-ը, Իսրայելը, Թուրքիան և Ադրբեջանը՝ ընդդեմ Իրանի և Ռուսաստանի։ Հայաստանը մեկուսացման մեջ է", - կարծում է Խաչիկյանը։

Այնուհետև նա սարկազմով մեկնաբանել է արևմտյան առաջնորդների ողջույնները նրանց, ովքեր զավթել են իշխանությունը Սիրիայում ։ "Բարի գալուստ Magical Haircuts վարսավիրանոց։ Դուք կարող եք լինել ահաբեկիչ, «Ալ-Քաիդայի» անդամ, կարող եք պայթեցնել Նյու Յորքի Համաշխարհային առևտրի կենտրոնը և սպանել 3000 մարդու, իսկ ԱՄՆ կառավարությունը կարող է առաջարկել 10,000 դոլար՝ ձեզ բռնելու համար... Մենք կկտրենք ձեր մազերը, կսափրենք ձեր մորուքը, կփչենք դեզոդորանտ, կգանգրացնենք ձեր մազերը, և դուք կդառնաք ժողովրդավարության մարտիկ և ժողովրդավարական Արևմուտքի դաշնակից", - հավելել է քաղաքագետը։

Միեւնույն ժամանակ, Խաչիկյանը վստահ է, որ Սադամից հետո՝ Իրաքի, կամ Քադաֆիից հետո՝ Լիբիայի պատմությունից ելնելով, Սիրիայում Ասադից հետո մի քանի ռիսկեր կան։

Նրա կարծիքով, նախ, առաջին հակամարտություններից մեկը կբռնկվի Թուրքիայի ու նրա զինված խմբավորումների եւ քրդերի միջեւ, որոնց աջակցում են ամերիկացիները, իսկ վերջիններս կվաճառեն քրդերին, ինչպես դա եղել է մի քանի տարի առաջ:

Երկրորդ. Խաչիկյանը կարծում է, որ "ժողովրդավարական ուժերի" ներսում մի քանի խմբավորումների միջև մարտական գործողությունների մեծ ռիսկ կա, որոնցից շատերն ահաբեկչական են: "Երրորդ ՝ Սիրիայում եւ այլ երկրներում ահաբեկչության տարածման վտանգ կա, ինչպես՝ "Ալ-Քաիդայի" եւ ԻԼԻՊ-ի ի հայտ գալը՝ Սադամ Հուսեյնի սպանությունից հետո։ Ցավոք, երբ երկրները պատրաստ չեն "լիբերալ ժողովրդավարության", հատկապես, երբ այն ներկայացնում են ահաբեկիչները, բռնապետների հեռացումը հանգեցնում է, նույնիսկ, ավելի վատ հետևանքների, քան՝ նախկինում: Ահաբեկչությունը, ջիհադական խմբավորումները, քաղաքացիական պատերազմը, հավանաբար, կընդգրկեն Սիրիան եւ հարեւան պետությունները", - ամփոփել է Խաչիկյանը ։