Ինչպես է Փարաջանովը զարմացրել իտալացիներին կամ Artuyt հավաքածուի ցուցադրությունը Միլանի նորաձևության շաբաթում

Արմինֆո.Հայաստանում հայտնի Artuyt ապրանքանիշը Միլանի նորաձևության շաբաթվա ընթացքում ներկայացրել է հագուստի և մետաքսե շարֆերի հավաքածու ՝ ոգեշնչված մեծ ռեժիսոր, նկարիչ, սցենարիստ և կոլաժիստ Սերգեյ Փարաջանովի ստեղծագործություններից: Ցուցադրությունը տեղի է ունեցել Սերգեյ Փարաջանովի 100-ամյակին նվիրված միջոցառումների շրջանակում:

Ինչպես նոյեմբերի 8-ին կայացած մամուլի ասուլիսի ժամանակ պատմել է Artuyt ընկերության հիմնադիր-տնօրեն Արեւիկ Առաքելյանը, բացի նորաձեւության ցուցադրությունից, Միլանում միջոցառումների շրջանակում կազմակերպվել է Փարաջանովի "Հակոբ Հովնաթանյան" ֆիլմի ցուցադրությունը, որին նախորդել է կարճ դասախոսություն ռեժիսորի կյանքի եւ ստեղծագործության մասին: Այդ ամենը համակարգել է "Ոսկե ծիրան" կինոփառատոնի գեղարվեստական ղեկավար Կարեն Ավետիսյանը: Միջոցառումները տեղի են ունեցել Միլանի Բագատտի Վալսեկկի թանգարանում, որտեղ ցուցադրվում է Վերածննդի և Նեոռենեսանսի արվեստի գործերի և ինտերիերի հավաքածուն:

Առաքելյանի հավաստմամբ՝ անցկացված միջոցառումը շատերի համար  ավելի է բացահայտել Սերգեյ Փարաջանովին և նրա ստեղծագործությունը, իսկ ոմանց համար, ընդհանրապես, հայտնություն է դարձել: "Փարաջանովը զարմացրեց իտալացի հանդիսատեսին", - նշել է Artuyt-ի ղեկավարը:

Ընդ որում, նա շնորհակալություն հայտնեց լուսահոգի Զավեն Սարգսյանին՝ Սերգեյ Փարաջանովի թանգարանի հիմնադիրին, ում հավատքի շնորհիվ Artuyt-ը 7 տարի առաջ ներկայացրել է իր շարֆերի առաջին հավաքածուն Միլանի նորաձեւության շաբաթվա ընթացքուն, որն ստեղծվել է Փարաջանովի կոլաժների մոտիվներով:

Իր հերթին՝ Emerging Talents Milano-ի հիմնադիր Տարիել Բաշարյանը նշել է, որ Միլանում միջոցառումների հաջող իրականացման շնորհիվ Երևանում ևս դրանք տեղի կունենան: Մասնավորապես, նոյեմբերի 13-17-ը դրանք անցկացնելու համար Հայաստան կժամանի հատուկ թիմ Իտալիայից։

"Մենք կփակենք Փարաջանովի 100-ամյակին նվիրված միջոցառումների շարքը", - նշել է Բաշարյանը:

Միաժամանակ, նա տեղեկացրել է, որ Իտալիայում տեղի է ունեցել նաև Փարաջանովյան արվեստին նվիրված Դիջիթալ-ցուցահանդես, որը պատրաստվել է 9 իտալացի և 1 հայ մասնագետների կողմից: Ընդ որում, իտալացի վարպետները նախկինում ծանոթ չեն եղել Փարաջանովի ստեղծագործությանը, սակայն աշխատել են մեծ ոգևորությամբ, քանի որ ամեն օրը նրանց համար ինչ-որ նոր, ինչ-որ զարմանալի բանի անհավանական բացահայտում էր:

Նշենք, որ Artuyt-ը մեր երկրում հայտնի է, առաջին հերթին, հայ արվեստը հանրահռչակելու իր առաքելությամբ, այդ թվում ՝ Հայաստանի սահմաններից դուրս: Artuyt-ը մետաքսե շարֆեր է պատրաստում հայ նկարիչների աշխատանքների մոտիվներով։ Դրա համար ընկերությունը համագործակցում է Հայաստանի թանգարանների, նկարիչների և նրանց ժառանգների հետ։

Միլանում ներկայացված հավաքածուի վրա աշխատել են Artuyt-ի դիզայներն ու ողջ ստեղծագործական թիմը։

Հիշեցնենք, որ Սերգեյ Փարաջանովի 100-ամյակը ներառված է ՅՈՒՆԵՍԿՕ-ի Հռչակավոր մարդկանց հոբելյանների և կարևոր իրադարձությունների 2024-2025 թվականների օրացույցում: