Գիտությունը արվեստի լեզվով: Կապի թանգարանում տեղի է ունեցել "Գիտության շաբաթ" մրցանակաբաշխությունը

Արմինֆո.Գիտության շաբաթվա մրցանակաբաշխությունը Կապի թանգարանում էր համախմբել տաղանդաշատ երիտասարդների։ Պարգևատրվել են «Գիտության շաբաթը` իմ աչքերով», «Աստղային հորիզոն» և «ԳիտաCon» անվանակարգերի հաղթողները։

Ինչպես հաղորդում է Team Telecom Armenia-ի հասարակայնության հետ կապերի բաժինը, նկարչական անվանակարգում գլխավոր մրցանակին արժանացել է Ջիմ Հովհաննիսյանի «Մեծ պայթյուն» աշխատանքը, գրական մրցույթում հաղթող է ճանաչվել Արթուր Առաքելյանի «Ուտոպիայի գինը» պատմվածքը, իսկ կոմիքսների անվանակարգում առաջին հորիզոնականը զբաղեցրել է Լուսինե Պետրոսյանի «Իսկ ի՞նչ, եթե ստացվի» նախագիծը:

«Երբ սկսեցի մտածել, թե ինչ նկարեմ մրցույթի համար, անմիջապես հասկացա, որ իմ թեման լինելու է տիեզերքը։ Մտածեցի, որ սպիտակ խոռոչը համապատասխանում է այս գաղափարին․ այն, ի տարբերություն սև խոռոչի, ոչ թե կլանում, այլ ժայթքում և տարածում է մատերիան։ Սակայն դրա գոյությունը դեռևս գիտականորեն ապացուցված չէ։ Աշխատանքի ընթացքում հասկացա, որ նկարս ավելի շատ Մեծ պայթյունի նման է ստացվում, որը համարվում է տիեզերքի, ամեն ինչի՝ այդ թվում մեր կյանքի սկիզբը։ Իհարկե, սա ավելի շատ մաքուր գիտաֆանտաստիկա է։ Ես պատկերացում չունեմ, թե ինչ տեսք է ունեցել Մեծ պայթյունը․ սա պարզապես իմ մեկնաբանումն է», - ասել է «Գիտության շաբաթը՝ իմ աչքերով» մրցույթում առաջին տեղը զբաղեցրած 16-ամյա Ջիմ Հովհաննիսյանը։

Մրցույթների հաղթողները ստացել են խելացի հեռախոսներ, պլանշետներ, ինչպես նաև խելացի ժամացույցներ: Մրցանակները հանձնել է Team Telecom Armenia-ի կոմերցիոն տնօրեն Կարեն Շաբոյանը:

«Մեզ համար կարևոր է խթանել երիտասարդների հետաքրքրությունը գիտության հանդեպ և աջակցել նրանց ստեղծագործական մտքի զարգացմանը: Այսօրվա մրցանակակիրները ցույց տվեցին, որ գիտությունը կարող է ոգեշնչման անսպառ աղբյուր լինել արվեստի համար», - նշել է Team Telecom Armenia-ի կոմերցիոն տնօրենը:

Խոսելով մրցույթի մասին՝ Գիտուժ նախաձեռնության գործառնական տնօրեն Լիլիթ Մարգարյանն ասել է, որ արդյունքները տպավորիչ են թե՛ մասնակցության դիմումների քանակով, և թե՛ ներկայացված բովանդակության մակարդակով։ «Սա Գիտուժի և Team Telecom Armenia-ի առաջին քայլն էր՝ Գիտության շաբաթվա շրջանակում ոգեշնչելու Հայաստանի ստեղծարար համայնքներին ստեղծագործել գիտության թեմայով։ Մեծ ուրախությամբ նշում ենք, որ այս նախաձեռնությունը հաջողությամբ իր ավարտին հասավ։ Վստահ ենք, որ այս փորձը պետք է դարձնել շարունակական՝ նպաստելով Հայաստանում գիտական երևակայության և ստեղծարար մտածողության զարգացմանը»։

Team Telecom Armenia-ն, հանդիսանալով Գիտության շաբաթվա գլխավոր գործընկեր, շարունակում է աջակցել երիտասարդ տաղանդների զարգացմանը և գիտության հանրայնացմանը Հայաստանում:

Տելեկոմ Արմենիա ԲԲԸ-ն (ապրանքանիշը՝ Team Telecom Armenia) հայկական ընկերություն է, որը առաջատար դիրք է զբաղեցնում երկրի հեռահաղորդակցության և տեղեկատվական տեխնոլոգիաների ոլորտներում։ Հանդիսանալով Հայաստանում առաջին տելեկոմ ցանցի ժառանգորդը՝ ընկերությունը ունի ոլորտում ծառայությունների մատուցման ավելի քան 100 տարվա պատմություն։ Team-ը տրամադրում է բջջային և ֆիքսված ինտերնետի, թվային հեռուստատեսության, բջջային և ֆիքսված հեռախոսակապի ծառայություններ թե՛ անհատ, թե՛ կորպորատիվ բաժանորդներին։ Հայաստանի բոլոր բնակիչներին բարձրորակ հեռահաղորդակցության ծառայությունների մատուցումը Team Telecom Armenia-ի նպատակն է։ Դրան հասնելու համար ընկերությունն անընդհատ արդիականացնում ու վերազինում է բջջային և ֆիքսված ցանցերը, գործարկում նոր միջազգային կապուղիներ, որոնք նաև բարձրացնում են Հայաստանում ինտերնետի հուսալիության և անվտանգության մակարդակը։