Երկուշաբթի, 16 Սեպտեմբերի 2024 13:33

Արմինֆո. "Կիրանցի նախադեպը" տարածվելու է պետական սահմանի ողջ երկայնքով։ Այդ մասին սեպտեմբերի 16-ին հայտարարել է "Քաղաքացիական պայմանագիր" կուսակցության քարտուղար Արթուր Հովհաննիսյանը, պատասխանելով այն հարցին, թե ինչու պետական սահմանի սահմանազատման եւ սահմանագծման հանձնաժողովների աշխատակարգի հաստատումը հետեւեց Կիրանց գյուղում սահմանազատման գործընթացի ավարտին, այլ ոչ թե՝ հակառակը։

 

"Տավուշի սահմանազատման գործընթացը (մասնավորապես, հենց այդ տարածաշրջանից, Բաքվի պնդմամբ, սկսվեց սահմանազատումը-խմբ.) Հայաստանի Հանրապետության ձեռքբերումն է, քանի որ այն գյուղերը, որոնք շարունակում էին գտնվել ՀՀ ԶՈՒ վերահսկողության տակ, բայց՝ Հայաստանի միջազգայնորեն ճանաչված սահմաններից դուրս, շարունակում էին լինել ՀՀ դեմ ագրեսիայի միակ լեգիտիմ հնարավորությունը: Ըստ էության, վերջնականորեն սահմանագծելով սահմանը՝ մենք վերացրել ենք ՀՀ-ի վրա լեգիտիմ հարձակման վերջին ռիսկը։ Եվ մենք ունենք հստակ սահման, ինչից գոհ են Կիրանցի, Բաղանիսի և Ոսկեպարի բնակիչները", - հայտարարել է նա։

 

Ավելին, ինչպես նշել է խորհրդարանականը, Կիրանցի սահմանազատումը նախադեպ է դարձել, որի հիման վրա ձևավորվել է կանոնակարգ, որը կօգտագործվի պետական սահմանի ողջ երկայնքով:

 

ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանն, իր հերթին, նշել է, որ Կիրանց գյուղի բնակիչները, որի դպրոցը գտնվում է սահմանից մոտ 40 մետր հեռավորության վրա, այսօր ՝ սահմանազատումից հետո, ավելի պաշտպանված են, քան մինչ գործընթացը:

 

 ՀՀ ԱԳՆ-ն օգոստոսի 30-ին հաղորդել է, որ Երևանն ու Բաքուն ստորագրել են պետական սահմանի սահմանազատման եւ սահմանագծման հանձնաժողովների համատեղ գործունեության մասին դրույթը: ՀՀ կառավարության սեպտեմբերի 4-ի նիստում ընդունված կանոնակարգը փոխանցվել է ՍԴ, որը դրա քննարկումը կսկսի սեպտեմբերի 24-ին:

 

Փաստաթուղթը, մասնավորապես, նախատեսում է սահմանազատման աշխատանքների կազմակերպում, համապատասխան փաստաթղթերի ընդունում, պետական սահմանի հատման արձանագրություն-նկարագրի կազմում, սահմանազատման համապատասխան մասշտաբի քարտեզի կազմում, ինչպես նաև փորձագիտական խմբերի աշխատանք: Նշվում է նաև, որ դրույթը և դրա հիման վրա ընդունվելիք փաստաթղթերը կլրացնեն սահմանազատման աշխատանքների լիարժեք ընթացքն ապահովելու իրավական հիմքերը։

 

Հիշեցնենք, որ Տավուշի մարզի Կիրանց գյուղում սահմանազատում իրականացնելուց հետո ադրբեջանական կողմին է փոխանցվել 30 անձի պատկանող 54 անշարժ գույք (2 տուն և հողամասեր), կամուրջ, դեպի Վրաստան միջպետական ճանապարհի հատված: