Իրավապաշտպան. Ընդդիմադիր հայացքներ ունեցող դասախոսներին հեռացնում են Հայաստանի պետական բուհերից

Արմինֆո.Ընդդիմադիր հայացքներ ունեցող դասախոսներին հեռացնում են Հայաստանի պետական բուհերից։ Այդ մասին ֆեյսբուքյան իր էջում գրել է իրավապաշտպան Ռուբեն Մելիքյանը։

«Շատերը վրդովվեցին՝ տեղեկանալով Աբրահամ Գասպարյանին և Մենուա Սողոմոնյանին Համալսարանից դե ֆակտո հեռացնելու մասին (դե յուրե՝ դասավանդած առարկաներն ուսումնական ծրագրերից հանվում են, և այդ հիմքով նոր պայմանագիր չի կնքվում): Պարզ է, որ բուն պատճառը նրանց քաղաքական հայացքներն են։

Բայց վրդովմունքի ու «դատապարտման» ալիքի մեջ կարծես աչքաթող է արվում երկու կարևոր փաստ, և հիմա ուզում եմ լրացնել այդ բացը.

1) Նման «օպերացիա» իրականացնելու հարցում առաջնային դեր ունի կոնկրետ ֆակուլտետների ղեկավար կազմը։ Եթե պինդ լինեն, ապա ոչ մի բուհի ղեկավարություն չի կարողանա հեռացնել որևէ դասախոսի։

2) ԵՊՀ ներկայիս ղեկավար կազմը ձևավորվել է հայտնի «տրոյկայի» ջանքերով։ Նրա՛նց ենք մոռանում։

Օրինակ, մոռանում են «զավթիչ տրոյկայի» անդամ, գերագույն հեծանվորդի օգնական Եղիշե Կիրակոսյանին, որը փայլուն օրինակ է այն իրողության, որ մարդը կարող է լինել փայլուն մասնագետ, բայց իր գիտելիքն ու դրա հետևանքով ձևավորված հեղինակությունը ծառայեցնել գերագույն չարիքին (ձեռի հետ էլ՝ փոքր հարցերում երբեմն դրսևորել հանրօգուտ վարքագիծ)», - գրել է իրավապաշտպանը:

Պետական ուսումնական հաստատություններից ընդդիմադիր հայացքներ ունեցող դասախոսներին աշխատանքից ազատելու մասին է գրում նաև "Փաստ" օրաթերթը: Ըստ թերթի ՝ կրթության ոլորտում բարեփոխումների մասին ամպագոռգոռ հայտարարություններին զուգընթաց աշխատանքից արդեն զրկվել են ԵՊՀ-ի և Բրյուսովի անվան համալսարանի տասնյակ դասախոսներ: "Խոսքը փորձառու մասնագետների մասին է, ովքեր հարգանք են վայելում ինչպես գիտական շրջանակներում, այնպես էլ ուսանողների շրջանում։

Ուշագրավ է, որ դասախոսները, որոնց հետ աշխատանքային նոր պայմանագրեր չեն կնքվել, բացառապես ընդդիմադիր հայացքների տեր մարդիկ են", - հավելել են թերթում։

Միևնույն ժամանակ, "Փաստ"-ը նշում է, որ աշխատանքից ազատված դասախոսները մտադիր են դատարանի միջոցով պաշտպանել իրենց իրավունքները:

ԱրմԻնֆո լրատվական գործակալությունը փորձել է պարզել տեղեկատվության հավաստիությունը և Կրթության, գիտության, մշակույթի և սպորտի նախարարության դիրքորոշումը՝ այդ հարցի քաղաքականացման առնչությամբ։ Սակայն ԿԳՄՍՆ-ից օպերատիվ պարզաբանում ստանալ չի հաջողվել՝  արհեստականորեն ստեղծվող բյուրոկրատական քաշքշուկների պատճառով ։