Հայաստանում ՌԴ դեսպան. Մեր դժվարին ժամանակներում հատկապես կարեւոր է հիշել անցյալի դասերը

Արմինֆո. Մեր դժվարին ժամանակներում հատկապես կարևոր է հիշել անցյալի դասերը։ Այդ մասին օգոստոսի 16-ին "Օշականի հերոսներին" հուշարձանի մոտ տեղի ունեցած հանդիսավոր միջոցառման ժամանակ հայտարարել է Հայաստանում ՌԴ արտակարգ եւ լիազոր դեսպան Սերգեյ Կոպիրկինը ։

"Ամեն տարի այս ժամանակ մենք հավաքվում ենք այստեղ՝ հարգելու ռուս զինվորների և հայ աշխարհազորայինների հիշատակը, ովքեր պաշտպանել են գլխավոր սրբավայրը՝ Մայր Աթոռ Սբ Էջմիածինըը", - ասել է դեսպանը: Նա ընդգծել է, որ մեր դժվարին ժամանակներում հատկապես կարևոր է հիշել անցյալի դասերը ։ "Մեր եղբայրական ժողովուրդներին կապում են բազմադարյա մշակութային քաղաքակրթական կապերն ու հոգևոր մտերմությունը ։ Պատմությունը վերաշարադրելու ոչ մի փորձ չի չեղարկի այս փաստը։ Չնայած 8-րդ դասարանի Հայոց պատմության նոր դասագրքից հանվել է Օշականի ճակատամարտի մասին պարբերությունը, մենք ձեզ հետ միշտ հիշելու և մեծարելու ենք այդ հիշարժան օրերի հերոսներին: Առանց դրա մենք դժվար թե կարողանանք հաջողությամբ դիմակայել այն մարտահրավերներին, որոնք այսօր կանգնած են Ռուսաստանի և Հայաստանի առջև", - ընդգծել է ռուս դիվանագետը։

Նրա ասելով՝ 1827 թվականի օգոստոսի 17-ը հավերժ գրված է երկու ժողովուրդների հերոսական տարեգրության մեջ ։ "Բոլոր զոհերով և կորուստներով հանդերձ՝ մեր պաշտպանները արժանապատվորեն դիմացան ամրության փորձությանը և ապացուցեցին, որ միասնական նպատակով համախմբված, նրանք հզոր ուժ են և կարող են դիմակայել և հաղթել ցանկացած պարագայում", - ասել է Ռուսաստանի դիվանագիտական ներկայացուցչության ղեկավարը: Նշենք, որ այսօրվա միջոցառումը կազմակերպել է Հայաստանում Ռուսաստանի դեսպանատունը ՝ Երևանում Ռուսական տան և Արմավիրի մարզպետարանի հետ համատեղ: