Առողջապահության նախարարությունը քաղաքացիներին հորդորում է ընթերցել պիտակները և խուսափել ավելացված շաքար պարունակող սննդամթերքից

Արմինֆո. Շաքարի սպառումը բնակչության շրջանում զգալիորեն բարձր է, քանի որ շատերը շաքարը չարաշահում են` հաճախ առանց գիտակցելու: Սննդում օրական 50 գրամից (կամ 12 թեյի գդալից ավելի) ավելի շաքարի օգտագործումը կարող է հանգեցնել քաշի ավելացման, գիրության, շաքարային դիաբետի, խոլեսթերինի և սրտանոթային համակարգի հիվանդությունների զարգացմանը: Այդ մասին ասվում է ՀՀ առողջապահության նախարարության հաղորդագրությունում:

«Կան մթերքներ, որոնք կարծես թե «առողջ» են, սակայն իրականում մեծ վնաս են հասցնում առողջությանը, քանի որ պարունակում են թաքնված շաքարի մեծ քանակություն, օրինակ՝ մրգային յոգուրտները կամ մրգային հյութերը:

Մթերքներ, որոնք պարունակում են մեծ քանակությամբ շաքար. 1 բաժակ բնական հյութ (30 գրամ կամ 7.5 թեյի գդալ շաքար), 1 բաժակ գազավորված քաղցր ըմպելիք (33 գրամ կամ 8.5 թեյի գդալ շաքար), 1 կտոր կաթնային շոլոկադի սալիկ (6 գրամ կամ 1.5 թեյի գդալ շաքար), 100 գր. պաղպաղակ (21 գրամ կամ 5 թեյի գդալ շաքար), 200 գրամ յոգուրտ (6 գրամ կամ 1.5 թեյի գդալ), 1 փոքր թխվածքաբլիթ (3գրամ կամ 3/4 թեյի գդալ):

Մթերքների մեջ ավելացված շաքարի քանակությունը ստուգելու համար անհրաժեշտ է ընթերցել պիտակները և խուսափել ավելացված շաքար պարունակող սննդամթերքից», - ասվում է հաղորդագրությունում: