Վրաստանում հարցման մասնակիցների ընդամենը 2 տոկոսն է Հայաստանը համարում երկրի գլխավոր բարեկամը. հարցում

Արմինֆո. Վրաստանում հարցման մասնակիցների ընդամենը 2 տոկոսն է Հայաստանը համարում երկրի գլխավոր բարեկամը։ Այդ մասին են վկայում Հետազոտական ռեսուրսների կովկասյան կենտրոնի կողմից անցկացված "Կովկասյան բարոմետր 2024" հետազոտության արդյունքները։

Այն հարցին, թե տվյալ պահին որ երկիրն է Վրաստանի գլխավոր բարեկամը, 24%-ը պատասխանել է՝ ԱՄՆ- ը, 8%-ը՝ Ադրբեջանը, 7%-ը՝ Ուկրաինան, 4%-ը՝ Թուրքիան և Գերմանիան, 2%-ը՝ Հայաստանը, Ռուսաստանը, Ֆրանսիան, ևս 1-ական տոկոս են ստացել Իսրայելն ու Չինաստանը, մյուսները՝ 3% - ը: Ընդ որում, հարցվածների ավելի քան մեկ քառորդը՝ 26 տոկոսը, կարծում է, որ Վրաստանը բարեկամներ չունի։

Վերջին 12 տարում նրանց թիվը, ովքեր կարծում են, որ Վրաստանը թշնամիներ չունի, չի փոխվել՝ 4%:

Ընդ որում, Վրաստանի քաղաքացիների մեծ մասը երկրի գլխավոր թշնամի է համարում Ռուսաստանին, այդ թվում ՝ հարցվածների 69%-ը: 2021թ. համանման հետազոտության մեջ այդպես է կարծել 66%-ը, 2019թ.՝ 49% - ը, 2017թ.՝ 40% - ը, 2012թ.՝ 35%-ը:

Այժմ ԱՄՆ-ում Վրաստանի թշնամի է տեսնում հարցվածների 4 տոկոսը, իսկ Թուրքիայում՝ 2 տոկոսը։ 2012թ. հետազոտությունում այդ երկու երկրներն էլ հավաքել են 3%:

Ընդ որում, հարցվածների 64 տոկոսը հանդես է եկել Հայաստանի հետ բիզնես վարելու օգտին, 32%-ը դեմ է։ Հետաքրքրական է նաև, որ հարցվածների ընդամենը 42%-ն է պաշտպանել վրացուհիների ամուսնությունը հայերի հետ, 54% - ը դեմ է արտահայտվել:

Հարցումն անցկացվել է ապրիլի 16-ից մինչեւ մայիսի 13-ը՝ ներառյալ, Վրաստանի բոլոր շրջաններում: Անձնական հարցազրույցի եղանակով վրացերեն, հայերեն և ադրբեջաներեն լեզուներով հարցմանը մասնակցել է 1509 մարդ, որոնց ընտրել են բազմաստիճան կլաստերային ընտրանքի եղանակով։

"Կովկասյան բարոմետրը" Հարավային Կովկասի երկու երկրներում ՝ Հայաստանում և Վրաստանում, Կովկասյան հետազոտական ռեսուրս կենտրոնի (CRRC) կողմից իրականացվող սոցիալ-տնտեսական խնդիրների և քաղաքական վերաբերմունքի ամենամյա հետազոտություն է: Նախագիծը մեկնարկել է 2004 թվականին։